ەلىمىزدە كسرو تۇسىنداعى قىزىل پاسپورتتاردى قازاقستان قۇجاتىنا اۋىستىرۋ ناۋقانى ءجۇرىپ جاتىر. بۇل تۋرالى "ادىرنا" ءتىلشىسى Baq.kz - كە سىلتەمە جاساپ حابارلايدى.
قر ىشكى ىستەر مينيسترلىگى كوشى-قون قىزمەتى توراعاسىنىڭ ورىنباسارى سابىرجان سەيىتجانوۆ بريفينگ بارىسىندا بۇرىنعى كسرو پاسپورتتارىمەن تۇراتىن ادامداردىڭ مارتەبەسىن رەتتەۋ تۋرالى ايتىپ بەردى.
ونىڭ ايتۋىنشا، ەلىمىزدە ەسكى كسرو تۇسىنداعى قۇجاتپەن جۇرگەندەر قاتارى ءالى دە كوپ. بىلتىر 1700-دەي ادام ەسكى پاسپورتىن وتكىزىپ، جاڭاسىن السا، بيىل سەگىز ايدا 800-دەن استام ازامات قۇجات اۋىستىرعان.
ءبىزدىڭ بولجام بويىنشا ءالى دە 6 مىڭداي ادام ەسكى قۇجاتپەن ءجۇر. ونىڭ 30 پايىزدايى شەتەلدەن كوشىپ كەلگەندەر. بۇل ادامدار ءتۇرلى جاعدايعا بايلانىستى ەسكى قۇجاتپەن ءجۇرىپ قالعان. ءبىرىنىڭ ءتۇرلى سەبەپتەرى بولسا، تاعى ءبىرى قۇقىقتىق ساۋاتسىزدىعىنان ەلەمەگەن. وعان قوسا مۇنداي قۇجاتتاردى قايتا تەكسەرۋ جۇمىستارىنىڭ ۇزاق ۋاقىتقا سوزىلاتىنى دا اسەر ەتكەن، - دەيدى ول.
سونىمەن قاتار، ول سوۆەت كەزىندەگى قىزىل پاسپورتپەن جۇرگەندەردىڭ كوپشىلىگى 40 جاستان اسىپ كەتكەندەر ەكەنىن جانە تاعى ءبىر بولىگى شەتەلدەن كەلگەن ازاماتتار ەكەنىن ايتىپ ءوتتى.
ماسەلەن ءبىر ازامات رەسەيدەن كورشى وزبەكستانعا كوشۋى مۇمكىن، كەيىن ءبىزدىڭ ەلگە كەلىپ تۇرادى. وسىنداي ازاماتتاردىڭ قۇجاتىن اۋىستىرۋ ءۇشىن الدىمەن رەسەيگە، كەيىن وزبەكستانعا سۇراۋ جىبەرەمىز. بۇل ءبىراز ۋاقىتتى الادى، - دەيدى سابىرجان سەيىتجانوۆ.
جيىن بارىسىندا ول قازىر وسىنداي ەسكى پاسپورتتاردى جاپپاي اۋىستىرۋ ناۋقانى ءجۇرىپ جاتقانىن جەتكىزدى.
ەگەر سوۆەت كەزىندەگى قىزىل پاسپورتپەن جۇرگەندەر بولسا كوشى-قون قىزمەتىنە جۇگىنۋ كەرەك. سول جەردە ارىزىن جازىپ قالدىرادى. وسىدان كەيىن مەكتەپ، ينستيتۋتقا وسىنداي ادام تىركەۋدە بولعانى تۋرالى اقپارات الامىز. سول راستالىپ جاتسا ءتيىستى قۇجاتىن بەرەمىز. وعان قوسا ەلىمىزدە ۋاقىتى ءوتىپ كەتكەن قۇجاتپەن جۇرگەندەرگە ايىپپۇل سالىنادى، ونى ءبىر اپتادا تولەسە 50 پايىز جەڭىلدىگى بار، - دەدى ول.
"ادىرنا" ۇلتتىق پورتالى
