پاۆلودار قالاسىنىڭ تۇرعىنى مارات ءسابيتوۆ ەڭ تومەنگى جالاقى 42 500 تەڭگە ءبىر اي ءومىر سۇرۋگە جەتەتىن-جەتپەيتىنىن تەكسەرىپ كورگەن. ازامات ەكسپەريمەنتىن اياقتاپ بولعان سوڭ "NewTimes.kz"-كە ناتيجەسى جايلى سۇحبات بەرگەن، - دەپ حابارلايدى «ادىرنا» ۇلتتىق پورتالى.
مارات ءسابيتوۆ 24 قىركۇيەك كۇنى ءوزىن سىناپ كورۋگە بەل بۋعان.
"مەن بۇل ماسەلەنى زەرتتەپ كوردىم. كۇنكورىس مينيمۋمىنىڭ 30 مىڭ تەڭگەدەن ءسال عانا اساتىنى تۋرالى وقىپ ءبىلدىم. سودان 42 500 تەك تاماق ءۇشىن عانا ەمەس ەكەنىن ءتۇسىنىپ، مەن مۇنى تەكسەرىپ كورۋدى شەشتىم. مەن بۇل يدەيادان باس تارتپاي سوڭىنا دەيىن جەتۋ ءۇشىن الەۋمەتتىك جەلى ارقىلى ءوز يدەيامدى جاريالادىم دا، وسى ەكسپەريمەنتتى باستاپ كەتتىم", — دەيدى ول.
مارات العاشقى كۇندەرى قيىندىققا تاپ بولعانىن دا ايتقان.
مارات بۇل ەكسپەريمەنتى جايلى: "ەڭ قيىنى، مەن بۇل ەكسپەريمەنتكە دايىن بولمادىم. ماسەلەن، ءوز ءمازىرىمدى جوسپارلاپ، ازىقتى ءينتۋيتيۆتى تۇردە ءبولدىم. بىردەن كوپ ەت ساتىپ الىپ قويىپپىن، ونى كوپ جەمەيتىندەي ەتىپ بولىكتەرگە ءبولدىم، جارمالار مەن كوكونىستەرگە كوبىرەك نازار اۋداردىم، ويتكەنى ولار ارزان بولدى. باسىندا اقشا جەتپەي قالا ما دەگەن ويمەن كوبىرەك ۇنەمدەدىم. كوپتەگەن ادامدار مەنىڭ ەكسپەريمەنتىمدى سىنعا العاندىقتان، قيىندىق تا بولماي قالمادى. ۇنەمى ۇنەمدەپ، جوسپارمەن جۇرگەندىكتەن جانە ارقاشان شەكتەۋلى رەجيمدە بولعاندىقتان باسىندا پسيحولوگيالىق قيىندىقتار كوپ بولدى. العاشىندا مەن جەتىسپەيتىن شىعار دەپ قورقىپ، تاماق جەي بەرمەدىم. اسىرەسە، 4-5 كۇننەن كەيىن اشۋشاڭ بولا باستادىم دا، 12 كۇننەن كەيىن ونىم باسىلدى، بىراق شارشاۋ سەزىمى پايدا بولدى",-دەپ ەسىنە الادى.
ول بارىنە قىزىق بولعان 42 500 تەڭگەنى تەك ازىق-تۇلىككە عانا جۇمساماي، تۇرمىستىق حيميا مەن جول ءجۇرۋ شىعىندارىن جابۋعا دا تىرىسقانىن ايتادى.
"مەن بۇل 42500 تەڭگەگە جۋىناتىن كەرەك-جاراقتاردى دا ساتىپ الدىم، كوممۋنالدىق قىزمەتتى، ترانسپورتتى دا قامتىدىم. تەك، كيىم مەن اياق كيىم ءۇشىن بۇل اقشا جەتپەيتىندىكتەن، مەن ولاردى ساتىپ المادىم. ال ەگەر مەن تۇراتىن ءۇيىمدى دە جالعا السام، باسىندا-اق ەكسپەريمەنت ساتسىزدىككە ۇشىرايتىن ەدى. ويتكەنى پاۆلوداردا ءبىر بولمەلى پاتەردى جالداۋ 42 500 تەڭگەدەن جوعارى. سول سەبەپتەن دە مەن مۇنى قاراستىرا المادىم. ال ەگەر ءومىر ءسۇرۋ عانا بولسا، وندا ءسىز امان قالا الاسىز. مىسالى، ارپا ساتىپ الىڭىز – بۇل ارزان تۇرادى جانە تويىمدى دا. تەك ءبىر-ەكى اي تەك سونى جەپ، قورەك ەتۋىڭىز كەرەك، بىراق ول دەنساۋلىعىڭىزعا دا زيانىن تيگىزبەي قويمايدى", - دەيدى مارات.
جاقىندا مارات ءوز ەكسپەريمەنتىن اياقتادى. ول 42 500 تەڭگەنىڭ سوڭعى تيىنىنا دەيىن جۇمساعان.
42 500 تەڭگەنىڭ 21 565 تەڭگەسى ازىق-تۇلىككە، قالعانى كوممۋنالدىق قىزمەتتەر مەن كولىك شىعىندارىن تولەۋگە كەتكەن.
ناتيجەسىندە ازامات 6,8 كگ سالماق تاستاعان.
"تاجىريبەمنىڭ ناتيجەسىنە كەلسەك، ماعان مەزگىلدىڭ كومەگى كوپ بولدى. ويتكەنى جىلۋ بولمادى، كوكونىستەر مەن جەمىستەر ارزان بولدى. ال قاراشا-جەلتوقسان ايلارىندا ونىمدەر مەن كوممۋنالدىق قىزمەتتەر بىرنەشە ەسە قىمباتتايدى. ول كەزدە مەن بۇل سومانى جەتكىزە المايتىنىم انىق. قازىر جۇمىرتقا 20-25% - عا قىمباتتادى. بۇل قىستا ءبارى ودان دا قىمبات بولاتىنىن بىلدىرەدى. ەگەر كولىك بولسا، وندا شىعىن دا ارتا تۇسەدى. اسىرەسە، سولتۇستىك ايماقتا شىعىن وتە كوپ. قورىتىندىلاي كەلە، جازدا بۇل اقشاعا ءبىر اي ءومىر سۇرۋگە بولادى دەپ ايتا الامىن. بىراق ء"ومىر ءسۇرۋ" مەن "كۇنەلتۋ" ۇعىمدارىن شاتاستىرماڭىز. ىلعي دا 42 500-دە ءومىر ءسۇرۋ مۇمكىن ەمەس", - دەپ مويىندايدى ول.
مارات ەكسپەريمەنتكە جالعىز قاتىسقان. ونىڭ ايتۋىنشا، بۇل ەسەپ وتباسىنا قاراستىرىلماعان. ول بالالى قازاقستاندىقتار 42 500 تەڭگەنى قالاي جەتكىزىپ، ءومىر سۇرەتىنىنە تاڭقالعان.
مارات ءسابيتوۆ تەك 42 500 تەڭگەمەن وتباسىن اسىراپ وتىرعان جاندار بار ەكەندىگىن دە ايتىپ، ولارعا جانى اشيتىنىن دا جەتكىزدى.
«ادىرنا» ۇلتتىق پورتالى
دايىنداعان جازيرا تەمىربەك
