ەلباسى قازاقستانداعى ازەربايجان مەن ارميان دياسپورالارىنىڭ تاۋلى قاراباحتاعى اسكەري ءىس-ارەكەتتەردى توقتاتۋ جونىندەگى بىرلەسكەن ۇندەۋىن قولدادى، دەپ حابارلايدى "ادىرنا" ۇلتتىق پورتالى.
قازاقستان حالقى اسسامبلەياسىنىڭ توراعاسى نۇرسۇلتان نازارباەۆ جانسەيىت تۇيمەباەۆتى قابىلدادى. كەزدەسۋدە نۇرسۇلتان نازارباەۆقا قازاقستان حالقى اسسامبلەياسى مەن وڭىرلەردەگى دوستىق ۇيلەرىنىڭ قازىرگى قىزمەتى جايلى اقپارات بەرىلدى.
"ەلباسى قازاقستانداعى ازەربايجان مەن ارميان دياسپورالارىنىڭ تاۋلى قاراباحتاعى اسكەري ءىس-ارەكەتتەردى توقتاتۋ جونىندەگى بىرلەسكەن ۇندەۋىن قولدادى. قازاقستاننىڭ تۇڭعىش پرەزيدەنتى قاقتىعىستىڭ ۋشىعۋىنا الاڭداۋشىلىق ءبىلدىرىپ، قازاقستان ءۇشىن دوس مەملەكەتتەر اراسىندا كەلىسسوزدەردى باستاۋدىڭ ماڭىزدىلىعىن اتاپ ءوتتى. بۇل وڭىردەگى جاعدايدى تەزىرەك تۇراقتاندىرۋعا سەپتىگىن تيگىزەدى،"- دەلىنگەن ەلباسى سايتىندا.
قازاقستان حالقى اسسامبلەياسىنىڭ توراعاسى تاۋەلسىزدىك العان كۇننەن باستاپ حالىقتىڭ بىرلىگى، قوعامداعى تۇراقتىلىق پەن كەلىسىم ەلىمىزدىڭ باستى قۇندىلىعى بولعانىن ايتتى. وسى ورايدا بيىل 25 جىلدىعىن اتاپ ءوتىپ جاتقان قازاقستان حالقى اسسامبلەياسىنىڭ ايرىقشا رولىنە توقتالدى.
ءوز كەزەگىندە قازاقستان حالقى اسسامبلەياسى توراعاسىنىڭ ورىنباسارى ج.تۇيمەباەۆ ەلباسىنا ەتنوسارالىق قاتىناستار سالاسىنداعى مەملەكەتتىك باسقارۋدى رەفورمالاۋدىڭ جانە تالداۋ جۇمىستارىنىڭ ناتيجەلەرى تۋرالى باياندادى. الەۋمەتتىك زەرتتەۋلەردىڭ سوڭعى مالىمەتتەرىنە سايكەس، قازاقستان حالقىنىڭ 92,4 پايىزى ەتنوسارالىق احۋالدى قولايلى جانە تۇراقتى دەپ باعالاعان، ال 89,2 پايىزى مەملەكەتتىڭ ەلدەگى ەتنوسارالىق كەلىسىمدى ساقتاۋ جونىندەگى ءىس-ارەكەتتەرىن قولداپ وتىر.
سونىمەن قاتار نۇرسۇلتان نازارباەۆقا قازاقستان رەسپۋبليكاسى كونستيتۋتسياسى مەن قازاقستان حالقى اسسامبلەياسىنىڭ 25 جىلدىعىن ۇيىمداستىرۋ جانە وتكىزۋ جونىندەگى ۇلتتىق ءىس-شارالار جوسپارىنىڭ ىسكە اسىرىلۋى، قازاقستان حالقى اسسامبلەياسىنىڭ 2025 جىلعا دەيىنگى دامۋ تۇجىرىمداماسىن ىسكە اسىرۋ كەزەڭدەرى مەن پاندەميا كەزىندە ۇيىمداستىرىلعان قايىرىمدىلىق جۇمىستار تۋرالى اقپارات بەرىلدى.
كەزدەسۋ سوڭىندا قازاقستان حالقى اسسامبلەياسىنىڭ توراعاسى بىرقاتار ناقتى تاپسىرما بەردى.
