Elimizde KSRO tusyndaǵy qyzyl pasporttardy Qazaqstan qujatyna aýystyrý naýqany júrip jatyr. Bul týraly "Adyrna" tilshisi Baq.kz - ke silteme jasap habarlaıdy.
QR Ishki ister mınıstrligi Kóshi-qon qyzmeti tóraǵasynyń orynbasary Sabyrjan Seıitjanov brıfıng barysynda burynǵy KSRO pasporttarymen turatyn adamdardyń mártebesin retteý týraly aıtyp berdi.
Onyń aıtýynsha, elimizde eski KSRO tusyndaǵy qujatpen júrgender qatary áli de kóp. Byltyr 1700-deı adam eski pasportyn ótkizip, jańasyn alsa, bıyl segiz aıda 800-den astam azamat qujat aýystyrǵan.
Bizdiń boljam boıynsha áli de 6 myńdaı adam eski qujatpen júr. Onyń 30 paıyzdaıy shetelden kóship kelgender. Bul adamdar túrli jaǵdaıǵa baılanysty eski qujatpen júrip qalǵan. Biriniń túrli sebepteri bolsa, taǵy biri quqyqtyq saýatsyzdyǵynan elemegen. Oǵan qosa mundaı qujattardy qaıta tekserý jumystarynyń uzaq ýaqytqa sozylatyny da áser etken, - deıdi ol.
Sonymen qatar, ol sovet kezindegi qyzyl pasportpen júrgenderdiń kópshiligi 40 jastan asyp ketkender ekenin jáne taǵy bir bóligi shetelden kelgen azamattar ekenin aıtyp ótti.
Máselen bir azamat Reseıden kórshi Ózbekstanǵa kóshýi múmkin, keıin bizdiń elge kelip turady. Osyndaı azamattardyń qujatyn aýystyrý úshin aldymen Reseıge, keıin Ózbekstanǵa suraý jiberemiz. Bul biraz ýaqytty alady, - deıdi Sabyrjan Seıitjanov.
Jıyn barysynda ol qazir osyndaı eski pasporttardy jappaı aýystyrý naýqany júrip jatqanyn jetkizdi.
Eger sovet kezindegi qyzyl pasportpen júrgender bolsa Kóshi-qon qyzmetine júginý kerek. Sol jerde aryzyn jazyp qaldyrady. Osydan keıin mektep, ınstıtýtqa osyndaı adam tirkeýde bolǵany týraly aqparat alamyz. Sol rastalyp jatsa tıisti qujatyn beremiz. Oǵan qosa elimizde ýaqyty ótip ketken qujatpen júrgenderge aıyppul salynady, ony bir aptada tólese 50 paıyz jeńildigi bar, - dedi ol.
"Adyrna" ulttyq portaly
