8 aıdyń qorytyndysy boıynsha, elimizde jumyrtqa óndirýdiń kólemi 8%-ǵa azaıyp, al baǵasy 30% qymbattady. Bul týraly elordada «Agroónerkásiptik keshendi damytý jańa baǵdarlamanyń tujyrymdamasy» taqyrybynda ótken dóńgelek ústel barysynda QR Jumyrtqa óndirýshiler qaýymdastyǵynyń basshysy Maksım Bojko aıtty, dep habarlaıdy "Adyrna" tilshisi QazAqpart -qa silteme jasap.
«Agroónerkásiptik keshenge qatysty memlekettiń negizgi mindeti – aýyldaǵy adamdardy jumyspen qamtý, elimizdiń turǵyndaryn azyq-túlikpen qoljetimdi baǵada qamtamasyz etý. Osy jerde bızneske qatysty qarama-qaıshylyq týyndaıdy, sebebi bıznestiń maqsaty – tabys tabý. Eger tabys bolsa – kásipker aqsha salyp, damytýǵa daıyn. Al tabys bolmasa, adamdar jumysynan aıyrylsa, memleketke salyq túspeıdi. Sondyqtan aýyl sharýashylyǵyna qatysty bıznes tabysty bolýy kerek», - deıdi QR Jumyrtqa óndirýshiler qaýymdastyǵynyń basshysy Maksım Bojko.
Ol bızneske qatysty tabysty qalaı eseleýge bolatynyn aıtty.
«Eń aldymen shyǵyn mólsherin azaıtý kerek. Ónimniń sapasyn tómendetý arqyly shyǵyn mólsherin de azaıtýǵa bolady, biraq biz bul nusqany qarastyrmaımyz. Jańa tehnologııalar engizý arqyly da tabysty kóbeıtýge bolady. Biz osy baǵytty qoldaımyz. Muny ınvestıııalyq sýbsıdııa berý arqyly júzege asyrýǵa bolady. Sondaı-aq, ónim baǵasyn qymbattatý arqyly da tabysty eseleýge bolady. Bul jerde de memleket pen bıznes arasynda qarama-qaıshylyq týyndaıdy. Memleket azyq-túlik baǵasynyń qoljetimdi bolǵanyn, al bıznes ókilderi qymbat bolǵanyn qalaıdy», - deıdi ol.
Onyń sózint qaraǵanda, ótken jyly Úkimet Qazaqstanda jumyrtqa jetkilikti deńgeıde, tipti qajetti mólsherden kóp óndiriletinin, sol sebepti qus fabrıkalaryna sýbsıdııa tóleýdi toqtatýǵa bolatynyn aıtqan.
«Biz jyldyń basynda sýbsıdııanyń toqtatylýy óndiristiń azaıýyna jáne baǵanyń ósýine yqpal etedi dep aıtqan bolatynbyz. Bul bılik pen halyqtyń kóńilinen shyqpasy anyq. Biraq is júzinde rasymen solaı bolǵanyn kórip otyrmyz. 8 aıdyń qorytyndysy boıynsha, elimizde jumyrtqa óndirýdiń kólemi 8%-ǵa azaıyp, al jumyrtqanyń baǵasy 30% qymbattady. Ne sebepti bıznes jumyrtqany burynǵy kólemde óndire bermedi? Óıtkeni sońǵy eki jylda bıznestiń tabys deńgeıi nólden tómen túsip ketti. Ol tek memleket bólgen sýbsıdııa esebinen jumys istep turǵan. Aýyl sharýashylyǵy mınıstrligi sýbsıdııany eki ese qysqartyp tastady. Odan bólek qus tumaýy epıdemııasy boldy. Osy oraıda biz memleketten qoldaý kútemiz, sebebi qustar sany men óndiris kólemin qalpyna keltirýimiz kerek», - deıdi QR Jumyrtqa óndirýshiler qaýymdastyǵynyń basshysy Maksım Bojko.
"Adyrna" ulttyq portaly
