بۇگىن تۇركيا رەسپۋبليكاسىنىڭ قازاقستانداعى توتەنشە جانە وكىلەتتى ەلشىسى ۋفۋك ەكيدجي، تۇركيانىڭ الماتى قالاسىنداعى باس كونسۋلى الي رىزا اكىندجى جانە قالا اكىمى مۇرات ايتەنوۆ قۇرمەتتى كونسۋلدىقتىڭ عيماراتىن ارالاپ، الداعى جۇمىسىمەن تانىستى. سونداي-اق، بۇل شاراعا «احىسكا» تۇرىك ەتنومادەني ورتالىعى» قوعامدىق بىرلەستىگىنىڭ توراعاسى، قۇرمەتتى كونسۋل لاتيپشا اسانوۆ، «اتامەكەن» كاسىپكەرلەر پالاتاسى شىمكەنت فيليالىنىڭ وكىلدەرى مەن تۇركيالىق بيزنەسمەندەر دە قاتىستى.
كەزدەسۋ كەزىندە قالا اكىمى مۇرات ايتەنوۆ پەن تۇركيالىق دەلەگاتسيا مۇشەلەرى كونسۋلدىقتىڭ الداعى ۋاقىتتا اتقاراتىن جۇمىسى جايلى ماعلۇمات الدى.
جاڭادان اشىلعالى وتىرعان كونسۋلدىقتىڭ ماقساتى — ەكى ەل ءتۋريزمىنىڭ دامۋىنا ىقپال ەتۋ، كاسىپكەرلەرگە قۇقىقتىق كەڭەس بەرۋ، بولاشاق ينۆەستورلاردى قالاداعى يندۋستريالدى ايماقتاردىڭ مۇمكىندىكتەرىمەن تانىستىرۋ جانە ولارعا ونەركاسىپ سالالارىنا قاتىستى تولىققاندى اقپارات بەرۋ.
ورتالىقتا وتكەن كەزدەسۋدە تاراپتار ەكىجاقتى ساۋدا-ەكونوميكالىق جانە مادەني-گۋمانيتارلىق ىنتىماقتاستىقتى دامىتۋ ماسەلەلەرىن تالقىلادى.
—ميلليوننان استام حالقى بار شىمكەنتتىڭ دامۋىندا شەتەلدىك ينۆەستورلاردى تارتۋ ايرىقشا ماڭىزعا يە. وسى ورايدا تۇركيالىق كاسىپكەرلەر قالامىزدا قۇرىلىس، مەديتسينا، توقىما ونەركاسىبى سياقتى سالالاردا ينۆەستيتسيالىق جوبالاردى تابىستى جۇزەگە اسىرۋدا. ءبىز وسى بايلانىستاردى ودان ءارى نىعايتا تۇسۋگە مۇددەلىمىز، — دەدى مۇرات دۇيسەنبەكۇلى.
ءوز كەزەگىندە ۋفۋك ەكيدجي حالقى تىعىز ورنالاسقان، اۋماعى كەڭ، كليماتى جايلى شىمكەنت بيزنەس-جوبالاردى جۇزەگە اسىرۋعا تاپتىرماس قالا ەكەنىن ايتتى.
—قازاقستان مەن تۇركيا — ورتاق تاريحى مەن مادەنيەتى بار مەملەكەتتەر. قازاقستان قوعامدىق كەلىسىم مەن ىنتىماق-بىرلىكتى ساقتاي ءبىلدى. بۇعان بارلىق ازاماتتار مەن ەتنوستاردىڭ تەڭدىگىن قامتاماسىز ەتۋ ارقىلى قول جەتكىزدى. ەكى ەل اراسىندا ەرەكشە دوستىق، باۋىرلاستىق قارىم-قاتىناس قالىپتاسقان. ءبىزدىڭ شىمكەنت شاhارىنا كەلۋىمىزدىڭ نەگىزگى سەبەبى — ەكى ەل اراسىنداعى بايلانىستى ودان ءارى نىعايتۋ، — دەدى ۋفۋك ەكيدجي.
كەزدەسۋدىڭ سوڭىندا قالا اكىمى شىمكەنتتىكتەر جىل سايىن ناۋرىزدى العاشقى بولىپ قارسى الاتىنىن ايتىپ، مارتەبەلى مەيمانداردى كەلەر جىلى ۇلىستىڭ ۇلى كۇنىن شىمقالادا قارسى الۋعا شاقىردى.
شىمكەنت قالاسى اكىمىنىڭ ءباسپاسوز قىزمەتى
