پەتروپاۆلدىقتار “Instagram” مەن “OLX”-تەگى الاياقتاردىڭ ايلاسىنا ءتۇسىپ قالدى، – دەپ حابارلايدى «ادىرنا» ۇلتتىق پورتالى ءىىم-گە سىلتەمە جاساپ.
پەتروپاۆلدا “Instagram” مەن “OLX”-تە الاياقتىق ارەكەتتەردىڭ 95 فاكتىسى تىركەلدى. بۇگىنگى كۇنى جەدەل ۋاكىلدەردىڭ ايتۋىنشا، بۇل پلاتفورمالار ارقىلى تاپسىرىس بەرۋ نەمەسە زاتتاردى ساتۋ قاۋىپتى ەكەندىگىن، سونداي-اق الاياقتاردىڭ مۇندا دا ءوز ايلالارىن جۇزەگە اسىراتىندىعىن اتاپ ءوتتى.
– وسىنداي ونلاين ساۋدا جاساۋ كەزىندە ساق بولۋ كەرەك. پىكىرلەرگە، اككاۋنتتاردىڭ قۇرىلعان ۋاقىتىنا نازار اۋدارعان دۇرىس. بوتتاردىڭ كومەگىمەن قىلمىسكەرلەر وڭ پىكىرلەر جازاتىندىعىن اتاپ كەتكەن ءجون. تەكسەرىلگەن ينتەرنەت-دۇكەندەرگە عانا تاپسىرىس بەرۋ كەرەك، – دەپ توقتالا كەتتى پەتروپاۆل ق. پب باستىعى جاندوس مۇقاتوۆ.
پەتروپاۆل تۇرعىنى “OLX” ارقىلى قۇندىز تونىن ساتپاق بولادى. “WhatsApp” نومىرىنە العىسى كەلگەن ادام حابارلاسىپ، كيىپ كورمەستەن ساتىپ الامىن دەگەن. تونىن ساتقىسى كەلگەن ايەل كۇدىكتەنىپ، بىردەن ساتىپ الۋشىمەن بايلانىسىن توقتاتقان. جىل باسىنان بەرى پەتروپاۆلدا 298 ينتەرنەت-الاياقتىق تىركەلدى.
«ادىرنا» ۇلتتىق پورتالى
