قازىرگى تاڭدا قالا اۋماعىندا قوقىس تاستايتىن 490 قوقىس الاڭشاسى، 2039 قوقىس كونتەينەرى بار. الايدا ولاردىڭ كوبىنىڭ توزىعى جەتكەن. وسى ماقساتتا قالا اكىمى مۇرات ايتەنوۆ قوقىس سالاتىن كونتەينەرلەردى مەملەكەتتىك-جەكەمەنشىك ارىپتەستىك اياسىندا جاڭارتۋ قاجەتتىگى جونىندە تاپسىرما بەرگەن بولاتىن.
وسىعان وراي، بۇگىندە شىمكەنتتە كوپقاباتتى تۇرعىن ءۇي اۋماعىنا قوقىس تاستايتىن جاڭا مەتالل جاشىكتەر ورناتىلۋدا. جالپى وسى جىلى 1376 كونتەينەر ساتىپ الىنباق. قازىر ولاردىڭ 376-سى ساتىپ الىنىپ، 240-ى ورناتىلدى. بۇل جۇمىستار قاتتى تۇرمىستىق قالدىقتاردى كادەگە جاراتۋعا جانە قورشاعان ورتانىڭ ەكولوگيالىق تازالىعىن ارتتىرۋدا ماڭىزدى رولگە يە.
جاڭا قوقىس كونتەينەرلەرىنىڭ ارنايى قاقپاقتارى جەڭىل قالدىقتاردىڭ ۇشىپ كەتۋىنەن، شاشىلۋىنان قورعايتىنىمەن ىڭعايلى.
وسى ورايدا، قالا تۇرعىندارىنا كومەك كورسەتەتىن «iKomek» جەدەل قىزمەت ەتۋ ورتالىعى اشىلعان. ورتالىق ماماندارى تاۋلىك بويى تۇرعىنداردىڭ قوڭىراۋلارىنا جاۋاپ بەرەدى. «109» بىرىڭعاي تەلەفون نومىرىنە ءبىر اي كولەمىندە 14 000-عا جۋىق قوڭىراۋ كەلىپ ءتۇسىپ، ولاردىڭ 96 پايىزى قاناعاتتاندىرىلعان.
كەز كەلگەن ساۋالعا 109 نومىرىنە قوڭىراۋ شالۋ ارقىلى جاۋاپ الۋعا بولادى.
سونىمەن قاتار iKomek ورتالىعىنىڭ 87777109109 ۆاتساپ ءنومىرى دە تۇرعىن ءۇشىن تاۋلىك بويىنا قىزمەت ەتەدى.
شىمكەنت قالاسى اكىمىنىڭ ءباسپاسوز قىزمەتى
