Atyraý oblysy Qyzylqoǵa aýdanynyń ákimdigi Janterek aýylynda mektep oqýshysynyń ınternet-sıgnalyn ustaýǵa tyrysyp, bıikten qulaǵany týraly aqparatty joqqa shyǵardy, dep habarlaıdy QazAqparat stopfake.kz saıtyna silteme jasap.
Buǵan deıin keıbir buqaralyq aqparat quraldarynda 3-synyp oqýshysy Aqjúrek Qýanysh muǵalimge úı tapsyrmasyn jiberý úshin traktorǵa shyqqany týraly aqparat taraǵan bolatyn.
Aýdan ákimdiginiń málimetinshe, bala Janterek aýylynan 10 shaqyrym jerde ornalasqan Qarakól qystaǵynda jaraqat alǵan. Ol onda demalys kúnderi ata-ájesine qonaqqa barǵan. Oıyn barysynda Aqjúrek traktorǵa shyǵyp, qulaǵan. Bul týraly ol úlkenderge aıtpaǵan. Dúısenbiden sársenbige deıin sabaǵyna qatysqan.
Qolynyń aýyrǵany basylmaǵan soń, beısenbi kúni ata-anasy balany Atyraýdaǵy aýrýhanaǵa alyp barǵan. Onda onyń ıyǵy synǵany anyqtalyp, gıps salynǵan. Dárigerler onyń jaǵdaıyn turaqty dep baǵalaýda. «Janterek aýylyndaǵy №75 bastaýysh mektebi shtattyq rejımde jumys isteýde. Mektepte 41 oqýshy dástúrli formatta bilim alýda. Janterek aýylynda 65 úı bolsa, onyń 48-i symdy ınternetke qosylǵan. Sondaı-aq, aýyl turǵyndary 3G formatyndaǵy symsyz ınternetpen qamtamasyz etilgen», – delingen ákimdik habarlamasynda.
Foto ashyq derekkózden alyndy.
