م.س. نارىكباەۆ اتىنداعى KAZGUU ۋنيۆەرسيتەتى باسقارما توراعاسىنىڭ ورىنباسارى ەربولات مۇحامەدجاننىڭ ايتىنشا: «ءبىز ۇكىمەتتەن تالاپ ەتكەن كەزدە ماتەريالدىق جاعدايدى باستى نازارعا قويامىز. كيىم، تاماق، ءۇي تالاپ ەتەمىز. نەگە ساپالى ءبىلىم بەر دەپ سۇراماسقا؟ مەكتەپتەر مەن ۋنيۆەرسيتەتتەر ساپالى ءبىلىم بەرمەيدى دەگەن تالاپپەن ميتينگكە شىققان ادامدى كوردىڭىز بە؟ لايىقتى ءبىلىم بەرە الماساڭ، ساپالى ءبىلىم الۋدىڭ جولىن كورسەت دەپ تە ەشكىم ايتپايدى. جالپى حالىق ەمەس، بەلگىلى ءبىر قوعام وكىلدەرى عانا بۇل ماسەلەنى كوتەرىپ ءجۇر». بۇل پىكىرىن ول قازاقستان ۇلتتىق ارناسىنىڭ ەفيرىندە وتكەن «اشىق الاڭ» باعدارلاماسىندا ايتقان بولاتىن.
مەملەكەت باسشىسى قاسىم-جومارت توقاەۆتىڭ ۇلتتىق قوعامدىق سەنىم كەڭەسىنىڭ ءۇشىنشى وتىرىسىندا ءبىلىم بەرۋ سالاسىن دامىتۋعا ەرەكشە توقتالعانى بەلگىلى. ەكونوميكا بىلىمگە تاۋەلدى بولعان سوڭ، بۇل سالانى تۇبەگەيلى رەفورمالاۋ كەرەك دەدى. وسىعان وراي، 2025 جىلعا دەيىن ءبىلىم سالاسىنا بولىنەتىن قاراجات 6 ەسە، عىلىمعا بولىنەتىن قارجى 7 ەسە وسەتىن بولدى.
تىكەلەي ەفير بارىسىندا ەربولات مۇحامەدجان ءبىلىم جانە عىلىم مينيسترلىگى وتە جاقسى شەشىم شىعارعانىن دا ايتىپ ءوتتى.
«الەۋمەتكە پروبلەما شىققان سوڭ، حالىق مۇنى ءبىلۋى كەرەك. گرانتتى بۇرىن ۋنيۆەرسيتتكە بەرەتىن. ۋنيۆەرسيتەتتەر سوعان جابىسىپ وتىراتىن. قازىر گرانتتى ستۋدەنتكە بەردى. ستۋدەنت تۇسكەن ۋنيۆەرسيتەتىنە كوڭىلى تولماسا، باسقا رەيتينگى جوعارى وقۋ ورنىنا اۋىسىپ كەتە الادى. وسىنداي دۇرىس وزگەرىستەر وسىدان 15 جىل بۇرىن جاسالۋى كەرەك ەدى»،- دەيدى ەربولات مۇحامەدجان.
م.س. نارىكباەۆ اتىنداعى KAZGUU ۋنيۆەرسيتەتى ءباسپاسوز قىزمەتى
