جاقىندا الماتى قالاسىندا جاڭا كىتاپتىڭ تۇساۋى كەسىلدى. ناقتى ايتقاندا جۋرناليست، Argymaq.kz ۇلتتىق تانىمدىق پورتالىنىڭ باس رەداكتورى، «نۇر سۇڭقار» سىيلىعىنىڭ، «حالىق العىسى» مەملەكەتتىك مەدالىنىڭ يەگەرى ەرجان جاۋباي مەن بەلگىلى پسيحولوگ، پسيحولوگيا عىلىمدارىنىڭ ماگيسترى سۇيىندىكوۆا نۇرگۇل مولدابايقىزىنىڭ «قازاقتىڭ جازىلماعان پسيحولوگياسى» اتتى بىرلەسكەن ەڭبەگى جارىققا شىقتى. Almaty towers SmArt Point عيماراتىندا وتكەن جاڭا كىتاپتىڭ تۇساۋكەسەرى كارانتيندىك تالاپتاردى ەسكەرە وتىرىپ، بەلگىلى جۋرناليستەر مەن وسى سالاعا قاتىسى بار مامانداردىڭ، جالپى وقىرمان قاۋىمنىڭ قاتىسۋىمەن وتكىزىلدى. ءىس-شارانىڭ قادىرلى قوناعى بولىپ «انا ءتىلى» گازەتىنىڭ باس رەداكتورى جاناربەك ءاشىمجان، پسيحولوگيا عىلىمدارىنىڭ دوكتورى، پروفەسسور، رقب «قازاق پسيحولوگيالىق قوعامىنىڭ» پرەزيدەنتى مۇقان پەرلەنبەتوۆ، اۋىل شارۋاشىلىعى عىلىمدارىنىڭ كانديداتى، دوتسەنت، قازاق ۇلتتىق اگرارلىق ۋنيۆەرسيتەتىنىڭ پروفەسسورى، جىلقىتانۋشى قايرات يسحان، ەتنوگراف بۇلبۇل كاپقىزى قاتىستى.
ءداستۇرلى ءانشى ءبازىلجان ءبىرجانۇلى ابايدىڭ «سەگىز اياق» ءانى، «مولدابايدىڭ ءانى» اندەرىن ورىنداۋمەن باستالعان جيىن، كەلگەن قوناقتاردىڭ قۇتتىقتاۋ سوزدەرىمەن جالعاسىن تاپتى. بەلگىلى بولعانداي، جاڭا كىتاپتا حالقىمىزدىڭ سان عاسىرلىق دۇنيەتانىمىنىڭ قورىتىندىسى، وزەگى بولعان سالت-ءداستۇرى مەن ۇلتتىق ويىندارى، ىرىم-تىيىمدارىنىڭ پسيحولوگيالىق استارىنا عىلىمي تۇرعىدا تالداۋ جاسالعان. سونىڭ نەگىزىندە ۇلتىمىزدىڭ بالا تاربيەسىنە اسا جاۋاپكەرشىلىكپەن قاراپ، ەرەكشە ءمان بەرگەنى، ءار سالتىندا، ءار ويىنىندا پسيحولوگيالىق تەرەڭ استار جاتقانى ناقتى كورىنىس تاپقان. كىتاپقا 90-عا جۋىق سالت-ءداستۇر مەن 20-دان استام ۇلتتىق ويىن توپتاستىرىلعان. كىتاپ «مۇقابا» باسپاسىنان 5100 دانامەن وقىرمانعا جول تارتتى. شارا بارىسىندا ەتنوگراف بۇلبۇل كاپقىزى اپامىز كىتاپ اۆتورلارى ەرجان جاۋبايعا تاقيا، ال نۇرگۇل مولدابايقىزىنا ورامالدى سىيعا تارتتى.
كەلەسى كەزەكتە جيىنعا قاتىسۋشى قادىرلى قوناقتاردىڭ قاتىسۋىمەن سالتاناتتى تۇردە جاڭا كىتاپتىڭ تۇساۋى كەسىلدى. وسىدان سوڭ جيىنعا قاتىسۋشى وقىرمان قاۋىم كىتاپ جايلى ءوز پىكىرلەرىمەن ءبولىسىپ، ءوز ويلارىن ورتاعا سالدى. شارا سوڭىندا كىتاپتىڭ قوس اۆتورى ەرجان جاۋباي مەن نۇرگۇل مولدابايقىزى كىتاپتىڭ شىعۋ بارىسى جايلى اڭگىمەلەپ بەردى. تاعىلىمدى ءىس-شارا قوناقتارعا جايىلعان اق داستارحان باسىندا جالعاسىن تاپتى.
دۋمان ارعىنگەلدى،
“ادىرنا” ۇلتتىق پورتالى
