تالانتسىز جازعىشتاردىڭ بەلگىلەرى
1. تالانتسىزدار توپتىق ورتادا ءوزىنىڭ اقىن ەكەنىن تاسىراڭداعان جاساندى مىنەزى ارقىلى كورسەتىپ قالۋدى كوزدەيدى.
2. تالانتسىز جازعىشتار ولەڭدى نەعۇرلىم اكتەرلىك شەبەرلىكپەن وقۋعا تىرىسادى.
3. تالانتسىز جازعىشتار ءوزى جايلى جاقسى ءسوز ايتقان ادامداردى توڭىرەكتەيدى.
4. تالانتسىز جازعىشتار كىم كورىنگەندى ارقاعا قاعا بەرمەيتىن، قاس تالانتتاردان بارىنشا اۋاشا جۇرەدى. ولاردى جيىندارىنا، جينالىستارىنا شاقىرمايدى...
5. تالانتسىز جازعىشتار تالانتتار جايلى ازىلدەگەن بولىپ، نەمەسە ەندى بىرەۋگە سىر ايتقان بولىپ، جايسىز، وتىرىك سوزدەر تاراتادى.
6. تالانتسىز جازعىشتار كوبىندە ۇيىرىمەن جۇرگەندى ۇناتادى.
7. تالانتسىز جازعىشتار ءبىر جۇمىس ىستەسە، مۇمكىندىگىنشە سول ورتاعا وزىمەن مۇددەلەستەرىن عانا شاقىرادى.
8. تالانتسىز جازعىشتار تۇك بىتىرمەسە دە تانىمال، بىرنەشە ادەبي سىيلىقتاردىڭ يەگەرى.
9. تالانتسىز جازعىشتار موينىن سوزىپ، وكشەسىن كوتەرۋدەن شارشامايدى، پايدا تۇسەتىن جەردەن قالمايدى.
شاكىرتتەرىمە ءبىرىنشى كەڭەس
1.باسقانىڭ ءۇمىتىن ءولتىرۋ ادام ولتىرۋمەن بىردەي…
2.سەنىمەن بولماشى تيىندارىن بولىسكەن نەمەسە قامشىنىڭ سابىنداي قىسقا عۇمىردا سەنىڭ يگىلىگىڭ ءۇشىن 10 مينۋت ۋاقىتىن بولگەن ادامعا قۇرمەتپەن قارا!
3.ومىردە سەنى سەبەپسىز جەك كورەتىن ادامدار كەزدەسەدى…وعان رەنجىمە! سەنى نە ءۇشىن ادامداردىڭ ءبارى جاقسى كورۋى كەرەك؟ سەن بىراق ەشكىمدى جەك كورمەۋگە قۇلشىن! ءوزىڭدى سەبەپسىز جەك كورگەن قالىپسىز ادامداردىڭ دەڭگەيىنە ءتۇسىپ نە ىستەيسىڭ؟!
4.اۋزىنان "نۇر شاشاتىنداردى", جۇرەگىنەن نۇر شاشاتىنداردان جوعارى قويما. (ساعان ءتاتتى ءسوزدى كوپ ايتاتىن، سەن جاقسى كورەتىندەر باسىڭا ءىس تۇسكەندە تابىلماي قالعان جەردە، جۇرەگىنەن نۇر شاشاتىن جانداردان شاراپات كورەسىڭ…)
5.قاتەلىكتەرى ءۇشىن كەشىرىم سۇراي بىلمەۋ دە، كەشىرە بىلمەۋ دە - السىزدىك.
6.اسپانداعى بۇلتتىڭ كولەڭكەسىنە قالاي سەنىم ارتۋعا بولماسا، سولاي سەنىم ارتۋعا بولمايتىن ادامدار بار. بىراق سەنىم ارتۋعا بولمايتىن ءبىر ادام ءۇشىن، ادامزاتقا دەگەن سەنىمىڭنىڭ ايناسىن سىندىرما.
7.ومىردە ساعان كومەكتەسۋگە ەشكىمنىڭ مىندەتتى ەمەس ەكەنىن ءتۇسىن. بىراق سەن باسقالارعا قايىرىم جاساۋدى مىندەتىم دەپ ۇق!..
8.باسقالاردىڭ سەنىمىنە، سالت-ساناسىنا قۇرمەتپەن قارا. مەيلى ول ەڭ جابايى تايپا بولسا دا. ( جاۋىزدىقتىڭ جالاۋىن كوتەرسە ءسوز باسقا…)
9.كۇللى تىرشىلىك يەسى ءۇشىن جۇرەگىڭ اۋىراتىن بولسىن!
10.ادامنىڭ قولىمەن بەرىلەتىن سىيلىقتان قۇر قالساڭ دا، جاراتۋشىنىڭ قولىمەن بەرىلەتىن سىيلىقتان قۇر قالما!
شاكىرتتەرىمە ءۇشىنشى كەڭەس
1.سەندەر مۇددەشىل، ءوزىمشىل بولماڭدار.سەن قانشا ادامنىڭ قامىن ويلاساڭ، قۇداي ساعان سونشا ادامنىڭ نەسىبەسىن بەرەدى.
2.سەندەر ۇساق قۋلىعىمدى باسقالار بىلمەي قالۋى مۇمكىن دەگەن ويدا بولماڭدار. سەنىڭ باسقا جايلى نە ويلاعانىڭدى قۇداي قارسى جاقتاعى ادامعا جەتكىزىپ قويادى. قاشاندا نيەتىڭ تازا بولسىن!
3.ساعان مەيىرىممەن قارعان ادامنىڭ وزگەرگەنىن سەزسەڭ الدىمەن ءوزىڭدى تەكسەر. بالكىم سەن ءبىر قاتە قادامدار جاساعان شىعارسىڭ... ء(سوز بەن ءىستى بىلاي قويعاندا ول ادام جايلى جامان ويلاعانىڭنىڭ ءوزى جەتكىلىكتى)
4.سەندەر ءوز كەمشىلىكتەرىڭدى اقتاپ الۋعا قۇمار بولماڭدار. كەمشىلىگىن اقتاپ الۋ ادال ادامنىڭ ءىسى ەمەس. ادال ادام اقتالعاننىڭ ورنىنا كەمشىلىگىن تۇزەتۋگە كىرىسەدى.
5.سەندەر ءوز السىزدىگىن باسقا بىرەۋ جايلى وتىرىك ءسوز تاراتىپ بۇركەمەلەيتىن، سول كۇناسى ءۇشىن ۇنەمى اللانى اۋزىنان تاستامايتىن ەكىجۇزدىلەردەن بولماڭدار. ەكى ءجۇزدى ادامنىڭ ەكى دۇنيەدە جولى بولمايدى.
6.سەندەر الدىمەن ادامي سەزىمدەرىڭدى جەتىلدىرىپ الىڭدار، سوسىن ارى قاراي جۇرتقا كەرەك ءسوزدى ايتۋعا قۇقىلى بولاسىڭدار.
شاكىرتتەرىمە ءتورتىنشى كەڭەس...
1. كەمەلدىلىككە جەتىڭدەر! كەمەل ادام ءبىر ءتۇيىر تارىنىڭ دانىندە بولىسە الادى. جارتى ءتۇيىر تارىعا قاناعات ەدى...
2. كەمەلدىلىككە جەتىڭدەر! كەمەلدەنبەگەن ادام تاۋلاردى، وزەن-كولدەردى، ۇلان-عايىر القاپتاردى بولىسە المايدى.
3. كەمەلدىلىككە جەتىڭدەر! كەمەل ادام بۇلاقتاردى لايلامايدى. كوڭىلدەردى كىرلەتپەيدى.
4. كەمەلدىلىككە جەتىڭدەر! كەمەل ادام زيانسىز ادام. ودان گۇلدىڭ جۇپارى اڭقيدى. ودان قولقانى قاباتىن جاعىمسىز ءيىس شىقپايدى. ول ەشكىمدى جاماندامايدى.
5. كەمەلدىلىككە جەتىڭدەر! كەمەل ادامنىڭ جاۋى جوق. ويتكەنى ونى باسقالار جاۋ كورگەنىمەن، ول ەشكىمدى جاۋ كورمەيدى. كەمەل ادامنىڭ ءومىرى تىنىش.
شاكىرتتەرىمە بەسىنشى كەڭەس
1. ومىردەگى قيىنشىلىقتار ءبىزدىڭ قۋانىشتارىمىزدىڭ نەگىزى. ءبىز قيىنشىلىقتى جەڭگەندە قۋانىشقا بولەنەمىز. قينالعان ساتتەرىڭدە كەلەتىن قۋانىشتىڭ كۇلكىسىن سەزىنە ءبىل!
2. تابىس باقىتتىڭ كەپىلى ەمەس. ءبىز كوپتەگەن تابىستى، بىراق باقىتسىز ادامدارمەن بىرگە ءومىر ءسۇرىپ جاتىرمىز. تابىستىڭ سوڭىنان جۇگىرىپ، باقىتسىز بولىپ قالماڭدار!
3. كوزگە كورىنەتىن زاتقا قول سوزىپ، كوزگە كورىنبەيتىن زاتتان ايىرىلىپ قالما. ساعان ءتيecىلى بايلىق باسقانىڭ كوڭىلىنە جاسىرۋلى بولۋى مۇمكىن. باسقانىڭ كوڭىلىنە قاراي جۇرىڭدەر!
4. جاقسىلىققا سەنىپ ءومىر سۇرىڭدەر. جاقسىلىق كۇن سەكىلدى، كۇن باتقانىمەن قايتا شىعادى.
5. بيىك تاۋلار سەكىلدى بولۋعا تالپىنىڭدار. تابيعي ءمولدىر بۇلاقتار بيىك تاۋلاردان عانا باستاۋ الادى.
