قىتىقتاۋدان نەگە قورقامىز؟

2603
Adyrna.kz Telegram

ءسىزدى قىتىقتاعاندا قانداي سەزىمدە بولاسىز؟ ومىرىڭىزدە ءسىزدى ءبىر رەت بولسىن قىتىقتاعان شىعار؟ بىرەۋلەرگە ول كۇلكىلى سەزىم بولسا، ءبىرى قىتىقتاۋدى جەك كورەدى.  سونىمەن، قىتىقتاۋ دەگەنىمىز نە جانە ءبىز ودان نەگە قورقامىز؟

قىتىقتاۋ  - جاقىن قارىم-قاتىناستاعى ادامدار اراسىندا بولاتىن الەۋمەتتىك مىنەز-قۇلىق. بۇل انا مەن بالا اراسىنداعى قارىم-قاتىناستىڭ العاشقى فورمالارىنىڭ ءبىرى دەۋگە بولادى. سونىمەن قاتار، قىتىقتاۋ قارىم-قاتىناستى نىعايتادى جانە ادامدار اراسىنداعى ءوزارا جاقىن بولۋىنا سەپتىگىن تيگىزەدى ەكەن.

گەرمانيانىڭ تيۋبينگەن ۋنيۆەرسيتەتىنىڭ عالىمدارى قىتىقتاۋدى ءوزىن-ءوزى قورعاۋ ارەكەتىمەن بايلانىستىردى. ءيا، بۇل كەزدەيسوقتىق ەمەس. ويتكەنى دەنەنىڭ ءجيى قىتىقتايتىن بولىكتەرى (مويىن، قابىرعا، ءىش) وسال بولىپ كەلەدى. قىتىقتاۋ ميدىڭ اۋىرسىنۋعا جاۋاپ بەرەتىن بولىگىن وياتىپ، ناتيجەسىندە ادامدار قورعانىس رەاكتسياسىن كورسەتۋگە بەيىم كەلەدى.

زەرتتەۋشىلەردىڭ ايتۋىنشا، قىتىقتاعانداعى كۇلكى ادەتتەگى كۇلكىدەن ەرەكشە. بۇل ەكى جاعدايدا دا ميدىڭ ميميكالىق، ەموتسيونالدى جانە دىبىستىق رەاكتسيالارىن باسقاراتىن بولىگى بەلسەندىرىلەدى. ال قىتىقتاعان كۇلكى سونىمەن قوسا، دەنە تەمپەراتۋراسىنا، اشتىققا، شارشاعىشتىققا، سونداي-اق  ۇرىس نەمەسە قاشۋ سەكىلدى ينستينكتتىك رەاكتسيالارعا جاۋاپ بەرەتىن گيپوتالامۋستى بولۋگە كومەكتەسەدى.

ادامدار وزدەرىن قىتىقتاعان كەزدە نەگە كۇلە المايدى؟ سەبەبى  مي بۇل ارەكەتتەرگە جاۋاپ بەرۋدىڭ قاجەتى جوق ەكەنىن تۇسىنەدى.

قىتىقتاعان كەزدەگى كۇلكى جانە ونىڭ پايدا بولۋ سەبەپتەرى ءالى زەرتتەلمەگەن، بىراق زەرتتەۋشىلەر بۇل قۇبىلىس ادام ەۆوليۋتسياسى مەن وزىندىك سانا-سەزىمنىڭ دامۋىنىڭ العاشقى كەزەڭدەرىنە جاتادى دەپ بولجايدى.

اياۋلىم ءابىلدا،

«ادىرنا» ۇلتتىق پورتالى

پىكىرلەر