Ońtústik Koreıada «Qyz Jibek» mıýzıkli onlaın kórsetildi, dep habarlaıdy «Adyrna» ulttyq portaly «Habar 24» arnasyna silteme jasap.
«Qyz Jibektiń» kórsetilimi Tegý qalasyndaǵy halyqaralyq mıýzıklder festıvali aıasynda ótken. Koronavırýs pandemııasyna baılanysty shetel teatrlarynyń ártisteri bul joly Koreıaǵa kelgen joq. 9 shetel týyndysyn festıvaldiń ınternet-arnasynda kórsetti. Al koreıalyq 9 mıýzıkl sahnada qoıyldy. Alaıda zaldaǵy oryndardyń tek jartysyna otyrýǵa ruqsat etilip, áleýmettik araqashyqtyq saqtalǵan. Jastar teatry osydan eki jyl buryn Tegý qalasynda osy qoıylymyn kórsetken bolatyn. Kórermenderge bul mıýzıkl óte unap, uıymdastyrýshylar ony taǵy da kórsetýdi sheshken.
«Maǵan «Qyz Jibek» mıýzıkli óte unady. Qazaqstan men Ońtústik Koreıa halyqtarynyń jan tolǵanysy uqsas dep oılaımyn. Keıipkerler arasyndaǵy mahabbat sezimin jaqsy kórsetti. Qasiretpen aıaqtalǵan oqıǵany kórermenderge sheber jetkize aldy. Qoıylymnyń jelisi koreıalyqtarǵa unaıdy»,- deıdi Tegý qalasy halyqaralyq mıýzıklder festıvaliniń atqarýshy dırektory Pe Song Hıok.
Aıta keteıik, «Jastar» teatrynyń qoıylymyn eki kún boıy Koreıa tilindegi sýbtıtrlermen kórýge múmkindik bolǵan.
«Adyrna» ulttyq portaly
