اتىراۋ وبلىسى قىزىلقوعا اۋدانىنىڭ اكىمدىگى جانتەرەك اۋىلىندا مەكتەپ وقۋشىسىنىڭ ينتەرنەت-سيگنالىن ۇستاۋعا تىرىسىپ، بيىكتەن قۇلاعانى تۋرالى اقپاراتتى جوققا شىعاردى، دەپ حابارلايدى قازاقپارات stopfake.kz سايتىنا سىلتەمە جاساپ.
بۇعان دەيىن كەيبىر بۇقارالىق اقپارات قۇرالدارىندا 3-سىنىپ وقۋشىسى اقجۇرەك قۋانىش مۇعالىمگە ءۇي تاپسىرماسىن جىبەرۋ ءۇشىن تراكتورعا شىققانى تۋرالى اقپارات تاراعان بولاتىن.
اۋدان اكىمدىگىنىڭ مالىمەتىنشە، بالا جانتەرەك اۋىلىنان 10 شاقىرىم جەردە ورنالاسقان قاراكول قىستاعىندا جاراقات العان. ول وندا دەمالىس كۇندەرى اتا-اجەسىنە قوناققا بارعان. ويىن بارىسىندا اقجۇرەك تراكتورعا شىعىپ، قۇلاعان. بۇل تۋرالى ول ۇلكەندەرگە ايتپاعان. دۇيسەنبىدەن سارسەنبىگە دەيىن ساباعىنا قاتىسقان.
قولىنىڭ اۋىرعانى باسىلماعان سوڭ، بەيسەنبى كۇنى اتا-اناسى بالانى اتىراۋداعى اۋرۋحاناعا الىپ بارعان. وندا ونىڭ يىعى سىنعانى انىقتالىپ، گيپس سالىنعان. دارىگەرلەر ونىڭ جاعدايىن تۇراقتى دەپ باعالاۋدا. «جانتەرەك اۋىلىنداعى №75 باستاۋىش مەكتەبى شتاتتىق رەجيمدە جۇمىس ىستەۋدە. مەكتەپتە 41 وقۋشى ءداستۇرلى فورماتتا ءبىلىم الۋدا. جانتەرەك اۋىلىندا 65 ءۇي بولسا، ونىڭ 48-ءى سىمدى ينتەرنەتكە قوسىلعان. سونداي-اق، اۋىل تۇرعىندارى 3G فورماتىنداعى سىمسىز ينتەرنەتپەن قامتاماسىز ەتىلگەن»، – دەلىنگەن اكىمدىك حابارلاماسىندا.
فوتو اشىق دەرەككوزدەن الىندى.
