پيلوتتىق جوبانى ەنگىزۋ تۋرالى

2302
Adyrna.kz Telegram

اعىمداعى جىلعى 2 قازاندا باس پروكۋراتۋرادا قازاقستان رەسپۋبليكاسى پرەزيدەنتى اكىمشىلىگىنىڭ باسشىسى ەرلان قوشانوۆتىڭ، پرەزيدەنتتىڭ كومەكشىسى – قاۋىپسىزدىك كەڭەسىنىڭ حاتشىسى اسەت يسەكەشەۆتىڭ قاتىسۋىمەن مەملەكەت باسشىسىنىڭ 2020 جىلعى 1 قىركۇيەكتەگى «جاڭا جاعدايداعى قازاقستان: ءىس-قيمىل كەزەڭى» جولداۋىندا بەرىلگەن تاپسىرمالاردى ورىنداۋ اياسىندا جۇزەگە اسىرىلىپ جاتقان پيلوتتىق جوبانىڭ تانىستىرىلىمى ءوتتى.
ءىس-شاراعا قۇقىق قورعاۋ ورگاندارىنىڭ باسشىلارى، سونداي-اق قۇقىق قورعاۋ جۇيەسىن رەفورمالاۋ جونىندەگى جۇمىس توبىنىڭ مۇشەلەرى قاتىستى.
پوليتسيا تەرگەۋشىسى مەن پروكۋرور پيلوتتىق جوبانىڭ تاجىريبەدە قولدانىلۋىن كورسەتتى.
پيلوت ادام قۇقىقتارى مەن بوستاندىقتارىنا قاتىستى سوتقا دەيىنگى تەرگەپ-تەكسەرۋ ورگاندارىنىڭ نەگىزگى شەشىمدەرىن كەلىسۋ بويىنشا پروكۋروردىڭ وزىنە جۇكتەلگەن مىندەتتەرىن ورىنداۋدىڭ ەلەكتروندىق فورماتىن كوزدەيدى.
وسىعان دەيىن ەكى وڭىردە - پاۆلودار جانە شىعىس قازاقستان وبلىستارىندا پيلوتتىق جوبا سىناقتان وتكىزىلدى. 1 قازاننان باستاپ جوبا رەسپۋبليكانىڭ بارلىق ايماعىندا ىسكە قوسىلدى.
جوبانىڭ ءمانى تەرگەۋشىنىڭ ءىس-ارەكەتتى سارالاۋ، قايتا سارالاۋ، سونداي-اق تەرگەۋدى توقتاتۋ تۋرالى شەشىمىن سوتقا دەيىنگى تەرگەپ-تەكسەرۋدىڭ بىرىڭعاي تىزىلىمىندە ەلەكتروندىق تۇردە قالىپتاستىرۋدا بولىپ تابىلادى.
پروكۋرور ونلاين رەجيمىندە ولاردىڭ زاڭدىلىعىن بەلگىلەنگەن مەرزىمدە تەكسەرۋگە، بۇزۋشىلىقتار انىقتالعان جاعدايدا دەن قويۋ شارالارىن قابىلداۋعا مىندەتتى.
مۇنداي مودەل ءىس جۇرگىزۋ قۇجاتتارىن دايىنداۋ ۋاقىتىن جانە تەرگەۋ مەرزىمدەرىن قىسقارتادى.
بۇدان باسقا، قىلمىستىق پروتسەسكە قاتىسۋشىلارعا قابىلدانعان پروتسەستىك شەشىمدەردى قاشىقتان قاداعالاۋعا، كەلىسپەگەن جاعدايلاردا ولارعا ۋاقتىلى شاعىم جاساۋعا مۇمكىندىك بەرىلەدى.
باس پروكۋرور بۇل جاڭالىقتار الدىن الا پروكۋرورلىق قاداعالاۋدى قامتاماسىز ەتۋگە جانە ادال ازاماتتاردىڭ قىلمىستىق قۋدالاۋ شەڭبەرىنە تارتىلۋىن بولدىرماۋعا باعىتتالعانىن اتاپ ءوتتى.
كەزدەسۋ قورىتىندىسى بويىنشا ەرلان قوشانوۆ اتقارىلىپ جاتقان جۇمىستاردىڭ ماڭىزدىلىعىن اتاپ ءوتىپ، اعىمداعى جىلدىڭ سوڭىنا دەيىن جوبانى سىناقتان وتكىزۋدى اياقتاۋدى، نورماتيۆتىك-قۇقىقتىق بازانى دايىنداۋدى جانە 2021 جىلعى 1 قاڭتاردان باستاپ مەملەكەت باسشىسىنىڭ قازاقستان حالقىنا جولداۋىندا كورسەتىلگەن تاپسىرمالارىن ىسكە اسىرۋعا كىرىسۋدى تاپسىردى.

پىكىرلەر