قازاقستان رەسپۋبليكاسىنىڭ تۇڭعىش پرەزيدەنتى نۇرسۇلتان نازارباەۆ قاسىم-جومارت توقاەۆتى نە سەبەپتى مەملەكەت باسشىسىنا ۇسىنعانىن ايتىپ بەردى. ول بۇل تۋرالى «اباي اماناتى» ماقالاسىندا جازدى، دەپ حابارلايدى «ادىرنا» ءتىلشىسى.
ەلباسى پرەزيدەنت رەتىندەگى وكىلەتتىگىن ءوز ەركىمەن توقتاتۋ تۋرالى شەشىم قابىلداماس بۇرىن بولاشاق ەل باسقارار ازاماتقا قاجەت قايراتكەرلىك تاجىريبە مەن تاعىلىم جايىنا اسىقپاي، زەر سالا قاراعانىن اتاپ ءوتتى.
«قازاقستان تاۋەلسىزدىگىنىڭ العاشقى كۇندەرىنەن باستاپ مەنىمەن بىرگە جۇمىس ىستەگەن قاسىم-جومارت توقاەۆتىڭ ادال ءارى جاۋاپكەرشىلىگى جوعارى ازامات ەكەنىن ەسەپكە الماعاندا، ونىڭ ەلدەگى ىشكى جاعدايدى سارالاپ قانا قويماي، شىعىستىڭ دا، باتىستىڭ دا تىلدەرىن مەڭگەرگەندىگىن، بىرىككەن ۇلتتار ۇيىمى باس حاتشىسىنىڭ ورىنباسارى قىزمەتىن اتقارعانىن، الەمدىك ساياساتتاعى قازاقستاننىڭ ورنىن بايىپتاي الاتىن ديپلوماتتىق قىرىن دا ەسكەردىم. سونداي-اق، ءوزىم ايرىقشا ءمان بەرىپ كەلە جاتقان ەل بىرلىگى ماسەلەسى مەن ادامزاتتىق قۇندىلىقتاردى ۇيلەستىرۋ قابىلەتىنە سەنىم ارتتىم»،-دەدى نۇرسۇلتان ءابىشۇلى.
ەسكە سالا كەتەيىك، قازاقستاننىڭ تۇڭعىش پرەزيدەنتى وكىلەتتىگىن 2019 جىلدىڭ 19 ناۋرىزىندا ءوز ەركىمەن توقتاتقان ەدى. كونستيتۋتسيا بويىنشا مەملەكەت باسشىسىنىڭ مىندەتى سەنات توراعاسى قاسىم-جومارت توقاەۆقا ءوتتى. وتكەن جىلدىڭ ماۋسىمىندا توقاەۆ سايلاۋشىلار داۋسىنىڭ 70,96 % يەلەنىپ، قر 2-پرەزيدەنتى بولىپ سايلاندى.
«ادىرنا» ۇلتتىق پورتالى
