2 قىركۇيەكتە نۇر-سۇلتاندا "نۇر وتان" پارتياسىنىڭ پرايمەريزىنە قاتىسىپ جاتقان بىرنەشە ادام ادىلەتسىزدىككە شاعىمدانىپ، قالالىق پارتيا فيليالىنا باردى دەپ حابارلايدى «ادىرنا» ۇلتتىق پورتالى ازاتتىق راديوسىنا سىلتەمە جاساپ.
مۇگەدەك بالالار پروبلەماسىن ءجيى كوتەرىپ جۇرگەن بەلسەندى بوتاگوز سۇلتانوۆانىڭ ازاتتىققا ايتۋىنشا، 1 قازاندا پرايمەريز سايتىنىڭ كۇنى بويى جۇمىس ىستەمەگەنىنە قاراماستان كەيبىر كانديداتتار جۇزدەن مىڭعا دەيىن داۋىس جيناعان.
- ەگەر كەشە تۇنىمەن سايت جۇمىس ىستەمەسە ولار قالاي داۋىس جيناعان؟ الدە ولارعا بولەك "جاسىل ءدالىز" بولىنگەن بە؟ ولاي بولسا بۇل تسيركتىڭ نە كەرەگى بار؟ – دەيدى ول.
بوتاگوز سۇلتانوۆاعا قوسا "نۇر وتان" مۇشەلەرى پەرنەش ابدۋكارىموۆا مەن ادەما ەسەمباەۆا دا پرايمەريزدەگى ادىلەتسىزدىككە شاعىمدانىپ پارتيا فيليالىنا باردى. بوتاگوز سۇلتانوۆا سول جەردەن ءوزىنىڭ Facebook جەلىسىندەگى پاراقشاسىندا تىكەلەي ەفير جۇرگىزدى. وندا بەلسەندىلەرمەن "نۇر-وتان" پارتياسىنىڭ نۇر-سۇلتان قالالىق فيليالى توراعاسىنىڭ ورىنباسارى ەرلان قاناليموۆتىڭ كەزدەسكەنى كورىنەدى. ول جينالعاندارعا ارىز جازۋدى ۇسىنىپ، وعان ەكى ساعات ىشىندە جاۋاپ بەرەتىندەرىن ايتتى.
- ءبىز ءبارىمىز ءبىلىمدى ادامدارمىز. بوس سوزبەن كەز كەلگەندى كىنالاۋعا بولادى. داۋىس بەرىپ جاتقان تۇرعىندار ەمەس، تەك پارتيا مۇشەلەرى. بۇل - ولاردىڭ قۇقىعى. شاعىم جازىڭىزدار، ەكى ساعات ىشىندە جاۋاپ بەرەمىز، - دەدى ول شاعىمدانعاندارعا.
ازاتتىق ءتىلشىسى "نۇر-وتان" قالالىق پارتياسىنىڭ ءباسپاسوز قىزمەتىنە حابارلاسقان ەدى. ول جەردەگىلەر داۋدان حابارسىز بولىپ شىقتى. "انىقتايمىز" دەگەنمەن، جاۋاپ بولمادى.
ال شاعىمدانعاندارعا "ەكى ساعات ىشىندە جاۋاپ بەرەمىز" دەگەن "نۇر-وتان" پارتياسىنىڭ قالالىق فيليالى باسشىلىعى دا كەشكە دەيىن جاۋاپ بەرمەدى.
بيلىكتەگى "نۇر-وتان" پارتياسى 1-3 قازان ارالىعىندا ىشكى پارتيالىق سايلاۋ – پرايمەريز اياسىندا داۋىس بەرۋ وتكىزىپ جاتىر. پرايمەريزدە تەك پارتيا مۇشەلەرى داۋىس بەرە الادى. پارتيا كوپ داۋىس يەلەنگەندەردى 2021 جىلى وتەتىن پارلامەنت ءماجىلىس پەن جەرگىلىكتى ءماسليحات سايلاۋىنا ۇمىتكەرلەر تىزىمىنە ەنگىزۋگە ۋادە بەرگەن.
كەيبىر ساراپشىلار "نۇر وتاننىڭ" بۇل ناۋقانىن "قۇردىمعا كەتكەن پارتيانى قۇتقارۋ امالى" جانە "2021 جىلعى سايلاۋعا جاسىرىن ۇگىت-ناسيحات" دەپ سانايدى.
پرايمەريز كەزىندە بىرنەشە مۇعالىم ازاتتىققا وزدەرىن پرايمەريزدە داۋىس بەرۋ ءۇشىن تىركەلۋگە ماجبۇرلەگەنىن ايتقان. پارتيا وكىلى مۇنى جوققا شىعارعان.
فوتو اشىق دەرەككوزدەن الىندى.
