وسىدان 105 جىل بۇرىن، ياعني، 1915 جىلى 4 قاراشادا ورىنبور قالاسىندا جۋرناليست، ادەبي مۇرالاردى جيناۋشى گۇلنار مىرجاقىپقىزى دۋلاتوۆا دۇنيەگە كەلدى. الاش قوزعالىسى كوسەمدەرىنىڭ بىرەگەيى، ۇلتتىڭ ۇلى تۇلعاسى مىرجاقىپتىڭ قىزى دەگەن اتقا ساي ءومىر سۇرگەن گۇلنار اپامىزدى "ادىرنا" ۇلتتىق پورتالى ۇجىمى ساعىنا ەسكە الادى.
الماتى مەملەكەتتىك مەديتسينا ينستيتۋتىن (قازىرگى س.د. اسفەندياروۆ اتىنداعى قازاق ۇلتتىق مەديتسينالىق ۋنيۆەرسيتەت) بىتىرگەن. 1939-1987 جىلدارى – دارىگەر-دەرماتولوگ قىزمەتىن اتقارعان. ول – «الاش» قوزعالىسىنىڭ قايراتكەرلەرى ءاليحان بوكەيحانوۆ، احمەت بايتۇرسىنۇلى، مىرجاقىپ دۋلاتوۆ، جۇسىپبەك ايماۋىتوۆ، تاعى باسقالار تۋرالى دەرەكتەردى العاش جاريالاۋشى.
الماتىداعى ورتالىق مۇراجايعا، تورعايداعى، سەمەيدەگى، استاناداعى مۇراجايلارعا ساياسي قۋعىن-سۇرگىن قۇرباندارىنا قاتىستى ولاردىڭ جەكە زاتتارىن، كىتاپتار، سۋرەتتەر، حاتتار مەن قۇجاتتار، ت.ب. كوپتەگەن ەكسپوناتتار تاپسىرعان. باسپاسوزدە دۋلاتوۆانىڭ وچەركتەر مەن ەسسەلەرى 1988 جىلدان جاريالانا باستادى.
«سۆەت يستينى» («شىندىق شىراعى») كىتابى 1995 جىلى، 1999 جىلى ەكى تومدىعى جارىق كوردى. سونداي-اق، ول اكەسىنىڭ «ويان قازاق!» (الماتى، 1989) كىتابىن، 2 تومدىق شىعارمالار جيناعىن (الماتى، 1996, 1997), 5 تومدىق شىعارمالار جيناعىن (الماتى، 2004) قۇراستىرۋشىلارىنىڭ ءبىرى.
2013 جىلدىڭ 18 اقپانىندا 98 جاسقا قاراعان شاعىندا الاشتىڭ اياۋلى ۇلدارىنىڭ سوڭعى تۇياقتارىنىڭ ءبىرى گۇلنار ءمىرجاقىپقىزى دۋلاتوۆا اپامىز الماتى قالاسىندا ومىردەن ءوتتى.
