8 ايدىڭ قورىتىندىسى بويىنشا، ەلىمىزدە جۇمىرتقا ءوندىرۋدىڭ كولەمى 8%-عا ازايىپ، ال باعاسى 30% قىمباتتادى. بۇل تۋرالى ەلوردادا «اگروونەركاسىپتىك كەشەندى دامىتۋ جاڭا باعدارلامانىڭ تۇجىرىمداماسى» تاقىرىبىندا وتكەن دوڭگەلەك ۇستەل بارىسىندا قر جۇمىرتقا وندىرۋشىلەر قاۋىمداستىعىنىڭ باسشىسى ماكسيم بوجكو ايتتى، دەپ حابارلايدى "ادىرنا" ءتىلشىسى قازاقپارت -قا سىلتەمە جاساپ.
«اگروونەركاسىپتىك كەشەنگە قاتىستى مەملەكەتتىڭ نەگىزگى مىندەتى – اۋىلداعى ادامداردى جۇمىسپەن قامتۋ، ەلىمىزدىڭ تۇرعىندارىن ازىق-تۇلىكپەن قولجەتىمدى باعادا قامتاماسىز ەتۋ. وسى جەردە بيزنەسكە قاتىستى قاراما-قايشىلىق تۋىندايدى، سەبەبى بيزنەستىڭ ماقساتى – تابىس تابۋ. ەگەر تابىس بولسا – كاسىپكەر اقشا سالىپ، دامىتۋعا دايىن. ال تابىس بولماسا، ادامدار جۇمىسىنان ايىرىلسا، مەملەكەتكە سالىق تۇسپەيدى. سوندىقتان اۋىل شارۋاشىلىعىنا قاتىستى بيزنەس تابىستى بولۋى كەرەك»، - دەيدى قر جۇمىرتقا وندىرۋشىلەر قاۋىمداستىعىنىڭ باسشىسى ماكسيم بوجكو.
ول بيزنەسكە قاتىستى تابىستى قالاي ەسەلەۋگە بولاتىنىن ايتتى.
«ەڭ الدىمەن شىعىن مولشەرىن ازايتۋ كەرەك. ءونىمنىڭ ساپاسىن تومەندەتۋ ارقىلى شىعىن مولشەرىن دە ازايتۋعا بولادى، بىراق ءبىز بۇل نۇسقانى قاراستىرمايمىز. جاڭا تەحنولوگيالار ەنگىزۋ ارقىلى دا تابىستى كوبەيتۋگە بولادى. ءبىز وسى باعىتتى قولدايمىز. مۇنى ينۆەستيتسيالىق سۋبسيديا بەرۋ ارقىلى جۇزەگە اسىرۋعا بولادى. سونداي-اق، ءونىم باعاسىن قىمباتتاتۋ ارقىلى دا تابىستى ەسەلەۋگە بولادى. بۇل جەردە دە مەملەكەت پەن بيزنەس اراسىندا قاراما-قايشىلىق تۋىندايدى. مەملەكەت ازىق-تۇلىك باعاسىنىڭ قولجەتىمدى بولعانىن، ال بيزنەس وكىلدەرى قىمبات بولعانىن قالايدى»، - دەيدى ول.
ونىڭ ءسوزىنt قاراعاندا، وتكەن جىلى ۇكىمەت قازاقستاندا جۇمىرتقا جەتكىلىكتى دەڭگەيدە، ءتىپتى قاجەتتى مولشەردەن كوپ وندىرىلەتىنىن، سول سەبەپتى قۇس فابريكالارىنا سۋبسيديا تولەۋدى توقتاتۋعا بولاتىنىن ايتقان.
«ءبىز جىلدىڭ باسىندا سۋبسيديانىڭ توقتاتىلۋى ءوندىرىستىڭ ازايۋىنا جانە باعانىڭ وسۋىنە ىقپال ەتەدى دەپ ايتقان بولاتىنبىز. بۇل بيلىك پەن حالىقتىڭ كوڭىلىنەن شىقپاسى انىق. بىراق ءىس جۇزىندە راسىمەن سولاي بولعانىن كورىپ وتىرمىز. 8 ايدىڭ قورىتىندىسى بويىنشا، ەلىمىزدە جۇمىرتقا ءوندىرۋدىڭ كولەمى 8%-عا ازايىپ، ال جۇمىرتقانىڭ باعاسى 30% قىمباتتادى. نە سەبەپتى بيزنەس جۇمىرتقانى بۇرىنعى كولەمدە وندىرە بەرمەدى؟ ويتكەنى سوڭعى ەكى جىلدا بيزنەستىڭ تابىس دەڭگەيى نولدەن تومەن ءتۇسىپ كەتتى. ول تەك مەملەكەت بولگەن سۋبسيديا ەسەبىنەن جۇمىس ىستەپ تۇرعان. اۋىل شارۋاشىلىعى مينيسترلىگى سۋبسيديانى ەكى ەسە قىسقارتىپ تاستادى. ودان بولەك قۇس تۇماۋى ەپيدەمياسى بولدى. وسى ورايدا ءبىز مەملەكەتتەن قولداۋ كۇتەمىز، سەبەبى قۇستار سانى مەن ءوندىرىس كولەمىن قالپىنا كەلتىرۋىمىز كەرەك»، - دەيدى قر جۇمىرتقا وندىرۋشىلەر قاۋىمداستىعىنىڭ باسشىسى ماكسيم بوجكو.
"ادىرنا" ۇلتتىق پورتالى
