ەگەر ءسىز جۇمىسسىز بولساڭىز، الەۋمەتتىك جاردەماقى الاسىز با؟

2196
Adyrna.kz Telegram

قازىرگى تاڭدا جۇمىسسىز جۇرگەن ازاماتتارعا ارنايى تاعايىندالاتىن الەۋمەتتىك جاردەماقى بار. بۇل تۋرالى بىرەۋ بىلسە، ەندى بىرەۋبىلە بەرمەس. جۇمىسسىز ازاماتتارعا مەملەكەت تاراپىنان قانداي جاردەماقى بەرىلەدى؟

وسى سۇراققا قاتىستى ەلىمىزدىڭ ەڭبەك جانە حالىقتى الەۋمەتتىك قورعاۋ ۆيتسە ءمينيسترى اقمادي سارباسوۆ بىرقاتار سۇراقتارعا جاۋاپ بەردى.  جۇمىسسىزدار قازاقستان رەسپۋبليكاسىنىڭ زاڭنامالارىندا بەكىتىلگەن تارتىپتە لايىقتى جۇمىس ىزدەپ جۇرگەن ادام رەتىندە جۇمىسقا ورنالاسۋعا جاردەمدەسۋ شارالارىنا قاتىسا الادى، - دەيدى ۆيتسە-مينيستر اقمادي سارباسوۆ. بۇل ءۇشىن جۇمىسسىز ازامات ەڭ الدىمەن تۇرعىلىقتى جەرى بويىنشا حالىقتى جۇمىسپەن قامتۋ ورتالىعى ارقىلى; «ەلەكتروندىق ۇكىمەت» ۆەب-پورتالى ارقىلى; مەملەكەتتىك كورپوراتسيا ارقىلى جۇمىس ىزدەۋشى رەتىندە رەسمي تىركەلۋى كەرەك. بۇل تۋرالى اقپاراتتى العاشقى بولىپ baq.kz سايتى حابارلادى.

«وسى ورايدا، جۇمىسپەن قامتۋ ورتالىعىنىڭ قىزمەتكەرى ىزدەنۋشىگە جۇمىسپەن قامتۋعا جاردەمدەسۋدىڭ مەملەكەتتىك شارالارى جانە ورتالىق كورسەتەتىن قىزمەتتەر تۋرالى تولىق اقپارات ۇسىنادى. سونىمەن قاتار، جۇمىس ىزدەۋشىلەر www.enbek.kz ەلەكتروندىق ەڭبەك بيرجاسىندا جۇمىس ىزدەۋشى رەتىندە تىركەلىپ، ۇيىمدار مەن مەكەمەلەردىڭ ۇسىنعان بوس لاۋازىمدارىنا وزدىگىنەن ءوتىنىش بىلدىرۋگە مۇمكىندىگى بار»، - دەيدى ۆيتسە مينيستر.

ەگەر ءسىز جۇمىسسىز بولساڭىز، مەملەكەت تاراپىنان الەۋمەتتىك جاردەماقى الۋعا قۇقىڭىز بار ما؟ بۇل سۇراققا ا.سارباسوۆ: «قولدانىستاعى زاڭناماعا سايكەس جۇمىستان بوساتىلعان قىزمەتكەرلەر مىندەتتى الەۋمەتتىك ساقتاندىرۋ جۇيەسىنە قاتىسۋ وتىلىنە جانە سوڭعى 24 ايداعى تابىسىنا بايلانىستى 1 ايدان 6 ايعا دەيىن جۇمىسىنان ايرىلۋى بويىنشا الەۋمەتتىك تولەمدەر الادى. تولەم جوعالعان كىرىستىڭ 40 پايىزىنا دەيىنگى مولشەرىندە مىندەتتى الەۋمەتتىك ساقتاندىرۋ قورى (ماسق) قاراجاتى ەسەبىنەن جۇزەگە اسىرىلادى»، - دەپ جاۋاپ بەردى.

تولەم الۋ ءۇشىن Egov.kz پورتالىندا تىركەلۋ (اۆتوريزاتسيا جاساۋ); «جۇمىسقا ورنالاستىرۋ جانە جۇمىسپەن قامتۋ» بولىمىندە «جۇمىس ىزدەۋشى ادامداردى تىركەۋ» قىزمەتىن تاڭداۋ; ونلاين قىزمەتكە تاپسىرىس بەرىپ، بارلىق الاڭداردى تولتىرىپ جانە وعان ەتسق-مەن قول قويىپ، ءوتىنىمدى جىبەرەدى; ءبىر كۇن ىشىندە ءوتىنىش بەرۋشىنىڭ تۇرعىلىقتى جەرىندەگى حالىقتى جۇمىسپەن قامتۋ ورتالىعى (حجقو) بوس جۇمىس ورىندارىن ۇسىنادى;
ەگەر جۇمىس تابىلماسا، 3 جۇمىس كۇنى ىشىندە وعان قاشىقتان جۇمىسسىز مارتەبەسى بەرىلەتىن بولادى. قاجەت بولعان جاعدايدا قوسىمشا اقپارات جيناۋ ءۇشىن حجقو قىزمەتكەرى حابارلاسادى.

جۇمىسسىز رەتىندە تىركەلگەنى تۋرالى مالىمەتتەر بولعان كەزدە ەڭبەكمينىنىڭ اقپاراتتىق جۇيەسى پرواكتيۆتى فورماتتا ماسق-تان تولەمدى تاعايىنداۋ بويىنشا قىزمەت كورسەتۋگە كەلىسىم بەرۋگە موبيلدىك تەلەفونعا SMS-حابارلاما جىبەرەدى. كەلىسكەن جاعدايدا SMS-حابارلاماعا جاۋاپ بەرۋ قاجەت. تولەم اۆتوماتتى تۇردە تاعايىندالادى. ماسق قاراجاتى ەسەبىنەن جۇمىسىنان ايىرىلعان جاعدايدا تولەنەتىن الەۋمەتتىك تولەم جۇمىستان شىعۋ سەبەپتەرىنە قاراماستان جۇزەگە اسىرىلادى جانە جۇمىسسىز ادامدى ول جۇمىس ىزدەگەن كەزەڭدە قولداۋعا ارنالعان، - دەيدى ەڭبەك مينيسترلىگى.

جۇمىسپەن قامتۋعا جاردەمدەسۋ شارالارىنا قاجەتتىلىك تۋىنداعان جاعدايدا جۇمىس ىزدەۋشىلەر تۇرعىلىقتى مەكەن-جايى بويىنشا ءتيىستى جۇمىسپەن قامتۋ ورتالىعىنا ءوتىنىش بىلدىرە الادى.

ۆيتسە-ءمينيستردىڭ ايتۋىنشا، اۋىلدىق ەلدىمەكەندە جۇمىسپەن قامتۋ ورتالىعى بولماعان جاعدايدا ىزدەنۋشى اۋىلدىق وكرۋگ اكىمدىگىنىڭ اپپاراتىنا اسسيستەنتكە جۇمىس ىزدەپ جۇرگەن ادام رەتىندە تىركەلۋ ءۇشىن جۇگىنە الادى.

جۇمىسپەن قامتۋ ورتالىعى جۇمىس ىزدەپ جۇرگەن ادامدى تىركەگەن كۇننەن باستاپ ون جۇمىس كۇنى ىشىندە وعان لايىقتى جۇمىس تاڭداۋدا كومەك كورسەتەدى. جۇمىسپەن قامتۋ ورتالىعى اتالعان ۋاقىت ىشىندە جۇمىس ىزدەۋشىگە لايىقتى جۇمىس تاڭداپ بەرە الماعان جاعدايدا ەكى جۇمىس كۇنى ىشىندە جۇمىس ىزدەپ جۇرگەن ادامدى جۇمىسسىز ادام رەتىندە تىركەۋ نەمەسە تىركەۋدەن باس تارتۋ تۋرالى شەشىم قابىلدايدى، - دەدى ول.

جۇمىسپەن قامتۋ ورتالىعىنىڭ قىزمەتكەرى شەشىم قابىلدانعان كۇننەن باستاپ ەكى جۇمىس كۇنى ىشىندە جۇمىس ىزدەپ جۇرگەن ادامدى جۇمىسسىز رەتىندە تىركەۋ كۇنى نەمەسە تىركەۋدەن باس تارتۋ تۋرالى اقپاراتتىق-كوممۋنيكاتسيالىق تەحنولوگيالار جانە ۇيالى بايلانىس جەلىسىنىڭ ابونەنتتىك قۇرىلعىسى ارقىلى، ال اۋىلدىق جەرلەردىڭ تۇرعىندارىن كەنتتىڭ، اۋىلدىڭ، اۋىلدىق وكرۋگتىڭ اكىمى نەمەسە اسسيستەنت ارقىلى نەمەسە مەملەكەتتىك الەۋمەتتىك ساقتاندىرۋ قورىنان جۇمىسىنان ايىرىلعان جاعدايدا بەرىلەتىن الەۋمەتتىك تولەمدى تاعايىنداۋ ءۇشىن قاجەتتى قۇجاتتاردىڭ تىزبەسى تۋرالى حاباردار ەتەدى.

«ادىرنا» اقپاراتتىق پورتالى.

 

پىكىرلەر