شىمكەنت: قالا اكىمى م. اۋەزوۆ اتىنداعى وقۋ ۇجىمىمەن كەزدەستى

1541
Adyrna.kz Telegram

بۇگىن شىمكەنت قالاسىنىڭ اكىمى مۇرات ايتەنوۆ م.اۋەزوۆ اتىنداعى وڭتۇستىك قازاقستان ۋنيۆەرسيتەتىنىڭ ۇجىمىمەن كەزدەستى.

م.اۋەزوۆ اتىنداعى وڭتۇستىك قازاقستان ۋنيۆەرسيتەتى — دامىعان ءبىلىم بەرۋ جانە زەرتتەۋ ينفراقۇرىلىمى بار كوپ ءپروفيلدى جوعارى وقۋ ورنى. مۇندا باكالاۆرياتتا — 135, ماگيستراتۋرادا — 143 جانە دوكتورانتۋرادا 19 ماماندىق بويىنشا كادرلار ازىرلەنەدى.

ۋنيۆەرسيتەت ۇجىمىنا شاقىرتۋى ءۇشىن العىس ايتقان قالا اكىمى قازىر تەرەڭ لوگيكالىق ويلاۋ قابىلەتىنە يە، تىڭ يدەيالار ۇسىنىپ، جاڭا تۇرپاتتى تەحنيكا مەن تەحنولوگيا جاساي الاتىن، جاھاندانۋ جاعدايىنداعى سان قۇبىلعان ەڭبەك نارىعىنىڭ تالاپتارىنا تەز بەيىمدەلە بىلەتىن كاسىبي كادرلار دايارلاۋدىڭ قاي كەزدەگىدەن دە ماڭىزدى ەكەنىن اتاپ ءوتتى.

«بيىل ۇلتتىق قوعامدىق سەنىم كەڭەسىنىڭ ءۇشىنشى وتىرىسىندا ءسوز سويلەگەن پرەزيدەنت قاسىم-جومارت توقاەۆ جوعارى وقۋ ورىندارىن اكادەميالىق ليگالارعا ءبولۋ جونىندەگى باستاماعا قولداۋ ءبىلدىردى. ءبىرىنشى ساناتقا عىلىمي زەرتتەۋ جۇرگىزۋ الەۋەتى جوعارى، حالىقارالىق دەڭگەيدە باسەكەگە قابىلەتتى جانە ءوڭىر ەكونوميكاسىنا ىقپال ەتە الاتىن ۋنيۆەرسيتەتتەر ەنەدى. سىزدەردىڭ عىلىمي يننوۆاتسيالارىڭىز قالاداعى الەۋمەتتىك ورتانىڭ تارتىمدىلىعىن ارتتىرادى جانە وڭىردەگى ءومىر ءسۇرۋدىڭ ساپاسىن جاقسارتادى. ءبىز سىزدەردىڭ ەكونوميكانىڭ درايۆەرىنە اينالاتىن كاسىپتىك ۋنيۆەرسيتەت رەتىندە دامۋ مەن جاڭا تەحنولوگيالىق ەليتانى قالىپتاستىرۋعا باعىتتالعان ستراتەگيالارىڭىزدى قولدايمىز. سىزدەرگە شىعارماشىلىق تابىس تىلەيمىن، — دەدى مۇرات دۇيسەنبەكۇلى.

كەزدەسۋ بارىسىندا اكىم بوللون پروتسەسى جانە اكادەميالىق ۇتقىرلىق ورتالىعىنىڭ جۇمىسىمەن تانىستى. بۇل ورتالىق سەرىكتەس ۋنيۆەرسيتەتتەرمەن حالىقارالىق بايلانىس ورناتۋ، ستۋدەنتتەر مەن وقىتۋشىلاردى شەت مەملەكەتتەرگە وقۋ مەن بىلىكتىلىگىن ارتتىرۋعا جولداۋ جانە وقۋ باعدارلاماسىنا بوللون پروتسەسى قاعيدالارىن ەنگىزۋ ماقساتىندا قۇرىلعان. 2019-2020 وقۋ جىلىندا سىرتقى اكادەميالىق ۇتقىرلىق باعدارلاماسىنا 74 ستۋدەنت، ال، ىشكى اكادەميالىق ۇتقىرلىق باعدارلاماسىنا 60 ستۋدەنت قاتىسقان.

شاكىرتتەر دامىعان ەلدەردىڭ ۇزدىك ۋنيۆەرسيتەتتەرىنە جولدانعان. اتاپ ايتقاندا، ولاردىڭ قاتارىندا گەرمانياداعى حوف قولدانبالى عىلىمدار ۋنيۆەرسيتەتى، يسپانياداعى كاديسا، پولشاداعى لودزين، وڭتۇستىك كورەياداعى سانگميونگ جانە باسقا دا ۋنيۆەرسيتەتتەر بار.

ورتالىقتىڭ ديرەكتورى كورونوۆيرۋستى ينفەكتسيانىڭ تارالۋىنا جول بەرمەۋ ماقساتىندا ستۋدەنتتەردى اكادەميالىق ۇتقىرلىق باعدارلاماسى بويىنشا وزگە وقۋ ورىندارىنا جىبەرۋ توقتاتىلعانىن ايتتى. پاندەميا باستالاردان بۇرىن كەتكەن ستۋدەنتتەر دە كەرى شاقىرتىلىپتى. بۇگىندە شەت مەملەكەتتەردە ۋنيۆەرسيتەتتىڭ ستۋدەنتتەرى جوق. پاندەميا اياقتالعانعا دەيىن اكادەميالىق ۇتقىرلىق باعدارلاماسى بويىنشا وقىتۋ ونلاين فورماتتا جۇرگىزىلەدى.

مۇنان كەيىن قالا اكىمى «پاراسات» قۇقىقتىق مادەنيەتتى قالىپتاستىرۋ ورتالىعىنىڭ جۇمىسىمەن تانىستى.

ۋنيۆەرسيتەتتىڭ ميسسياسى ساپالى، باسەكەگە قابىلەتتى مامان دايىنداۋ. ول ءۇشىن ستۋدەنتتەرگە بىلىمىمەن قوسا تاربيە بەرىلۋى كەرەك. سوندىقتان «پاراسات» ورتالىعى ۋنيۆەرسيتەت قابىرعاسىندا ادالدىق، پاراساتتىلىق، جاۋاپكەرشىلىك، ىزگىلىك سياقتى قاسيەتتەردى دامىتۋ ماقساتىندا جۇمىس ىستەيدى.

سونداي-اق، اكىم «رۋحاني جاڭعىرۋ» باعدارلاماسى اياسىندا اشىلعان «مۇحتارتانۋ» عىلىمي-زەرتتەۋ ورتالىعىنىڭ جانە «Smart Square» ستۋدەنتتەرگە قىزمەت كورسەتۋ ورتالىعىنىڭ جۇمىسىمەن دە تانىسىپ شىقتى.

«SMART SQUARE» ستۋدەنتتەرگە قىزمەت كورسەتۋ ورتالىعى - بۇل م.اۋەزوۆ اتىنداعى وڭتۇستىك قازاقستان ۋنيۆەرسيتەتىنىڭ قىزمەت كورسەتۋدىڭ اشىقتىعى مەن قولجەتىمدىلىگى ءۇشىن جاعداي جاساۋ، قىزمەت كورسەتۋدىڭ جوعارعى ستاندارتتارىن ەنگىزۋ، سىبايلاس-جەمقورلىق قاۋىپتەرىنىڭ الدىن الۋ، ءبىلىم بەرۋ ساپاسىن ارتتىرۋ جانە اكادەميالىق ادالدىق قاعيدالارىن ساقتاۋدى قامتاماسىز ەتۋگە باعىتتالعان سەرۆيس ورتالىعى.
سونىمەن قاتار قالا اكىمى «ۋنيۆەرسيتەت عىلىمىن قالا ەكونوميكاسىمەن ينتەگراتسيالاۋ باعىتتارى» عىلىمي جەتىستىكتەر كورمەسىن ارالاپ، ۋنيۆەرسيتەتتىڭ عىلىمي-زەرتتەۋ ورتالىقتارى مەن زەرتحانالارىنىڭ جۇمىسىمەن تانىستى.

ايتا كەتەيىك، بۇگىندە م.اۋەزوۆ اتىنداعى وڭتۇستىك قازاقستان ۋنيۆەرسيتەتىندە 22 مىڭنان استام ستۋدەنت، 532 ماگيسترانت جانە 142 PhD دوكتورانت ءبىلىم الۋدا.

شىمكەنت قالاسى اكىمىنىڭ ءباسپاسوز قىزمەتى

پىكىرلەر