بيىل شىمكەنت قالاسىندا ءوز كاسىبىن باستاۋشىلارعا «باستاۋ بيزنەس» جوباسى اياسىندا 1 491 مەملەكەتتىك گرانت بەرۋ جوسپارلانعان. بۇگىنگى كۇنگە دەيىن 1 420 ادامعا گرانت بەرىلگەن. ونىڭ 901-ءى از قامتىلعان وتباسىلاردىڭ مۇشەلەرى. ال، 90-ى كوپبالالى انالار. تاعى 306 ادام از قامتىلعان جانە كوپبالالى وتباسىلاردىڭ مۇشەلەرى.
1 قىركۇيەكتەن باستاپ مەملەكەتتىك گرانت سانى كوبەيدى. قوسىمشا 3 423 ادامعا مەملەكەتتىك گرانت ۇيلەستىرۋگە قارجى قاراستىرىلعان.
اتالعان 3 423 ورىنعا از ۋاقىت ىشىندە 7 مىڭعا جۋىق قالا تۇرعىنى قۇجات وتكىزدى. ولاردىڭ قۇجاتتارى كوميسسيانىڭ قاراۋىنا ۇسىنىلعان. ماسەلەن، بيىل 1-2 قىركۇيەك كۇندەرى وتكەن كوميسسيا وتىرىسىندا 1 022 ادامنىڭ ءوتىنىشى بويىنشا وڭ شەشىم قابىلدانىپ، ولارعا مەملەكەتتىك گرانت تاعايىندالدى. ونىڭ ىشىندە بۇگىنگى كۇنگە دەيىن 500 ۇمىتكەرگە گرانت قارجىسى اۋدارىلىپ ۇلگەرگەن.
ايتا كەتەيىك، «باستاۋ بيزنەس» جوباسى — ناتيجەلى جۇمىسپەن قامتۋدى جانە جاپپاي كاسىپكەرلىكتى دامىتۋدىڭ 2017-2021 جىلدارعا ارنالعان «ەڭبەك» مەملەكەتتىك باعدارلاماسى شەڭبەرىندە جۇزەگە اسۋدا. جوبا اياسىندا ءوز بيزنەسىن باستاعىسى كەلەتىن ازاماتتار كاسىپكەرلىك نەگىزدەرىنە تەگىن وقىتىلادى. پاندەمياعا بايلانىستى بيىل وقۋ ونلاين رەجيمدە وتۋدە. وقۋ مەرزىمى — 21 كۇن. قاتىسۋشى وقۋىن تامامداعان سوڭ ارنايى تەست تاپسىرادى. ەگەر جاقسى ناتيجە كورسەتسە، وعان وقۋدى بىتىرگەنى تۋرالى سەرتيفيكات بەرىلەدى.
سول سەرتيفيكاتتى العان ادامنىڭ گرانتقا ۇمىتكەر اتانۋعا قۇقىعى بار. گرانت قايتارىمسىز بەرىلەدى. بىراق مونيتورينگتىك توپ گرانت قارجىسىنىڭ ماقساتتى جۇمسالۋىن تەكسەرىپ وتىرادى. ياعني، بۇل ءوز كاسىبىن باستاۋشى ازاماتتارعا بەرىلگەن بىرەگەي مۇمكىندىك. وسى ورايدا بيىلدان باستاپ از قامتىلعان وتباسىلار مەن اتاۋلى الەۋمەتتىك كومەك الاتىن كوپبالالى وتباسىلاردىڭ مۇشەلەرى، قونىس اۋدارۋشىلار مەن قانداستار «باستاۋ بيزنەس» جوباسىنىڭ سەرتيفيكاتىنسىز دا گرانتقا تىكەلەي ۇمىتكەر بولا الاتىنىن ايتا كەتكەن ءجون.
شىمكەنت قالاسى اكىمىنىڭ ءباسپاسوز قىزمەتى
