قىزتاي دۇيسەبەكوۆا ءجۇزىنشى كۇزىن جۇقپالى اۋرۋلار اۋرۋحاناسىندا دارىگەرلەرمەن بىرگە قارسى الدى. ەكى عاسىردىڭ كۋاسى بولعان قارت كىسىنى مەديتسينا ماماندارى 100 جاسقا تولعان كۇنىندە اۋرۋحانادان شىعارىپ سالدى.
قىزتاي اجەي 7 قىركۇيەك كۇنى اسار شاعىناۋدانىنداعى جۇقپالى اۋرۋلار ورتالىعىنا اۋىر حالدە جەدەل جاردەم كولىگىمەن جەتكىزىلگەن ەدى. دارىگەرلەر ناۋقاسقا وكپەنىڭ كومپيۋتەرلىك توموگرافياسىن جاساپ، اجەيدىڭ وكپە ءتىنىنىڭ 55% زاقىمدالعانى انىقتالدى. بۇعان قوسا قارت كىسىنى اسقازانىنداعى جاراسى مازالاپتى.
دارىگەرلەر ناۋقاستى بولىمشەگە جاتقىزىپ، ۆيرۋسقا قارسى تەراپيالىق ەم جۇرگىزدى. سونىڭ ناتيجەسىندە قارت انا تولىعىمەن ايىعىپ، ءدال تۋعان كۇنىندە اۋرۋحانادان ۇيىنە شىقتى. دارىگەرلەرگە العىسىن ءبىلدىرىپ، اق باتاسىن بەردى.
“تۇسكەن كەزدە جاعدايى اۋىر بولاتىن. حاتتاماعا سايكەس ەم جۇرگىزدىك. قازىر جاعدايى ءبىر قالىپتى”، - دەدى ەمدەۋشى دارىگەرى تىلەنشينا ءلاززات.
شىمكەنت قالاسىنىڭ دەنساۋلىق ساقتاۋ باسقارماسى
