كەز كەلگەن ءتىلدىڭ ەرتەڭى – بالانىڭ تىلىندە

1918
Adyrna.kz Telegram

قر اقپارات جانە قوعامدىق دامۋ ءمينيسترى ايدا بالاەۆا قوعامدىق سانانى جاڭعىرتۋ بويىنشا ۇلتتىق كوميسسيا وتىرىسىندا انا ءتىلىنىڭ احۋالىنا قاتىستى جۇمىستى الەمگە تانىمال تەلەارنالار مەن كىتاپ بەتتەرىندەگى بالا كونتەنتىنەن باستاۋ كەرەك دەگەن ۇسىنىس بارىن ايتتى، دەپ حابارلايدى "ادىرنا" ۇلتتىق پورتالى BAQ.KZ-كە سىلتەمە جاساپ.

«رۋحاني قۇندىلىقتار قاتارىندا انا ءتىلىمىزدىڭ احۋالى الدىڭعى قاتاردا تۇراتىنى بەلگىلى». بۇل مەملەكەت باسشىسىنىڭ حالىققا جولداۋىندا ايتقان «قازاق ءتىلىنىڭ مەملەكەتتىك ءتىل رەتىندەگى ءرولى كۇشەيىپ، ۇلتارالىق قاتىناس تىلىنە اينالاتىن كەزەڭى الىس ەمەس» دەگەن قاعيداسىمەن تىكەلەي ۇندەس. ال كەز كەلگەن ءتىلدىڭ ەرتەڭى – بالانىڭ تىلىندە. سوندىقتان دا، بۇل جۇمىستى الەمگە تانىمال تەلەارنالار مەن كىتاپ بەتتەرىندەگى بالا كونتەنتىنەن باستاۋ كەرەك دەگەن ۇسىنىس بار. ناقتى ايتساق، «Nickelodeon»، «Disney»، «TiJi» تەلەارنالارىنىڭ مۋلتيپليكاتسيالىق فيلمدەرىن قازاق تىلىنە اۋدارۋ بويىنشا جوبا دايىندالىپ، ۇكىمەت قاراۋىنا ۇسىنىلعان بولاتىن. قازىرگى تاڭدا بىرجاقتى شەشىم كۇتىپ وتىرمىز، - دەدى ول.

بۇدان بولەك، ول مينيسترلىكتىڭ باستاماسىمەن ى.التىنسارين اتىنداعى ۇلتتىق ءبىلىم اكادەمياسىنىڭ قاتىسۋىمەن بالالار ادەبيەتىنىڭ 20 الەمدىك بەستسەللەرلەرىنىڭ ءتىزىمى جاسالىپ، ىشكى قارجىلىق مۇمكىندىكتەردى قاراستىرا وتىرىپ، اۋدارمانىڭ اۋديو ەلەكتروندىق نۇسقاسىن جاساۋ تۋرالى شەشىم قابىلدانعانىن جەتكىزدى.

بۇل جۇمىستاردىڭ بارلىعى – ەل ىشىندە، اسىرەسە، بالالار مەن جاستار اراسىندا رۋحاني-ادامگەرشىلىك تاربيە جۇيەسىن جۇزەگە اسىرۋدىڭ ءبىرتۇتاس جول كارتاسىن قالىپتاستىرىپ، بىرنەشە مۇددەلى مەملەكەتتىك ورگانداردىڭ اتسالىسۋىمەن ىسكە اسىرۋدى كوزدەيدى. ءوز كەزەگىدە اقپارات جانە قوعامدىق دامۋ مينيسترلىگى بۇل جۇمىستىڭ نەگىزگى ۇيلەستىرۋشىسى قىزمەتىن ءوز موينىنا الۋعا دايار، - دەدى ول.

پىكىرلەر