Biyl Şymkent qalasynda öz käsıbın bastauşylarǧa «Bastau biznes» jobasy aiasynda 1 491 memlekettık grant beru josparlanǧan. Bügıngı künge deiın 1 420 adamǧa grant berılgen. Onyŋ 901-ı az qamtylǧan otbasylardyŋ müşelerı. Al, 90-y köpbalaly analar. Taǧy 306 adam az qamtylǧan jäne köpbalaly otbasylardyŋ müşelerı.
1 qyrküiekten bastap memlekettık grant sany köbeidı. Qosymşa 3 423 adamǧa memlekettık grant üilestıruge qarjy qarastyrylǧan.
Atalǧan 3 423 orynǧa az uaqyt ışınde 7 myŋǧa juyq qala tūrǧyny qūjat ötkızdı. Olardyŋ qūjattary komissiianyŋ qarauyna ūsynylǧan. Mäselen, biyl 1-2 qyrküiek künderı ötken komissiia otyrysynda 1 022 adamnyŋ ötınışı boiynşa oŋ şeşım qabyldanyp, olarǧa memlekettık grant taǧaiyndaldy. Onyŋ ışınde bügıngı künge deiın 500 ümıtkerge grant qarjysy audarylyp ülgergen.
Aita keteiık, «Bastau biznes» jobasy — nätijelı jūmyspen qamtudy jäne jappai käsıpkerlıktı damytudyŋ 2017-2021 jyldarǧa arnalǧan «Eŋbek» memlekettık baǧdarlamasy şeŋberınde jüzege asuda. Joba aiasynda öz biznesın bastaǧysy keletın azamattar käsıpkerlık negızderıne tegın oqytylady. Pandemiiaǧa bailanysty biyl oqu onlain rejimde ötude. Oqu merzımı — 21 kün. Qatysuşy oquyn tämamdaǧan soŋ arnaiy test tapsyrady. Eger jaqsy nätije körsetse, oǧan oqudy bıtırgenı turaly sertifikat berıledı.
Sol sertifikatty alǧan adamnyŋ grantqa ümıtker atanuǧa qūqyǧy bar. Grant qaitarymsyz berıledı. Bıraq monitoringtık top grant qarjysynyŋ maqsatty jūmsaluyn tekserıp otyrady. Iаǧni, būl öz käsıbın bastauşy azamattarǧa berılgen bıregei mümkındık. Osy oraida biyldan bastap az qamtylǧan otbasylar men atauly äleumettık kömek alatyn köpbalaly otbasylardyŋ müşelerı, qonys audaruşylar men qandastar «Bastau biznes» jobasynyŋ sertifikatynsyz da grantqa tıkelei ümıtker bola alatynyn aita ketken jön.
Şymkent qalasy äkımınıŋ baspasöz qyzmetı
