كوممۋنيستەر كوسارەۆتىڭ قىتىعىنا ءتيىپ كەتپەدى مە؟

1778

ماجىلىستەگى «حالىق كوممۋنيستەرى» فراكتسياسىنىڭ دەپۋتاتتارى پرەمەر-مينيسترگە زەينەت جاسىن تومەندەتۋ تۋرالى دەپۋتاتتىق ساۋال جولدادى دەپ حابارلايدى «ادىرنا» ۇلتتىق پورتالى Sputnik قازاقستانعا سىلتەمە جاساپ.

ماجىلىسمەن ايقىن قوڭىروۆ  بۇل شارا قارتتاردىڭ ءومىرى مەن دەنساۋلىعىن ساقتاۋعا عانا سەپتىگىن تيگىزبەي، ەكونوميكالىق داعدارىس جاعدايىندا ەڭبەك نارىعىنا دا وڭ اسەر ەتەدى دەپ سانايدى.

«دۇنيەجۇزىلىك دەنساۋلىق ساقتاۋ ۇيىمىنىڭ مالىمەتىنشە، COVID-19 ۆيرۋسىنىڭ ەرەكشەلىگى سول، ءولىم-ءجىتىمنىڭ دەنى 60 جاستان اسقان ادامدار اراسىندا تىركەلگەن. ەگدە جاستاعىلاردىڭ ۆيرۋستى تەز جۇقتىرۋى ورگانيزمدەگى فيزيولوگيالىق وزگەرىستەرمەن، يممۋندىق رەاكتسيانىڭ تومەندىگىمەن جانە باسقا دا قوسىمشا اۋرۋلاردىڭ بولۋىمەن بايلانىستى. وسىلاردىڭ اسەرىنەن ولار ىندەتكە شالدىعۋعا بەيىم كەلەدى، اۋرۋدىڭ اۋىر ءتۇرىن باستان وتكەرىپ، اسقىنىپ، سوڭى ولىممەن اياقتالىپ جاتادى»، – دەگەن  دەپۋتات «حالىق كوممۋنيستەرى» فراكتسياسى ازاماتتاردىڭ زەينەتكەرلىككە شىعۋ جاسىن قايتا قاراۋعا شاقىراتىنىن جەتكىزدى. «ازاماتتاردىڭ پىكىرىن نەگىزگە الا وتىرىپ، ايەلدەر مەن ەرلەر ءۇشىن زەينەت جاسىن 60 جاسقا دەيىن تومەندەتۋدى ۇسىنامىز»، – دەدى قوڭىروۆ.

ءجون ءسوز. قازاقستاندا باسقاسىن ايتپاعاندا، زەينەتكەرلەرگە ءومىر ءسۇرۋ كۇن وتكەن سايىن اۋىر ازاپقا اينالىپ بارادى. COVID-19 ىندەتى كەلمەي تۇرىپ تا، بىزدەگى زەينەتكەرلەر ءار ايدان كەلەسى ايعا دەيىن تيىن ساناپ، ءبىر كۇن اش، ءبىر كۇن توق، ايتەۋىر ولمەستىڭ كۇيىن كەشىپ جۇرگەن ەدى. ەندى مىناۋ COVID-19 جايلاپ، يتارشىلىقپەن ارەڭ كۇنەلتكەن زەينەتكەرلەرىمىزدىڭ ءتىپتى تيتىقتاپ قالعان جايى بار.

كوممۋنيست قوڭىروۆتىڭ ۇسىنىسى قولداۋ تابادى ما، جوق پا، ول جاعى بەلگىسىز. الايدا، ادامنىڭ جاسى ۇلعايعان سايىن جۇمىس ىستەۋ بىلاي تۇرسىن، ءجۇرىپ تۇرۋىنىڭ ءوزى وڭايعا سوقپايتىنىن وسى كوممۋنيستەر پارتياسىنداعى كوسارەۆ مىرزا وتە جاقسى تۇسىنسە كەرەك. پارتيالاستارى مىناداي ماسەلەنى كوتەرىپ جاتقاندا، كوسارەۆ شىنايى قارتتىقتىڭ قالاي بولاتىنىن ايتىپ، بيلىكتەگىلەرگە قوسىمشا ۇندەۋ جولدار ما ەكەن؟  الدە، ارىپتەستەرىنىڭ مىناداي ۇسىنىسى قىتىعىنا ءتيىپ، قىجىلىن قايناتتى ما ەكەن؟

قالاي دەسەك تە، زەينەت جاسىن ازايتۋ عانا ەمەس، بيلىكتىڭ قۇلاعىن ۇستاعان زەينەتكەرلەردىڭ ماسەلەسى دە مىنبەرلەردە ايتىلىپ، شەشىمىن تاپقانى ءجون ەدى. COVID- 19-دىڭ ەڭ الدىمەن زەينەت جاسىنداعى ادامداردى «قۇلاتاتىنىن» ەسكەرسەك، قازاقستانعا بۇل ىندەتتىڭ بەرگەن پايداسى بالكىم، زەينەت جاسىن ازايتۋ مەن اق وردانى زەينەتكەرلەردەن بوساتۋ بولاتىن شىعار، كىم ءبىلسىن.

مەرۋەرت حۋساينوۆا، «ادىرنا» ۇلتتىق پورتالى.

فوتو اشىق دەرەككوزدەن الىندى.

 

پىكىرلەر
رەداكتسيا تاڭداۋى
Серіктестер/Партнеры
Студия IMA - создание сайтов Доставка цветов Астана - Lova Buket