Pavlodar qalasynyń turǵyny Marat SÁBITOV eń tómengi jalaqy 42 500 teńge bir aı ómir súrýge jetetin-jetpeıtinin tekserip kórgen. Azamat eksperımentin aıaqtap bolǵan soń "NewTimes.kz"-ke nátıjesi jaıly suhbat bergen, - dep habarlaıdy «Adyrna» ulttyq portaly.
Marat Sábıtov 24 qyrkúıek kúni ózin synap kórýge bel býǵan.
"Men bul máseleni zerttep kórdim. Kúnkóris mınımýmynyń 30 myń teńgeden sál ǵana asatyny týraly oqyp bildim. Sodan 42 500 tek tamaq úshin ǵana emes ekenin túsinip, men muny tekserip kórýdi sheshtim. Men bul ıdeıadan bas tartpaı sońyna deıin jetý úshin áleýmettik jeli arqyly óz ıdeıamdy jarııaladym da, osy eksperımentti bastap kettim", — deıdi ol.
Marat alǵashqy kúnderi qıyndyqqa tap bolǵanyn da aıtqan.
Marat bul eksperımenti jaıly: "Eń qıyny, men bul eksperımentke daıyn bolmadym. Máselen, óz mázirimdi josparlap, azyqty ıntýıtıvti túrde bóldim. Birden kóp et satyp alyp qoıyppyn, ony kóp jemeıtindeı etip bólikterge bóldim, jarmalar men kókónisterge kóbirek nazar aýdardym, óıtkeni olar arzan boldy. Basynda aqsha jetpeı qala ma degen oımen kóbirek únemdedim. Kóptegen adamdar meniń eksperımentimdi synǵa alǵandyqtan, qıyndyq ta bolmaı qalmady. Únemi únemdep, josparmen júrgendikten jáne árqashan shekteýli rejımde bolǵandyqtan basynda psıhologııalyq qıyndyqtar kóp boldy. Alǵashynda men jetispeıtin shyǵar dep qorqyp, tamaq jeı bermedim. Ásirese, 4-5 kúnnen keıin ashýshań bola bastadym da, 12 kúnnen keıin onym basyldy, biraq sharshaý sezimi paıda boldy",-dep esine alady.
Ol bárine qyzyq bolǵan 42 500 teńgeni tek azyq-túlikke ǵana jumsamaı, turmystyq hımııa men jol júrý shyǵyndaryn jabýǵa da tyrysqanyn aıtady.
"Men bul 42500 teńgege jýynatyn kerek-jaraqtardy da satyp aldym, kommýnaldyq qyzmetti, transportty da qamtydym. Tek, kıim men aıaq kıim úshin bul aqsha jetpeıtindikten, men olardy satyp almadym. Al eger men turatyn úıimdi de jalǵa alsam, basynda-aq eksperıment sátsizdikke ushyraıtyn edi. Óıtkeni Pavlodarda bir bólmeli páterdi jaldaý 42 500 teńgeden joǵary. Sol sebepten de men muny qarastyra almadym. Al eger ómir súrý ǵana bolsa, onda siz aman qala alasyz. Mysaly, arpa satyp alyńyz – bul arzan turady jáne toıymdy da. Tek bir-eki aı tek sony jep, qorek etýińiz kerek, biraq ol densaýlyǵyńyzǵa da zııanyn tıgizbeı qoımaıdy", - deıdi Marat.
Jaqynda Marat óz eksperımentin aıaqtady. Ol 42 500 teńgeniń sońǵy tıynyna deıin jumsaǵan.
42 500 teńgeniń 21 565 teńgesi azyq-túlikke, qalǵany kommýnaldyq qyzmetter men kólik shyǵyndaryn tóleýge ketken.
Nátıjesinde azamat 6,8 kg salmaq tastaǵan.
"Tájirıbemniń nátıjesine kelsek, maǵan mezgildiń kómegi kóp boldy. Óıtkeni jylý bolmady, kókónister men jemister arzan boldy. Al qarasha-jeltoqsan aılarynda ónimder men kommýnaldyq qyzmetter birneshe ese qymbattaıdy. Ol kezde men bul somany jetkize almaıtynym anyq. Qazir jumyrtqa 20-25% - ǵa qymbattady. Bul qysta bári odan da qymbat bolatynyn bildiredi. Eger kólik bolsa, onda shyǵyn da arta túsedi. Ásirese, soltústik aımaqta shyǵyn óte kóp. Qorytyndylaı kele, jazda bul aqshaǵa bir aı ómir súrýge bolady dep aıta alamyn. Biraq "ómir súrý" men "kúneltý" uǵymdaryn shatastyrmańyz. Ylǵı da 42 500-de ómir súrý múmkin emes", - dep moıyndaıdy ol.
Marat eksperımentke jalǵyz qatysqan. Onyń aıtýynsha, bul esep otbasyna qarastyrylmaǵan. Ol balaly qazaqstandyqtar 42 500 teńgeni qalaı jetkizip, ómir súretinine tańqalǵan.
Marat Sábıtov tek 42 500 teńgemen otbasyn asyrap otyrǵan jandar bar ekendigin de aıtyp, olarǵa jany ashıtynyn da jetkizdi.
«Adyrna» ulttyq portaly
Daıyndaǵan Jazıra TEMIRBEK
