وڭتۇستىك كورەيادا «قىز جىبەك» ميۋزيكلى ونلاين كورسەتىلدى، دەپ حابارلايدى «ادىرنا» ۇلتتىق پورتالى «حابار 24» ارناسىنا سىلتەمە جاساپ.
«قىز جىبەكتىڭ» كورسەتىلىمى تەگۋ قالاسىنداعى حالىقارالىق ميۋزيكلدەر فەستيۆالى اياسىندا وتكەن. كوروناۆيرۋس پاندەمياسىنا بايلانىستى شەتەل تەاترلارىنىڭ ارتىستەرى بۇل جولى كورەياعا كەلگەن جوق. 9 شەتەل تۋىندىسىن فەستيۆالدىڭ ينتەرنەت-ارناسىندا كورسەتتى. ال كورەيالىق 9 ميۋزيكل ساحنادا قويىلدى. الايدا زالداعى ورىنداردىڭ تەك جارتىسىنا وتىرۋعا رۇقسات ەتىلىپ، الەۋمەتتىك اراقاشىقتىق ساقتالعان. جاستار تەاترى وسىدان ەكى جىل بۇرىن تەگۋ قالاسىندا وسى قويىلىمىن كورسەتكەن بولاتىن. كورەرمەندەرگە بۇل ميۋزيكل وتە ۇناپ، ۇيىمداستىرۋشىلار ونى تاعى دا كورسەتۋدى شەشكەن.
«ماعان «قىز جىبەك» ميۋزيكلى وتە ۇنادى. قازاقستان مەن وڭتۇستىك كورەيا حالىقتارىنىڭ جان تولعانىسى ۇقساس دەپ ويلايمىن. كەيىپكەرلەر اراسىنداعى ماحاببات سەزىمىن جاقسى كورسەتتى. قاسىرەتپەن اياقتالعان وقيعانى كورەرمەندەرگە شەبەر جەتكىزە الدى. قويىلىمنىڭ جەلىسى كورەيالىقتارعا ۇنايدى»،- دەيدى تەگۋ قالاسى حالىقارالىق ميۋزيكلدەر فەستيۆالىنىڭ اتقارۋشى ديرەكتورى پە سونگ حيوك.
ايتا كەتەيىك، «جاستار» تەاترىنىڭ قويىلىمىن ەكى كۇن بويى كورەيا تىلىندەگى سۋبتيترلەرمەن كورۋگە مۇمكىندىك بولعان.
«ادىرنا» ۇلتتىق پورتالى
