«اسىل ارنا» جابىلادى، «حالىق ارناعا» اق جول!»

2839
Adyrna.kz Telegram

كۇنى كەشە عانا قازاقستان مۇسىلماندارى ءدىني باسقارماسى جانىنان ءدىني ۋاعىز-ناسيحات جۇرگىزەتىن «حالىق ارنا» اتتى جاڭا تەلەارنا اشىلعان ەدى. الماتىدا وتكەن جيىندا باس ءمۇفتي ناۋرىزباي قاجى تاعانۇلى ءمۇفتيات ارناسىنىڭ تۇساۋىن كەسكەن. وعان ەلگە ەسىم-سويى بەلگىلى قوعام قايراتكەرلەرى كەلىپ قاتىسقان.

وسىعان دەيىن قمدب ءباسپاسوز قىزمەتى تاراتقان اقپاراتتا«كارانتين كەزىندە ونلاين ناسيحات جۇمىستارىنىڭ ماڭىزى ارتتى. دەگەنمەن اقپارات عاسىرىندا جاڭا تەحنولوگيانى يگەرىپ، ناسيحات جۇرگىزۋ مەن اقاپارت تاراتۋدىڭ تەلەۆيزيالىق ءتاسىلىن وزىمىزدەن باسقارۋدى ۇيعاردىق. وسىعان وراي قمدب جانىنان رەسپۋبليكالىق «حالىق ارنا» اتتى ءتول تەلەارنامىزدى اشقالى وتىرمىز»، - دەگەن ەدى.

وسىدان كەيىن الەۋمەتتىك جەلىدە ءسۇيىنشى سۇراعان جازبالار كوبەيدى. دەسە دە، جۇرت قىزۋ تالقىلاعان تاعى ءبىر اڭگىمە: وسى ۋاقىتقا دەيىن تولىق ءدىني كونتەنتپەن اينالىسىپ كەلگەن «اسىل ارنا» جابىلا ما؟ ءمۇفتياتتىڭ جاڭا اشىلعان «حالىق ارناسى» مۇحامەدجان تازابەك باسقاراتىن «اسىل ارناعا» بالاما ارنا بولا ما؟، دەگەن سۇراقتاردىڭ توڭىرەگىندە ءوربىدى.

بۇل ساۋالعا كەشە «اسىل ارنا» تەلەكانالىنىڭ باس ديرەكتورى مۇحامەدجان تازابەكتىڭ ءوزى جاۋاپ بەرىپتى. «Facebook» جەلىسىندەگى پاراقشاسىندا «اسىل ارنانىڭ» جابىلاتىنىن، ورنىنا جاڭا كونتسەپتسيا دايىندالىپ، جاڭا تەلەارنا اشىلاتىنىن ايتقان ەكەن.

مۇحامەدجان تازابەك (03.11.2020 ج):

- بۇگىن، تۇستەن كەيىن ءمۇفتياتتىڭ الماتىداعى باس عيماراتىندا تاريحي جيىن ءوتتى. قمدب عۇلامالار كەڭەسىنىڭ كەزەكتى كەڭەسى باس قوسىپ، وعان مەن قوناق رەتىندە شاقىرىلدىم. كەلەلى كەڭەس ماڭىزدى ماسەلەلەرگە ارنالدى.

پاندەميا كەزىندەگى وتانداستارىمىزدىڭ رۋحاني قاجەتتىلىگىن قامتۋ، جاماعات اراسىنداعى تۇسىنۋشىلىك پەن كەرى اعىمداردىڭ جولىن كەسۋ ماسەلەلەرى تالقىلاندى.

اتاپ ايتقاندا، اباي مەن ءماشھۇر ءجۇسىپ، مايلىقوجا مەن شاھ-كارىمدەر سەكىلدى دانالار ۇستانعان ءماترۋدي اقيداسىنىڭ قازىرگى قازاق رۋحانياتىنداعى التىن قازىق ورىنى مەن حانافي مازحابىنىڭ تىعىرىقتان شىعارار تۇعىرلى قاسيەتتەرى ءسوز بولدى.

مەن دە شىنى كەرەك، وسى كۇنگە دەيىن تولىق جاۋابى بەرىلمەگەن، نۇكتەسى قويىلماعان، قوعام تاراپىنان تۋىنداپ جۇرگەن سۇراقتارعا بۇگىنگى بەرەكەلى جيىندا اشىق، ايقىن جاۋاپ تاۋىپ، جۇرەگىم عۇلامالار ناسيحاتى مەن ۋاعىزىنان قاناعات تاپتى.

اقيدامىز ءماترۋدي، مازھابىمىز حانافي، قارا شاڭىراعىمىز ءمۇفيات دەگەن ۇستانىممەن، ىنتىماق-بىرلىكپەن جيىن سوڭىندا تارقاستىق.

ءبىراز ۋاقىت بۇرىن باس ءمۇفتي ناۋرىزباي قاجى تاعانۇلىمەن كەزدەسكەندە بۇگىن عانا تۇساۋى كەسىلىپ جاتقان «حالىق ارنا» ءدىني كانالى جايىندا سويلەسكەن بولاتىنبىز.

«ەگەر ءدىني كانال اشىپ جاتساڭىزدار، «اسىل ارنانى» جاۋىپ، ورىنىنا باسقا ارنا اشامىن، ال، ءدىني كونتەنتتەردى باسى ءبۇتىن وزدەرىڭىزگە تاپسىرامىن»، دەپ ايتقان بولاتىنمىن.

سەبەبى، ءدىني ۋاعىزبەن ءدىني باسقارما تولىقتاي وزدەرى اينالىسقانى ءجون. قازىر بۇرىنعىداي ەمەس، ءدىني باسقارمانىڭ كادرلىق، قارجىلىق قۇزىرەتى ءدىني ارنانىڭ قىزمەتىن قامتۋعا جەتكىلىكتى.

سىرت كوزدەن دە ارتىق سۇراق تۋىنداماي، ءبىر بۇلاقتان اقپارات تارقاۋى ەلگە دە ىڭعايلى.

ال، ون جىل بۇرىن ءبىز ارنا اشقان كەزدە الدىمىزدا سالىستىراتىن، ۇلگىسىن الاتىن مۇنداي جوبا بولماعان. قاتتى قينالدىق، ىزدەندىك، ارتىق ايتتىق، كەم ايتتىق، حالىقپەن كەڭەسە ءجۇرىپ وسى كۇنگە جەتتىك.

ول كەزدە ەفيردە قۇمارلىق ناسيحاتتالسا دا قۇران وقىلمايتىن، مازاڭ قاشاتىن اۋەن بولسا دا ازان ايتىلمايتىن.

قانشاما اتا-اپالارىمىز سۇقبات تىڭداپ، جاستارىمىز رۋحاني تاعىلىم ۇيرەنىپ، قانشاما باعدارلامالاردى بالالارىمىزبەن بىرگە وتىرىپ ۇيالماي كوردىك...

اللاعا شۇكىر، ءدىني باسقارما تولىسىپ، وسىنشالىق اۋىر جۇك، ءدىني اماناتتى مويىنىمىزدان الىپ جاتقانىنا قۋانىشتىمىز. «حالىق ارناعا» اق جول، شىعارماشىلىق تابىس تىلەيمىز.

ال، «اسىل ارنا» جىل اياعىنا دەيىن جاڭا كونتسەپتسياسىن دايىنداپ، ءوز كورەرمەندەرىنە «ءتالىمتۆ» دەگەن جاڭا اتپەن جول تارتىپ، ارى قاراي الەۋمەتتىك - وتباسىلىق، عىلىمي - تانىمدىق، مادەني - اعارتۋشىلىق باعىتتا قىزمەتىن جالعاستىرادى. ءارى كورەرمەندەرگە الەۋمەتتىك رولدىك مودەلدەردى ۇسىناتىن موتيۆاتسيالىق كونسەرۆاتيۆتى الاڭعا اينالادى.

حالىقتىڭ رۋحاني قىزمەتىنە جاراپ، اقىندىعىمىز بەن ۇيىمداستىرۋشىلىق قابىلەتىمىزدى ەل يگىلىگىنە پايدالانا الساق، بۇل دا ءبىر اللانىڭ بەرگەن ۇلى نىعمەتى. اللا بارشامىزعا بەرەكەسىن جاۋدىرسىن!

Abai.kz

پىكىرلەر