ەكس-دەپۋتات، جىرشى بەكبولات تىلەۋحان قازاقستاندا جەر سىلكىنىسى مەن توپان سۋدىڭ بولعانىنا تاڭىرشىلدەردى كىنالادى. بۇل تۋرالى ول Top baige يۋتۋب ارناسىنا بەرگەن سۇحباتىندا ايتتى، دەپ حابارلايدى “ادىرنا” ۇلتتىق پورتالى.
“قازاقتا “كاپىر توق بولسا، مۇسىلمان تىنىش” دەگەن كەرەمەت ءسوز بار. ءتىپتى، مۇسىلماننىڭ تىنىشتىعى ءۇشىن كاپىردىڭ توق بولۋىنا تىلەكشى بولادى. ەندى ءويستىپ وتىرعان قازاقتى مۇسىلمان ەمەس دەپ جاتىر قازىر. مۇسىلمانشىلدىقتان باسىن الا قاشىپ جاتىر.
رامازان ايىنىڭ كەزىندە باقسىلاردىڭ قۇرىلتايىن جاسادى. ەندى ودان كەيىن توپان سۋ بولدى ەكەن دەپ، جەر سىلكىندى ەكەن دەپ رەنجىمەڭىز. قۇدايعا، اللاعا ءتىل تيگىزىپ جاتىر، ەسكەرتىپ جاتىر. نەگە رامازان ايىندا قارا تۇنەك باسىپ كەتتى ءبىر ساتتە؟ مۇنىڭ ءبارى ەسكەرتۋ”، دەدى بەكبولات تىلەۋحان.
بەلگىلى كاسىپكەر، قوعام بەلسەندىسى احمەتبەك نۇرسيلا ءوزىنىڭ Facebook پاراقشاسىندا بەكبولات تىلەۋحاننىڭ بۇل سوزىنە پىكىر ءبىلدىرىپ، ساۋال جولدادى.
«بەكبولات باۋىرىما بىرەر سۇراق:
1. قۇداي قازاققا ءوش پە؟ نەگە ، شۆەتسيا، نورۆەگيا، فينليانديا، مالتا ي باربادوس ەلدەرىندە ەشقاشان جەردى سىلكىمەيدى، ال قازاقستانداعى جەردى سىلكىلەيدى؟
2. قۇداي نەگە الماتىعا وشىگىپ العان؟ نەگە سولتۇستىك وبلىستاردا جەردى سىلكىمەيدى؟ ەگەر تاڭىرشىلدەر ءوز قۇرىلتايىن استانادا نە كوكشەتاۋدا جاساسا نە بولار ەدى؟ سول جەردى سىلكىلەي مە، جوق ءبارىبىر سول الماتىعا كارىن توگە بەرە مە؟
جالپى بەكبولات كوزى اشىق، كوپ وقىعان ادامسىڭ عوي، جەردىڭ سىلكىنىسى جايلى عىلىم نە دەيدى ەكەن؟ عىلىمدى وقىعان ادامداردىڭ جازعانىن ءبىر شولىپ شىقساڭ. دىندە دە "وقى، وقى جانە وقى" دەگەن عوي. تەك قۇراندى عانا وقي بەرمەي گەوگرافيا، سەيسمولوگيا دەگەن عىلىمعا دا بىراۋىق ۋاقىت ءبولىپ، سودان كەيىن پىكىرىڭدى تاعى ءبىر جازىپ شىقساڭ”، دەپ جازدى احمەتبەك نۇرسيلا.
بۇل جازبانىڭ استىنا اۆتوردى قولداعان بىرنەشە پىكىرلەر جازىلدى.
”كەرەك دەسەڭ، ءبىز جاقتا قۇران ورتەپ جاتىر، ال اۋعانستاندا دىنگە ءتىل تيگىزسەڭ دارعا اسادى. نەگە، قۇداي اۋعانستاندا جەر سىلكىلەيدى، ال دانيادا سىلكىلەمەيدى”، دەپ جازۋدا پىكىر بىلدىرۋشىلەر.
