بۇل تۋرالى اقپاراتتىق-كوممۋنيكاتسيالىق ورتالىعىندا وتكەن ءباسپاسوز بريفينگىندە شىمكەنت قالالىق تۇرعىن ءۇي باسقارماسىنىڭ باسشىسى عالىمجان تولەپوۆ مالىمدەدى.
– بيىلعى جولداۋدىڭ 4-تارماعى باسپانا ماسەلەسىنە تىكەلەي بايلانىستى. جولداۋدا مەملەكەت باسشىسى قاسىم-جومارت توقاەۆ كەزەكتە تۇرعان ادامداردىڭ باسپانا ماسەلەسىن تەزىرەك شەشۋ كەرەك ەكەنىن باسا ايتتى. وسى ماقساتتا ءتيىستى جۇمىستار اتقارىلۋدا. سونىڭ ءبىرى – «جۇمىس ىستەيتىن جاستارعا ساتىپ الۋ قۇقىعىنسىز جالعا بەرىلەتىن تۇرعىن ءۇي» باعىتى. بۇل باعىت بويىنشا جىل سوڭىنا دەيىن 300 پاتەر بەرىلەدى. ال وتىنىشتەر «شىمكەنت-باسپانا» اۆتوماتتاندىرىلعان جۇيەسى ارقىلى جەلتوقسان ايىندا قابىلدانادى، – دەدى ع.تولەپوۆ.
عالىمجان ءانۋارۇلىنىڭ سوزىنشە، بۇگىندە قالالىق باسپانا كەزەگىنە جالپى 40 148 ادام تىركەلگەن. ونىڭ ىشىندە 13 332-ءسى الەۋمەتتىك جاعىنان ءالسىز توپ ساناتىن، ال جەتىم جانە اتا-اناسىنىڭ قامقورلىعىنسىز قالعان بالالار 1642-ءنى قۇرادى. وسى رەتتە ايتا كەتەتىن جايت، الەۋمەتتىك جاعىنان ءالسىز توپ ساناتىنداعىلارعا بەرىلەتىن تۇرعىن ءۇيدىڭ 20 پايىزى جەتىم جانە اتا-اناسىنىڭ قامقورلىعىنسىز قالعان بالالارعا تيەسىلى. ياعني، بيىل 48 ارەندالىق پاتەردىڭ كىلتى جەتىم جانە اتا-اناسىنىڭ قامقورلىعىنسىز قالعان بالالارعا تابىستالدى. جالپى، 2020 جىلى «نۇرلى جەر» مەملەكەتتىك باعدارلاماسى اياسىندا ساتىپ الۋ قۇقىعىنسىز 1596 ارەندالىق باسپانا بەرىلدى.
ءباسپاسوز ماجىلىسىندە بەلگىلى بولعانداي، تۇرعىن ءۇي كەزەگىنە تىركەلگەن ازاماتتار بويىنشا 118 678 وڭدەۋ جۇرگىزىلىپ، يەلىگىندە تۇرعىن ءۇي تىركەلگەن، باسقا ەلدى مەكەنگە قونىس اۋدارعان، ساناتىن جوعالتقان جانە قايتىس بولۋ سەبەپتەرىمەن 4456 ازامات تۇرعىن ءۇي الۋ تىزىمىنەن شىعارىلعان. بۇل تەكسەرۋ جۇمىستارى تۇراقتى تۇردە جالعاسادى.
ايتا كەتەيىك، ازاماتتار ءوز كەزەگىن «E-gov» ەلەكتروندىق پورتالى مەن باسقارمانىڭ 8 700 674 20 52 WhatsApp ءنومىرى ارقىلى بىلۋگە بولادى.
شىمكەنت قالاسىنىڭ اقپاراتتىق-كوممۋنيكاتسيالىق ورتالىعى
فوتو – سەرىك قوساي
