اقپارات جانە قوعامدىق دامۋ ءمينيسترى ايدا بالاەۆا بىلتىر قۇرىلعان ۇلتتىق قوعامدىق سەنىم كەڭەسىنىڭ ءبىر جىلدان استام ۋاقىتتىڭ ىشىندەگى جۇمىسىن قورىتىندىلادى. قر پرەزيدەنتى تەلەراديوكەشەنىنىڭ YouTube ارناسىنداعى «بالاەۆاعا 3 سۇراق» باعدارلاماسىنىڭ 6-شىعارىلىمىندا مينيستر ۇلتتىق كەڭەستىڭ باستى ەڭبەگى، جوسپارى مەن كەلەشەگى تۋرالى ويىمەن ءبولىستى، دەپ حابارلايدى قازاقپارات ءتىلشىسى.
مينيستر ۇلتتىق قوعامدىق سەنىم كەڭەسى قۇرىلعاننان بەرى ءبىر جىلدان ەندى اسقانىن ەسكە سالدى. وسى ۋاقىت ىشىندە قوعامدى ەلەڭ ەتكىزگەن ءبىرشاما شارۋا اتقارىلىلعان. ەڭ نەگىزگى ناتيجە رەتىندە – ساياسي رەفورمالار توپتاماسىن ايتۋعا بولادى. اتاپ ايتقاندا «بەيبىت جينالىستاردى ۇيىمداستىرۋ جانە وتكىزۋ ءتارتىبى تۋرالى» جاڭا زاڭ قابىلدانىپ، «ساياسي پارتيالار تۋرالى»، «سايلاۋ تۋرالى»، «پارلامەنت جانە ونىڭ دەپۋتاتتارىنىڭ مارتەبەسى تۋرالى» زاڭدارعا وزگەرىستەر ەنگىزىلگەن.
قىلمىستىق كودەكستىڭ 130-بابى قىلمىس ساناتىنان الىنىپ تاستالىپ، اكىمشىلىك كودەكسكە اۋىستىرىلعان. 174- باپتاعى باس بوستاندىعىنا ايىرۋ جازاسى – ايىپپۇل سالۋمەن الماستىرىلعان. «ارداگەرلەر تۋرالى» جاڭا زاڭ قابىلدانىپ، سىرتقى قارىز بىرىڭعاي رەەسترى بەكىتىلدى. شەتەلدىك جۇمىس كۇشىنە كۆوتا ەكى ەسەگە قىسقاردى. اۋىل شارۋاشىلىق جەرلەرىن ءتيىمدى پايدالانۋ بويىنشا كوسموستان مونيتورينگ جوباسى جۇزەگە اسىپ، مەملەكەت مەنشىگىنە 7 ملن گا پايدالانىلمايتىن جايىلىم قايتارىلدى.
«ۇلتتىق قوعامدىق سەنىم كەڭەسى ءبىزدىڭ قوعامدا وي ەركىندىگى مەن پىكىر الۋاندىعىنا شەكتەۋ جوق ەكەنىن كورسەتتى. ارينە، كەڭەس ءوز جۇمىسىن «حالىق ۇنىنە قۇلاق اساتىن مەملەكەت» قاعيداسىمەن الدا جالعاستىرا بەرەتىن بولادى. ۋاقىت تالابىنا ساي، وندا كوتەرىلەتىن ماسەلەلەر، ۇسىنىستار ۇنەمى جاڭارىپ، جاڭعىرىپ وتىرادى. مىسالى، جاقىندا ۇلتتىق كەڭەس مۇشەلەرىنىڭ ۇسىنىسىمەن مادەني-رۋحاني ماسەلەلەردى دامىتۋ باعىتىندا جاڭادان توپ قۇرىلاتىن بولادى. ياعني، كەڭەس جۇمىسى، تەك بەلگىلى سالالاردا عانا شەكتەلىپ قالمايدى. ول قوعامنىڭ بارلىق سالاسىنداعى كوكەيتەستى ماسەلەلەرمەن اينالىسادى»، - دەيدى ايدا بالاەۆا باعدارلاما بارىسىندا.
