Qazirgi tańda qala aýmaǵynda qoqys tastaıtyn 490 qoqys alańshasy, 2039 qoqys konteıneri bar. Alaıda olardyń kóbiniń tozyǵy jetken. Osy maqsatta qala ákimi Murat Áıtenov qoqys salatyn konteınerlerdi memlekettik-jekemenshik áriptestik aıasynda jańartý qajettigi jóninde tapsyrma bergen bolatyn.
Osyǵan oraı, búginde Shymkentte kópqabatty turǵyn úı aýmaǵyna qoqys tastaıtyn jańa metall jáshikter ornatylýda. Jalpy osy jyly 1376 konteıner satyp alynbaq. Qazir olardyń 376-sy satyp alynyp, 240-y ornatyldy. Bul jumystar qatty turmystyq qaldyqtardy kádege jaratýǵa jáne qorshaǵan ortanyń ekologııalyq tazalyǵyn arttyrýda mańyzdy rólge ıe.
Jańa qoqys konteınerleriniń arnaıy qaqpaqtary jeńil qaldyqtardyń ushyp ketýinen, shashylýynan qorǵaıtynymen yńǵaıly.
Osy oraıda, qala turǵyndaryna kómek kórsetetin «iKomek» jedel qyzmet etý ortalyǵy ashylǵan. Ortalyq mamandary táýlik boıy turǵyndardyń qońyraýlaryna jaýap beredi. «109» biryńǵaı telefon nómirine bir aı kóleminde 14 000-ǵa jýyq qońyraý kelip túsip, olardyń 96 paıyzy qanaǵattandyrylǵan.
Kez kelgen saýalǵa 109 nómirine qońyraý shalý arqyly jaýap alýǵa bolady.
Sonymen qatar iKomek ortalyǵynyń 87777109109 vatsap nómiri de turǵyn úshin táýlik boıyna qyzmet etedi.
Shymkent qalasy ákiminiń baspasóz qyzmeti
