Talantsyz jazǵyshtardyń belgileri
1. Talantsyzdar toptyq ortada óziniń aqyn ekenin tasyrańdaǵan jasandy minezi arqyly kórsetip qalýdy kózdeıdi.
2. Talantsyz jazǵyshtar óleńdi neǵurlym akterlik sheberlikpen oqýǵa tyrysady.
3. Talantsyz jazǵyshtar ózi jaıly jaqsy sóz aıtqan adamdardy tóńirekteıdi.
4. Talantsyz jazǵyshtar kim kóringendi arqaǵa qaǵa bermeıtin, qas talanttardan barynsha aýasha júredi. Olardy jıyndaryna, jınalystaryna shaqyrmaıdy...
5. Talantsyz jazǵyshtar talanttar jaıly ázildegen bolyp, nemese endi bireýge syr aıtqan bolyp, jaısyz, ótirik sózder taratady.
6. Talantsyz jazǵyshtar kóbinde úıirimen júrgendi unatady.
7. Talantsyz jazǵyshtar bir jumys istese, múmkindiginshe sol ortaǵa ózimen múddelesterin ǵana shaqyrady.
8. Talantsyz jazǵyshtar túk bitirmese de tanymal, birneshe ádebı syılyqtardyń ıegeri.
9. Talantsyz jazǵyshtar moınyn sozyp, ókshesin kóterýden sharshamaıdy, paıda túsetin jerden qalmaıdy.
Shákirtterime birinshi keńes
1.Basqanyń úmitin óltirý adam óltirýmen birdeı…
2.Senimen bolmashy tıyndaryn bólisken nemese qamshynyń sabyndaı qysqa ǵumyrda seniń ıgiligiń úshin 10 mınýt ýaqytyn bólgen adamǵa qurmetpen qara!
3.Ómirde seni sebepsiz jek kóretin adamdar kezdesedi…Oǵan renjime! Seni ne úshin adamdardyń bári jaqsy kórýi kerek? Sen biraq eshkimdi jek kórmeýge qulshyn! Ózińdi sebepsiz jek kórgen qalypsyz adamdardyń deńgeıine túsip ne isteısiń?!
4.Aýzynan "nur shashatyndardy", júreginen nur shashatyndardan joǵary qoıma. (Saǵan tátti sózdi kóp aıtatyn, sen jaqsy kóretinder basyńa is túskende tabylmaı qalǵan jerde, júreginen nur shashatyn jandardan sharapat kóresiń…)
5.Qatelikteri úshin keshirim suraı bilmeý de, keshire bilmeý de - álsizdik.
6.Aspandaǵy bulttyń kóleńkesine qalaı senim artýǵa bolmasa, solaı senim artýǵa bolmaıtyn adamdar bar. Biraq senim artýǵa bolmaıtyn bir adam úshin, adamzatqa degen senimińniń aınasyn syndyrma.
7.Ómirde saǵan kómektesýge eshkimniń mindetti emes ekenin túsin. Biraq sen basqalarǵa qaıyrym jasaýdy mindetim dep uq!..
8.Basqalardyń senimine, salt-sanasyna qurmetpen qara. Meıli ol eń jabaıy taıpa bolsa da. ( Jaýyzdyqtyń jalaýyn kóterse sóz basqa…)
9.Kúlli tirshilik ıesi úshin júregiń aýyratyn bolsyn!
10.Adamnyń qolymen beriletin syılyqtan qur qalsań da, jaratýshynyń qolymen beriletin syılyqtan qur qalma!
Shákirtterime úshinshi keńes
1.Sender múddeshil, ózimshil bolmańdar.Sen qansha adamnyń qamyn oılasań, qudaı saǵan sonsha adamnyń nesibesin beredi.
2.Sender usaq qýlyǵymdy basqalar bilmeı qalýy múmkin degen oıda bolmańdar. Seniń basqa jaıly ne oılaǵanyńdy qudaı qarsy jaqtaǵy adamǵa jetkizip qoıady. Qashanda nıetiń taza bolsyn!
3.Saǵan meıirimmen qarǵan adamnyń ózgergenin sezseń aldymen ózińdi tekser. Bálkim sen bir qate qadamdar jasaǵan shyǵarsyń... (Sóz ben isti bylaı qoıǵanda ol adam jaıly jaman oılaǵanyńnyń ózi jetkilikti)
4.Sender óz kemshilikterińdi aqtap alýǵa qumar bolmańdar. Kemshiligin aqtap alý adal adamnyń isi emes. Adal adam aqtalǵannyń ornyna kemshiligin túzetýge kirisedi.
5.Sender óz álsizdigin basqa bireý jaıly ótirik sóz taratyp búrkemeleıtin, sol kúnasy úshin únemi Allany aýzynan tastamaıtyn ekijúzdilerden bolmańdar. Eki júzdi adamnyń eki dúnıede joly bolmaıdy.
6.Sender aldymen adamı sezimderińdi jetildirip alyńdar, sosyn ary qaraı jurtqa kerek sózdi aıtýǵa quqyly bolasyńdar.
Shákirtterime tórtinshi keńes...
1. Kemeldilikke jetińder! Kemel adam bir túıir tarynyń dáninde bólise alady. Jarty túıir taryǵa qanaǵat edi...
2. Kemeldilikke jetińder! Kemeldenbegen adam taýlardy, ózen-kólderdi, ulan-ǵaıyr alqaptardy bólise almaıdy.
3. Kemeldilikke jetińder! Kemel adam bulaqtardy laılamaıdy. Kóńilderdi kirletpeıdi.
4. Kemeldilikke jetińder! Kemel adam zııansyz adam. Odan gúldiń jupary ańqıdy. Odan qolqany qabatyn jaǵymsyz ıis shyqpaıdy. Ol eshkimdi jamandamaıdy.
5. Kemeldilikke jetińder! Kemel adamnyń jaýy joq. Óıtkeni ony basqalar jaý kórgenimen, ol eshkimdi jaý kórmeıdi. Kemel adamnyń ómiri tynysh.
Shákirtterime besinshi keńes
1. Ómirdegi qıynshylyqtar bizdiń qýanyshtarymyzdyń negizi. Biz qıynshylyqty jeńgende qýanyshqa bólenemiz. Qınalǵan sátterińde keletin qýanyshtyń kúlkisin sezine bil!
2. Tabys baqyttyń kepili emes. Biz kóptegen tabysty, biraq baqytsyz adamdarmen birge ómir súrip jatyrmyz. Tabystyń sońynan júgirip, baqytsyz bolyp qalmańdar!
3. Kózge kórinetin zatqa qol sozyp, kózge kórinbeıtin zattan aıyrylyp qalma. Saǵan tıecili baılyq basqanyń kóńiline jasyrýly bolýy múmkin. Basqanyń kóńiline qaraı júrińder!
4. Jaqsylyqqa senip ómir súrińder. Jaqsylyq kún sekildi, kún batqanymen qaıta shyǵady.
5. Bıik taýlar sekildi bolýǵa talpynyńdar. Tabıǵı móldir bulaqtar bıik taýlardan ǵana bastaý alady.
