بۇگىن، 29 قازان پاريج ۋاقىتىمەن ساعات تاڭعى 9 شاماسىندا فرانتسيانىڭ نيتستسا قالاسىندا 3 ادام پىشاقپەن قارۋلانعان قىلمىسكەردىڭ قولىنان قازا تاپتى، - دەپ حابارلايدى «ادىرنا» ۇلتتىق پورتالى ەuronews-كە سىلتەمە جاساپ.
فرانتسيانىڭ ۇلتتىق تەرروريزمگە قارسى پروكۋراتۋراسى نيتستسا قالاسىنىڭ نوتر-دام بازيليكاسىندا (حرام – رەد.) جاسالعان شابۋىلدى تەرگەۋدە. ءۇش ادام، ونىڭ ىشىندە ءبىر ايەل جانە شىركەۋدىڭ پونومارى پىشاقپەن قارۋلانعان ادامنىڭ قولىنان قۇربان بولعان. تەرروريزممەن جانە قىلمىستىق تەرروريستىك ۇيىممەن بايلانىستى كىسى ولتىرۋگە وقتالۋ تۋرالى ءىس اشىلعان.
نيتستسا شەگىندەگى ەڭ ۇلكەن ريم-كاتوليك شىركەۋى نوتر-دام بازيليكاسى جان-مەدسەن ايماعىندا ورنالاسقان. قايعىلى وقيعا بەيسەنبى كۇنى تاڭەرتەڭگى 9-دا بولعان. كۋاگەرلەردىڭ ايتۋىنشا، شابۋىلشى "اللاھۋ اكبار" دەپ ايقايلاعان. پوليتسيا وعان التى-جەتى رەت وق اتقان. فرانتسيانىڭ ىشكى ىستەر ءمينيسترى جەرالد دارمانەن قالادا پوليتسيا ءالى دە باقىلاۋ جۇمىستارىن جۇرگىزىپ جاتقانىن ايتتى.
نيتستسا مەرى كريستيان ەستروزي بۇل وقيعانى تەررورلىق شابۋىل دەپ سانايدى. بۇل تۋرالى ول ءوزىنىڭ تۆيتتەرىندە جازدى. سونداي-اق، اكىم كىسى ولتىرگەن كۇدىكتىنىڭ ۇستالعانىن حابارلادى. جەرگىلىكتى باق-تىڭ حابارلاۋىنشا، ونىڭ جاعدايى اۋىر جانە اۋرۋحاناعا جەتكىزىلگەن.
"نيتستسا، بۇكىل فرانتسيا سياقتى، ءتىپتى، فرانتسياداعى باسقا جەرلەرگە قاراعاندا، بۇگىن تىم اۋىر جاعدايعا تاپ بولدى، قايتادان يسلام ءفاشيزمىنىڭ قۇربانىنا اينالدى", - دەگەن كريستيان ەستروزي. – قىلمىسكەردىڭ وقيعا بولعان جەردە العاشقى مەديتسينالىق كومەك كورسەتكەن كەزدە دە "اللا ۇلى" ءسوزىن قايتالاۋدى توقتاتپاۋى كۇمان تۋدىرادى، - دەپ جالعاعان.
قالا بيلىگى نيتستساداعى بارلىق عيباداتحانالار جابىلىپ، بەينەباقىلاۋعا الىناتىنىن حابارلادى. فرانتسيا ءىىم-ندە داعدارىس شتابى قۇرىلعان. پرەزيدەنت ەممانۋەل ماكرون نيتستساعا كەتەر الدىندا ۇكىمەت مۇشەلەرىن شۇعىل جينالىسقا جيناعان.
پارلامەنت وتىرىسىندا دا جاعداي ارنايى تالقىلانعان.
"بۇل جاڭا شابۋىل، مەن جاعدايدى تولىق، ەگجەي-تەگجەيلى بىلمەگەندىكتەن، تولىق اقپارات بەرە المايمىن. بىراق، ءسوزسىز، بۇل ءبىزدىڭ ەلىمىز ءوتىپ جاتقان تاعى ءبىر ماڭىزدى سىناق", - دەگەن پرەمەر-مينيستر جان كاستەكس ءوز سوزىندە.
دەپۋتاتتار قازا بولعانداردى ءبىر مينۋت ۇنسىزدىكپەن ەسكە العان. پوليتسيا قازا بولعانداردىڭ ەكەۋى سول جەردە، ال ءۇشىنشىسى جان ساقتاماق بولىپ بارعان كورشى باردا قايتىس بولعانىن ايتادى. قۇرباندارىنىڭ ءبىرى – ايەل. قىلمىسكەر ونىڭ باسىن كەسىپ العان.
نيتستساداعى شابۋىلدان شامامەن ەكى ساعات وتكەن سوڭ ەلدىڭ وڭتۇستىك-شىعىسىنداعى اۆينوندا تاعى ءبىر بەيتانىس ادام پىشاقپەن «اللاح اكبار» دەپ ايقايلاپ، پوليتسيا قىزمەتكەرلەرىن قورقىتادى. ول ءتارتىپ ساقشىلارىنا شابۋىل جاساماق بولعاندا، پوليتسيا وعان وق اتقان. شابۋىل جاساعان ادام سول جەردە كوز جۇمادى.
كەيىنىرەك ساۋد ارابياسىندا دجيدداداعى فرانتسيا كونسۋلدىعىنىڭ كۇزەتشىسىنە شابۋىل جاسالعانى بەلگىلى بولدى. ديپلوماتيالىق وكىلدىكتىڭ قىزمەتكەرى جەڭىل جاراقاتتانعان. بۇل تۋرالى مەككە پروۆينتسياسىنىڭ پوليتسياسى حابارلاعان. شابۋىلشى ۇستالدى.
ەستەرىڭىزگە سالا كەتسەك، بەيسەنبى، 29 قازان مۇسىلماندار مۇحاممەد پايعامباردىڭ تۋعان كۇنى – ءماۋلىت مەرەكەسىن تويلايدى. ەكى اپتا بۇرىن فرانتسيانىڭ يل-دە-فرانس مەتروپوليتەنىندەگى كونفلان-سەنت-ونورين قالاسىندا تاريح جانە گەوگرافيا ءپانىنىڭ مۇعالىمى ءسوز بوستاندىعى ساباعىندا بالالارعا مۇحاممەد پايعامباردىڭ كاريكاتۋراسىن كورسەتكەنى ءۇشىن مۇسىلمان ازاماتتىڭ قولىنان قازا تاپقان بولاتىن.
فوتو اشىق دەرەككوزدەن الىندى
«ادىرنا» ۇلتتىق پورتالى
