شىمكەنت قالاسىندا جول قوزعالىسى قاۋىپسىزدىگىن قامتاماسىز ەتۋ ماقساتىندا تۇركىستان كوشەسى ورتاشا جوندەۋدەن وتۋدە.
اتاپ ايتقاندا، اسفالتبەتون جابىنىن جانە يرريگاتسيالىق ارىقتاردى اۋىستىرۋ، اياقجولداردى جوندەۋ، ۆەلوجولدار سالۋ مەن جاۋىن-شاشىن سۋىن وتكىزەتىن كارىزدەر ورناتۋ قاراستىرىلعان. بۇگىنگى تاڭدا جۇمىس 75 پروتسەنتكە ورىندالدى.
جول قۇرىلىسىنىڭ ساپاسىن تەكسەرۋ ماقساتىندا تۇركىستان كوشەسىنە «ادالدىق الاڭى» جوبالىق كەڭسەسى، «جول اكتيۆتەرىنىڭ ۇلتتىق ساپا ورتالىعى» مەن شىمكەنت قالاسىنىڭ جولاۋشىلار كولىگى جانە اۆتوموبيل جولدارى باسقارماسى بىرلەسە وتىرىپ زەردەلەۋ جۇمىستارىن جۇرگىزدى. وعان مەردىگەر «ازياكومپلەكسستروي» جشس-ءى جانە تەحنيكالىق قاداعالاۋشى «ينجەنەر ستروي» جشس-ءىنىڭ ماماندارى دا قاتىسقان.
زەردەلەۋ بارىسىندا ماماندار جولدىڭ جيەك تاستارىن، اياقجول ورنەك تاستارىن، اسفالتبەتون قاباتىن تەكسەردى. ناتيجەسىندە تۇركىستان كوشەسىنىڭ د.قوناەۆ داڭعىلىنان توقاەۆ كوشەسىنە دەيىنگى بولىگىنە قويىلعان جيەكتاستاردىڭ 10-15 پروتسەنتى بەرىك ورناتىلماعانى انىقتالدى.
وسىعان بايلانىستى تاپسىرىس بەرۋشى مەكەمە مەردىگەرگە اتالعان كەمشىلىكتى جويۋدى تاپسىردى. قايتا تەكسەرۋ كەزىندە جيەكتاستاردىڭ بەرىكتىگى تالاپقا ساي بولماعان جاعدايدا مەردىگەر مەكەمەگە ونى اۋىستىرۋعا ۇيعارىم بەرىلەدى.
ايتا كەتەيىك، زەردەلەۋ كەزىندە اياقجول ورنەك تاستارىنىڭ بەرىكتىگى مەن اسفالتبەتون قاباتىنىڭ قالىڭدىعى قولدانىستاعى قۇرىلىس نورمالارىنا جانە سمەتالىق قۇجاتتاماعا سايكەس كەلەتىنى انىقتالدى.
باس مەردىگەر «ازياكومپلەكسستروي» جشس-ءى ورتاشا جوندەۋ جۇمىستارىن قازان ايىندا اياقتاۋدى جوسپارلاپ وتىر.
شىمكەنت قالاسى اكىمىنىڭ ءباسپاسوز قىزمەتى
