بەلارۋس وپپوزيتسياسىنىڭ جەتەكشىسى سۆەتلانا تيحانوۆسكايا الەكساندر لۋكاشەنكونى بيلىكتەن كەتىرۋگە باعىتتالعان جالپىۇلتتىق ەرەۋىل “ەندى عانا باستالدى جانە بارعان سايىن اۋقىمى كەڭەيە بەرەدى” دەپ مالىمدەدى. 26 قازاندا ەلدە مىڭداعان جۇمىسشى، ستۋدەنت، زەينەتكەر وپپوزيتسيا شەرۋىن قولداپ، كوشەگە شىققان دەپ حابارلايدى «ادىرنا» ۇلتتىق پورتالى ازاتتىققا سىلتەمە جاساپ.
“بۇگىن باتىلدىق تانىتىپ، ەرەۋىلگە شىققان ءاربىر بەلورۋسپەن ماقتانامىن” دەدى تيحانوۆسكايا ازات ەۋروپا/ازاتتىق تىلشىسىنە. ول ەلدەگى بارلىق ادام كوشەدەگى نارازىلىققا قوسىلۋى ءتيىس دەدى.
“جالپىۇلتتىق ەرەۋىلگە قوسىل. بۇل رەجيمدى قۇلاتۋدىڭ جالعىز جولى جانە بەلورۋس حالقى، ءبارىمىز، بىرىگىپ، جاڭا ءارى ەركىن، قاۋىپسىز مەملەكەت قۇرامىز” دەدى كورشى ليتۆادان بەلارۋستەگى جاقتاستارىنا Zoom ارقىلى شىققان وپپوزيتسيا جەتەكشىسى. ول 9 تامىزدا وتكەن پرەزيدەنت سايلاۋىنان كەيىن بيلىك قىسىمىمەن كورشى مەملەكەتكە كەتۋگە ءماجبۇر بولعان.
ول "ەرەۋىل ءساتسىز باستالدى" دەگەن رەجيم جاقتاستارىنىڭ ءسوزىن ەلەمەي، بەلورۋس حالقىن قۇقىقتارىن تالاپ ەتۋگە شاقىردى.
وسىعان دەيىن تيحانوۆسكايا الەكساندر لۋكاشەنكوعا ۋلتيماتۋم قويىپ، 26 قازانعا دەيىن بيلىكتەن باس تارتىپ، ساسياي تۇتقىنداردى بوساتۋدى تالاپ ەتكەن. بيلىك تالاپتاردى ورىنداماسا، ەلدە جالپىۇلتتىق ەرەۋىل باستالىپ، جولدار جابىلادى، مەملەكەتتىك كاسىپورىن ونىمدەرىنە بويكوت جاريالاناتىنى ايتىلعان ەدى.
25 قازان جارىم تۇنگە دەيىن بيلىكتەن كەتۋى ءتيىس دەگەن وپپوزيتسيا تالابىن قابىلداۋدىڭ ورنىنا لۋكاشەنكو 26 قازاندا نارازىلاردى باقىلايتىن ارنايى جاساق سانىن كوبەيتتى. "ۆەسنا" قۇقىق قورعاۋ توبىنىڭ مالىمەتىنشە، دۇيسەنبى كۇنى مينسك، گرودنو، برەست، ليدا جانە وزگە قالالاردا 300-دەن استام ادام ۇستالعان.
