Jaqynda Almaty qalasynda jańa kitaptyń tusaýy kesildi. Naqty aıtqanda jýrnalıst, Argymaq.kz ulttyq tanymdyq portalynyń Bas redaktory, «Nur Suńqar» syılyǵynyń, «Halyq alǵysy» memlekettik medaliniń ıegeri Erjan Jaýbaı men belgili psıholog, psıhologııa ǵylymdarynyń magıstri Súıindikova Nurgúl Moldabaıqyzynyń «Qazaqtyń jazylmaǵan psıhologııasy» atty birlesken eńbegi jaryqqa shyqty. Almaty towers SmArt Point ǵımaratynda ótken jańa kitaptyń tusaýkeseri karantındik talaptardy eskere otyryp, belgili jýrnalıster men osy salaǵa qatysy bar mamandardyń, jalpy oqyrman qaýymnyń qatysýymen ótkizildi. Is-sharanyń qadirli qonaǵy bolyp «Ana tili» gazetiniń bas redaktory Janarbek Áshimjan, Psıhologııa ǵylymdarynyń doktory, professor, RQB «Qazaq psıhologııalyq qoǵamynyń» Prezıdenti Muqan Perlenbetov, aýyl sharýashylyǵy ǵylymdarynyń kandıdaty, doent, Qazaq ulttyq agrarlyq ýnıversıtetiniń professory, jylqytanýshy Qaırat Ishan, etnograf Bulbul Kápqyzy qatysty.
Dástúrli ánshi Báziljan Birjanuly Abaıdyń «Segiz aıaq» áni, «Moldabaıdyń áni» ánderin oryndaýmen bastalǵan jıyn, kelgen qonaqtardyń quttyqtaý sózderimen jalǵasyn tapty. Belgili bolǵandaı, jańa kitapta halqymyzdyń san ǵasyrlyq dúnıetanymynyń qorytyndysy, ózegi bolǵan salt-dástúri men ulttyq oıyndary, yrym-tyıymdarynyń psıhologııalyq astaryna ǵylymı turǵyda taldaý jasalǵan. Sonyń negizinde ultymyzdyń bala tárbıesine asa jaýapkershilikpen qarap, erekshe mán bergeni, ár saltynda, ár oıynynda psıhologııalyq tereń astar jatqany naqty kórinis tapqan. Kitapqa 90-ǵa jýyq salt-dástúr men 20-dan astam ulttyq oıyn toptastyrylǵan. Kitap «Muqaba» baspasynan 5100 danamen oqyrmanǵa jol tartty. Shara barysynda etnograf Bulbul Kápqyzy apamyz kitap avtorlary Erjan Jaýbaıǵa taqııa, al Nurgúl Moldabaıqyzyna oramaldy syıǵa tartty.
Kelesi kezekte jıynǵa qatysýshy qadirli qonaqtardyń qatysýymen saltanatty túrde jańa kitaptyń tusaýy kesildi. Osydan soń jıynǵa qatysýshy oqyrman qaýym kitap jaıly óz pikirlerimen bólisip, óz oılaryn ortaǵa saldy. Shara sońynda kitaptyń qos avtory Erjan Jaýbaı men Nurgúl Moldabaıqyzy kitaptyń shyǵý barysy jaıly áńgimelep berdi. Taǵylymdy is-shara qonaqtarǵa jaıylǵan aq dastarhan basynda jalǵasyn tapty.
Dýman ARǴYNGELDI,
“Adyrna” ulttyq portaly
