تۇركيالىق حۋسەين زەرراكي شەيىتتەر مەن شەريفتەر مادەني اسسوتسياتسياسىنىڭ پرەزيدەنتى ون مىڭداي شەيىتتىڭ جالعان اتپەن جۇرگەنىن ايتىپ، ولاردان ساق بولۋعا شاقىردى دەپ جازادى «ادىرنا» ۇلتتىق پورتالى تۇرىكتىڭ Sözçü گازەتىنە سىلتەمە جاساپ. تۇركيادا سوڭعى ۋاقىتتا 3-5 مىڭ دوللارعا «شەيىت» ەكەنىن دالەلدەيتىن قۇجات جاساتۋشىلار كوبەيگەن.
بۇل قۇجاتتى جاساۋداعى ماقسات مۇحاممەد پايعامباردىڭ ۇرپاعى ەكەنىن دالەلدەۋ ەكەن. حۋسسەين زەرراكي «پايعامباردىڭ تۇقىمىنانمىن، پايعامباردىڭ ۇرپاعىمىن» دەيتىن جالعان قۇجات جاساۋشىلاردىڭ ساڭىراۋقۇلاقتاي قاپتاپ بارا جاتقانىنا الاڭداۋلى. مۇحاممەد پايعامباردىڭ ۇرپاعى دەگەن تيتۋلدى الۋ اسا قيىن ەمەس كورىنەدى. بار بولعانى بەس مىڭداي اقش دوللارىڭىز بولسا، جەتكىلىكتى. جالعان قۇجاتتى جاساۋشىلار قالاۋىڭىزداعىداي ەتىپ، «شەيىت.مۇحاممەد پايعامباردىڭ ۇرپاعى» دەگەن ءمورى باسىلعان قۇجاتتى قولىڭىزعا ۇستاتادى. ال وسىنداي قۇجاتتىڭ اناعۇرلىم قۇزىرى بارىن مىسىر جاقتا 50 مىڭ اقش دوللارىنا جاساتىپ جاتىر ەكەن تالاي جۇرت. الگى قۇجاتتا شەجىرەڭىزدى شيىرلاتا وتىرىپ، ءتۇبىن اپارىپ مۇحاممەد پايعامبارعا تىرەپ كورسەتەدى. ياعني، ونداي قۇجاتى بار ادام باسقالارعا قاراعاندا، «شىنايى مۇسىلمان، شىنايى يسلام ءدىنىنىڭ وكىلى» سانالادى مىس.
مىنە، وسىعان بايلانىستى حۋسسەين زەرراكي «جالعان شەيىتتەردەن» ساق بولۋعا، ولاردىڭ قولدارىنداعى جاساندى قۇجاتقا سەنبەۋگە شاقىرادى. شىنايى شەيىتتەردىڭ قۇجاتتارى ستامبۋلداعى مەشىتتەردىڭ ارنايى مۇراعاتىندا ساقتاۋلى ەكەنىن ايتقان زەرراكي جۇرتتى الداماۋعا شاقىرۋدا.
كەز كەلگەن يسلام ءدىنىنىڭ وكىلى ەڭ اۋەلى اللانىڭ قۇلى، مۇحاممەد پايعامباردىڭ ۇمبەتى ەكەنىن راستايدى جانە وسىنى ماقتان تۇتادى. پايعامباردىڭ ءجۇرىپ وتكەن جولىن ءوز ومىرىندە ۇستانۋدى بەرىك ماقساتى ەتەتىن مۇسىلماندار ءۇشىن ارينە، «مۇحاممەد پايعامباردىڭ ۇرپاعىمىن» دەۋ ءتىپتى، زور ماقتانىش قوي. تۇركياداعى وسى ءبىر اقپاراتقا بايلانىستى قازاقستانداعى بىرەر ازاماتتى سوزگە تارتىپ كوردىك. «مۇحاممەد پايعامباردىڭ ۇرپاعىمىن» دەگەن قۇجاتقا بايلانىستى بىزبەن تىلدەسكەن كىسىلەردىڭ كەيبىرى بەيحابار بولىپ شىقتى. دەسەك تە، سونداي قۇجاتقا يە بولعىسى كەلەتىندەر دە جوق ەمەس ەكەن.
«ارينە، مەنىڭ دە قانىمدى تەكسەرىپ، قۇرامىنان مۇحاممەد (ع.س) پايعامبارىمىزدىڭ ۇرپاعى ەكەنىمە دالەل ءبىر ءتۇيىر قان تابىلسا، قۋانىشتان جۇرەگىم جارىلار ەدى. ءوزىمنىڭ شىنايى مۇسىلمان ەكەنىمە قازىرگىدەن دە ارتىق ماقتانا تۇسەر ەدىم. پايعامباردىڭ ۇرپاعى بولۋى ەڭ جوعارعى مارتەبە مەن ءۇشىن»، -دەيدى سوڭعى بەس جىلىن ءدىن جولىنا بۇرعان ءزۇبايرا اقىلجان. ءزۇبايرانىڭ جولداسى ابۋباكىر دە الگىندەي قۇجات تۋرالى ەستىگەندە، كادىمگىدەي ەلەڭدەپ قالدى. «شىركىن، بىزگە دە سونداي قۇجاتقا قول جەتكىزۋدى اللام ءناسىپ ەتسە ەكەن. ءۇيىمدى ساتسام دا، الار ەدىم. قازاقستاندا يسلام ءدىنىن ۇستانۋشىلارعا كىر جاعىپ، جولدارىن كەسەتىندەر كوبەيدى. مەنىڭشە، ءاربىر مۇسىلماننىڭ قالتاسىندا الگىندەي قۇجاتى بولۋعا ءتيىس. جانە سونداي قۇجاتى بار مۇسىلمانعا باسقالار قارسى شىقپاۋى كەرەك. ەڭ بولماسا، ۇلىق پايعامبارىمىزدىڭ ۇرپاعىنا قۇرمەت ءۇشىن»، -دەيدى ابۋباكىر.
ال ءدال وسى ماسەلەگە بايلانىستى بىزگە پىكىرىن بىلدىرگەن ساپارقۇل اۋەلبەكوۆ: «ماسەلە الدەبىر قۇجاتتا ەمەس. شىن مۇسىلمان ءبىر جاپىراق قۇجاتپەن ولشەنبەيدى. جۇرەكپەن، جۇرەكتىڭ تازالىعىمەن ولشەنەدى. بولمايتىن ءبىر قۇجات ءۇشىن پالەن مىڭ دوللار جاراتقانشا، سول اقشا قالتاڭا سىيماي بارا جاتسا، ساۋاپ ءۇشىن جۇمسا دەر ەدىم. ال الگىندەي پايعامباردىڭ ۇرپاعى بولۋعا اقشا بەرىپ ۇمتىلۋدى بارىپ تۇرعان ناداندىق، داڭعويلىق دەپ سانايمىن»، -دەيدى.
قالاي دەسەك تە، مۇحاممەد پايعامباردىڭ ۇرپاعىسىڭ دەگەن قۇجاتتىڭ بارىن، ول قۇجاتتى بەلگىلى ءبىر سوماعا جاساتىپ تا الۋعا بولاتىنىن بىلدىك. ال پايعامباردىڭ ۇرپاعى بولۋدى تاڭداۋدى ءار مۇسىلماننىڭ يمان تارازىسىنا سالعانىمىز ءجون بولار، كىم ءبىلسىن.
راۋانا ديماشقىزى،
«ادىرنا» ۇلتتىق پورتالى.
فوتو اشىق دەرەككوزدەن الىندى.
