شىمكەنت: قالا اكىمى جەرگىلىكتى كاسىپكەرلەرمەن كەزدەستى

235

بۇگىن «Rixos Khadisha Shymkent» قوناق ۇيىندە وڭىرلىك كاسىپكەرلىك كەڭەسى مەن شىمكەنت قالاسى اكىمدىگىنىڭ بىرلەسكەن جيىنى ءوتتى. القالى جيىنعا قالا اكىمى م.ايتەنوۆ، كاسىپكەرلەر پالاتاسىنىڭ ديرەكتورى ن.قابىشتاەۆ جانە كەڭەس مۇشەلەرى قاتىستى.

باسقوسۋدا كارانتين كەزىندە جاپا شەككەن كاسىپكەرلەردىڭ ماسەلەلەرى تالقىلانىپ، اتالعان سالانى قايتا كوركەيتۋ جانە دامىتۋ جايلى ايتىلدى. جيىندا ءسوز العان شىمكەنت قالاسىنىڭ اكىمى مۇرات ايتەنوۆ كەزدەسۋدىڭ ماڭىزدىلىعىنا توقتالىپ، مەملەكەت تاراپىنان كورسەتىلىپ جاتقان قولداۋ شارالارى تۋرالى ماعلۇمات بەردى.

اكىمنىڭ ايتۋىنشا، قالادا كاسىپكەرلىكتى قولداۋ مەن دامىتۋ ماقساتىندا بىرنەشە مەملەكەتتىك باعدارلاما ىسكە اسىرىلۋدا. اتاپ ايتقاندا، «بيزنەستىڭ جول كارتاسى — 2025»، «قاراپايىم زاتتار ەكونوميكاسى» جانە «ەڭبەك» باعدارلامالارى بار.

— «بيزنەستىڭ جول كارتاسى-2025» باعدارلاماسى شەڭبەرىندە بانك نەسيەلەرىنىڭ پايىزدىق مولشەرلەمەسى سۋبسيديالانادى جانە نەسەيەنىڭ بەلگىلى ءبىر بولىگىن مەملەكەت كەپىلدەندىرەدى. وعان قوسا يننوۆاتسيالىق جوبالاردى ىسكە اسىرۋعا مەملەكەتتىك گرانتتار قاراستىرىلعان. جالپى، 2020 جىلعا وسى باعدارلامانى ىسكە اسىرۋعا بيۋدجەتتەن 4,5 ملرد. تەڭگە بولىنگەن. ال، «قاراپايىم زاتتار ەكونوميكاسى» باعدارلاماسى بويىنشا كاسىپكەرلەرگە سىياقى مولشەرلەمەسىن سۋبسيديالاۋ ارقىلى 6 پايىزبەن 10 جىل مەرزىمگە نەسيە بەرىلەدى. كاسىپكەردىڭ كەپىل مۇلكى جەتپەگەن جاعدايدا مەملەكەت تاراپىنان 30 پايىزدان 50 پايىزعا دەيىن كەپىل ۇسىنىلادى. سونىمەن قاتار «ەڭبەك» باعدارلاماسى اياسىندا جىلىنا 6 پايىزدىق مولشەرلەمەمەن 5 جىلعا 22 ملن. تەڭگەگە دەيىن نەسيە بەرۋ قاراستىرىلعان. سونداي-اق، الەۋمەتتىك تۇرعىدا وسال توپقا جاتاتىن ازاماتتارعا ۇستەماقىسى 4 پايىزدىق جەڭىلدەتىلگەن نەسيەلەر بەرىلەدى، — دەدى قالا باسشىسى.

بيزنەس وكىلدەرىن شىمكەنت پەن رەسپۋبليكانىڭ وزگە وڭىرلەرىندە وتكىزىلەتىن مەملەكەتتىك ساتىپ الۋ كونكۋرستارىنا بەلسەندى تۇردە قاتىسۋعا شاقىرعان شاھار باسشىسى اكىمدىكتىڭ كارانتين كەزىندە زارداپ شەككەن كاسىپكەرلەر مەن جاڭا جوبالاردى جۇزەگە اسىرعىسى كەلەتىندەرگە ءتيىستى قولداۋ كورسەتەتىنىن ايتتى.

سونىمەن قاتار، جيىندا كاسىپكەرلەر پالاتاسىنىڭ ديرەكتورى ن.قابىشتاەۆ كاسىپكەرلىك ماسەلەلەرى بويىنشا جوبالىق كەڭسە جۇمىسىنىڭ قورىتىندىسىن بايانداپ، شىمكەنتتە ءالى باسەكەلەستىك قالىپتاسپاعان باعىتتارداعى تىڭ جوبالار جايلى اڭگىمەلەدى.

شىمكەنت قالاسى اكىمىنىڭ ءباسپاسوز قىزمەتى

پىكىرلەر
رەداكتسيا تاڭداۋى