بىرىڭعاي اسسوتسياتسيا Qazaq kuresi برەندىن ناسيحاتتايدى

628

قازاقستاندىق سپورت الەمىندە ماڭىزدى وقيعا ورىن الدى – ءۇش Qazaq kuresi ۇيىمدارى ءبىر اسسوتسياتسياعا بىرىكتىرىلدى، دەپ حابارلادى Qazaq kuresi اسسوتسياتسياسىنىڭ ءباسپاسوز قىزمەتى.

بۇل ترانسفورماتسيا ۇلتتىق سپورتتىڭ قازاقستاندا جانە حالىقارالىق ارەنادا ودان ءارى دامۋىنا قۋاتتى سەرپىن بەرۋدى كوزدەيدى.
بۇعان دەيىن Qazaq kuresi ءۇش ۇيىمنان – الەمدىك، رەسپۋبليكالىق، حالىقارالىق فەدەراتسيالاردان تۇراتىن. بۇل ۇلتتىق بىرىنشىلىكتى ءتيىمدى باسقارۋ مەن دامىتۋ پروتسەسىن ەداۋىر قيىنداتتى.

«قايتا قۇرۋ ۇيىم قىزمەتىن ورتالىقتاندىرۋعا، اپپاراتتى ۇستاۋ شىعىندارىن وڭتايلاندىرۋعا، قاراما-قايشىلىقتار سەبەبىن جانە ءىس-ارەكەتتىڭ بىتىراڭقىلىعىن جويۋعا مۇمكىندىك بەرەدى. سونىمەن بىرگە حالىقارالىق ارەنادا جانە قازاقستاندا اۋقىمدى مىندەتتەردى ءبىر ۇيىم شەڭبەرىندە جۇزەگە اسىرۋعا جاعداي جاسايدى»، – دەپ ءتۇسىندىردى Qazaq kuresi اسسوتسياتسياسىنىڭ باس ديرەكتورى ابات يمامباەۆ.

Qazaq kuresi اسسوتسياتسياسى نۇر-سۇلتاندا 2020 جىلدىڭ اقپانىندا قۇرىلدى. بۇگىندە ول بىرىڭعاي ورتالىقتاندىرىلعان ۇيىمعا اينالدى. Qazaq kuresi اسسوتسياتسياسىنىڭ پرەزيدەنتى – كارىم ءماسىموۆ.

قازىردىڭ وزىندە قازاق كۇرەسىن دامىتۋ جانە ناسيحاتتاۋ بويىنشا اۋقىمدى جۇمىس جۇرگىزىلۋدە. عىلىمي-تاجىريبەلىك بازانى نىعايتۋ، ءبىلىم بەرۋ باعدارلامالارىن ىسكە اسىرۋ، مامانداردى قايتا دايارلاۋ جانە ولاردىڭ بىلىكتىلىگىن ارتتىرۋ ماقساتىندا «جەكپە-جەك» سارايى بازاسىندا Qazaq kuresi اكادەمياسى قۇرىلدى. ول ءتيىستى باعدارلامالار ازىرلەپ، كادرلاردى قايتا دايارلايدى جانە بىلىكتىلىگىن ارتتىرادى، عىلىمي زەرتتەۋلەر جۇرگىزىپ، ايماقتىق جانە حالىقارالىق تاقىرىپتىق فورۋمدار وتكىزەدى.

ۇلتتىق سپورتتى ناسيحاتتاۋ بالالار سپورتىنىڭ دامىپ، بۇقارالىق سيپات الۋىنسىز مۇمكىن ەمەس. سوندىقتان مەكتەپتەردە قازاق كۇرەسىن دامىتۋدىڭ ارنايى باعدارلاماسى جاسالىپ، جۇزەگە اسىرىلدى.

قازىر ون ەلوردالىق مەكتەپ بازاسىندا سەكتسيالار اشىلدى. اسسوتسياتسيانىڭ «نازارباەۆ زياتكەرلىك مەكتەپتەرى» دببۇ-مەن بىرلەسكەن ءىس-قيمىل جوسپارى جاسالدى. دەنە شىنىقتىرۋ مۇعالىمدەرى وقۋ سەمينارلارىنا قاتىسىپ، بالالار ءۇشىن چەمپيون بالۋاندارمەن كەزدەسۋلەر ۇيىمداستىرىلادى. پاندەميانى ەسكەرە وتىرىپ، Qazaq kuresi بويىنشا بەينە وقۋلىقتار دايىندالۋدا.

«Qazaq kuresi ۇلتتىق سپورتىنىڭ ستراتەگيالىق جارناماسى مەن كەڭىنەن تارالۋى ەلباسى – قازاقستاننىڭ تۇڭعىش پرەزيدەنتى ن.ءا.نازارباەۆتىڭ« رۋحاني جاعىرۋ» باعدارلاماسىنا سايكەس كەلەدى. ويتكەنى جوبانىڭ تۇپكى ماقساتى – قازاق حالقىنىڭ ۇلتتىق بىرەگەيلىگىن ساقتاۋ جانە نىعايتۋ، قازاق كۇرەسىن ناسيحاتتاۋ ارقىلى حالىقارالىق ارەنادا قازاقستاننىڭ وڭ ءيميدجىن قالىپتاستىرۋ»، – دەيدى ا.يمامباەۆ.

جاڭادان قۇرىلعان اسسوتسياتسيانىڭ الدىندا شەشۋدى قاجەت ەتەتىن كۇردەلى مىندەتتەر تۇر: بۇل – ۇلتتىق مادەني مۇرا جانە ۇلتتىق بىرىنشىلىك رەتىندە قازاق كۇرەسىن دامىتۋ، دامىتۋ قىزمەتىن جان-جاقتى اقپاراتتىق قولداۋ، مەكتەپ جاسىنا دەيىنگى بالالار، مەكتەپ وقۋشىلارى، تجكب، جوو ستۋدەنتتەرى، قۇقىق قورعاۋ ورگاندارىنىڭ قىزمەتكەرلەرى، ارنايى مەملەكەتتىك ورگاندار جانە اسكەري كافەدرالار ءۇشىن Qazaq kuresi بويىنشا ءبىلىم بەرۋ باعدارلامالارىن ەنگىزۋ.
تاعى ءبىر باسىم باعىت – بالالار مەن جاستار اراسىندا بۇقارالىق، كاسىبي سپورتتى، سونداي-اق مۇمكىندىگى شەكتەۋلى جاندارعا ارنالعان سپورت تۇرلەرىن Qazaq kuresi (-سۋردو، -تيفلو Qazaq kuresi) ارقىلى دامىتۋ، وقۋ-ادىستەمەلىك جانە زەرتتەۋ قىزمەتىن ۇيىمداستىرۋ جانە جۇزەگە اسىرۋ.

تۇپكى ماقسات – Qazaq kuresi ۇلتتىق برەندىن قالىپتاستىرۋ.
اتاقتى بالۋان، قازاقتىڭ تۇڭعىش كلاسسيكالىق كۇرەستەن وليمپيادا چەمپيونى جاقسىلىق ۇشكەمپىروۆ ءوزىنىڭ سوڭعى سۇحباتتارىنىڭ بىرىندە شاشىراڭقى Qazaq kuresi فەدەراتسيالارىن بىرىگۋگە شاقىرعان بولاتىن.

«كۇرەس – تاباندىلىق، ەرىك-جىگەر مەن سپورتشىنىڭ رۋحى كورىنەتىن امبەباپ سپورت. بۇكىل ءومىرىمىز دە كۇرەستەن تۇرادى. ءبىز ونى باعالاۋىمىز، دامىتۋىمىز، ناسيحاتتاۋىمىز كەرەك. بولىنبەي، كەرىسىنشە، بىرىگۋىمىز كەرەك. ءبىزدىڭ كۇشىمىز بىرلىكتە! مەن بارلىق Qazaq kuresi فەدەراتسيالارىن بىرىكتىرۋ يدەياسىن قولدايمىن»، – دەگەن بولاتىن باتىر ۇشكەمپىروۆ.

قازىرگى ۋاقىتتا قازاقستاندا قازاق كۇرەسىمەن 120 مىڭنان استام ادام اينالىسادى. بىرىڭعاي Qazaq Kuresi سسسوتسياتسياسىنىڭ قۇرىلۋىمەن، ناسيحاتتاۋدىڭ جۇيەلى تاسىلىمەن، وسى سپورتتاعى پالۋاندار سانى ايتارلىقتاي وسەتىنى انىق.

فوتو مۇراعاتتان الىندى

پىكىرلەر
رەداكتسيا تاڭداۋى