قازاقستان مۇسىلماندارى ءدىني باسقارماسى جانىنان «حالىق ارنا» رەسپۋبليكالىق تەلەارناسى اشىلادى، – دەپ حابارلايدى «ادىرنا» ۇلتتىق پورتالى قازاقپاراتقا سىلتەمە جاساپ.
«قازاقستان مۇسىلماندارى ءدىني باسقارماسىنىڭ قۇرىلعانىنا 30 جىل تولۋىنا وراي كوپتەگەن يگى شارا ۇيىمداستىرىلدى. پاندەميا كەزىندە ءمۇفتيات قايىرىمدىلىق باعىتتا بىرقاتار شارالار اتقاردى. سونىمەن قاتار كارانتين كەزىندە ونلاين ناسيحات جۇمىستارىنىڭ ماڭىزى ارتتى. دەگەنمەن اقپارات عاسىرىندا جاڭا تەحنولوگيانى يگەرىپ، ناسيحات جۇرگىزۋ مەن اقپارات تاراتۋدىڭ تەلەۆيزيالىق ءتاسىلىن وزىمىزدەن باسقارۋدى ۇيعاردىق. وسىعان وراي قمدب جانىنان رەسپۋبليكالىق «حالىق ارنا» اتتى ءتول تەلەارنامىزدى اشقالى وتىرمىز»،-دەلىنگەن ءدىني باسقارمانىڭ رەسمي اقپاراتىندا.
ەرتەڭ تەلەارنانىڭ اشىلۋىنا قمدب توراعاسى، باس ءمۇفتي ناۋرىزباي قاجى تاعانۇلى، ەلگە بەلگىلى قوعام قايراتكەرلەرى قاتىسپاق.
قازىرگى تاڭدا ارناعا قاجەتتى كونتەنتتى جيناقتاۋ جۇمىسى اياقتالدى. ءدىني باعىتتاعى باعدارلامالار، سۇحباتتار، سيۋجەتتەر مەن بەينە-روليكتەردىڭ باسىم بولىگى قمدب-نىڭ باس كەڭسەسىندە تۇسىرىلەدى. ارنانى «وتاۋ تۆ» مەن «الما تۆ» كابەلدىك جەلىلەرىنەن كورۋگە بولادى.
«ادىرنا» ۇلتتىق پورتالى
