مەملەكەت باسشىسى توقاەۆ الماتىدا جۇمىس ساپارىمەن ەكى جەرگە باردى. اۋەلى ي.جەكەنوۆا اتىنداعى قالالىق كلينيكالىق جۇقپالى اۋرۋلار اۋرۋحاناسىنىڭ جاڭا فيليالىن ارالاپ، ودان سوڭ "كسم تەحنوۆيد» جشس جۇمىسىمەن تانىستى. بۇل تۋرالى "ادىرنا" ءتىلشىسى اقورداعا سىلتەمە جاساپ حابارلايدى.
پرەزيدەنتكە كاسىپورىننىڭ ونىمدەرى تانىستىرىلىپ، قۇرىلىس ماتەريالدارى ءوندىرىسىنىڭ تەحنولوگيالىق پروتسەسى كورسەتىلدى. مۇندا 250-دەن استام ادام جۇمىس ىستەيدى. كومپانيانىڭ جوباعا سالعان جەكە ينۆەستيتسياسى 3,8 ميلليارد تەڭگە. زاۋىتتىڭ قۋاتتىلىعى جىلىنا 475 مىڭ شارشى مەتر شىنىپاكەت شىعارۋعا جەتەدى.
سونداي-اق مەملەكەت باسشىسىنا الماتى يندۋستريالىق ايماعىنىڭ جاعدايى مەن دامۋ پەرسپەكتيۆالارى تۋرالى ايتىلدى. مۇندا جىل اياعىنا دەيىن قۇنى 85 ميلليارد تەڭگە بولاتىن 10 جوبانى جۇزەگە اسىرۋ جوسپارلانىپ وتىر.
زاۋىتقا كەلەر الدىندا ي.جەكەنوۆا اتىنداعى قالالىق كلينيكالىق جۇقپالى اۋرۋلار اۋرۋحاناسىنىڭ جاڭا فيليالىنا بارىپ، 500 ادامعا ستاتسيونارلىق مەديتسينالىق جاردەم بەرۋگە ارنالعان جانە زاماناۋي قۇرىلعىلارمەن جابدىقتالعان پالاتالاردى ارالاپ كوردى.
مەملەكەت باسشىسىنا قالاداعى مەديتسينالىق-دەموگرافيالىق احۋال جانە COVID-19 ىندەتىنە قارسى كۇرەسۋ ءۇشىن قابىلدانعان شارالار، سونداي-اق، مەديتسينالىق جەدەل جاردەم قىزمەتىنىڭ جۇمىسى جونىندە باياندالدى. پرەزيدەنت مەديتسينا قىزمەتكەرلەرىمەن اڭگىمەلەسۋ بارىسىندا ۇلتتىق دەنساۋلىق ساقتاۋ سالاسىن ودان ءارى دامىتۋ، مەديتسينالىق مەكەمەلەردى قاجەتتى قۇرىلعىلارمەن جابدىقتاۋ، توسەك-ورىن مەن ينفراقۇرىلىمدى جاڭارتۋ، سونداي-اق، دارىگەرلەردىڭ ەڭبەكاقىسىن ارتتىرۋ ماسەلەلەرىنە توقتالدى.
– 2023 جىلعا قاراي مەديتسينا قىزمەتكەرلەرىنىڭ ەڭبەكاقىسىن بۇكىل ەكونوميكاداعى ورتاشا جالاقىدان ەكى ەسە جوعارى دەڭگەيگە جەتكىزۋ مىندەتى قويىلادى. العاشقى مەديتسينالىق سانيتارلىق جاردەم بەرۋ ءىسىن دامىتۋعا باسا ءمان بەرىلەدى. وكىنىشكە قاراي، ءبىز بۇل سالاعا ۋاقىتىندا نازار اۋدارمادىق. ەپيدەميا مۇنداي ءىس-قيمىلداردىڭ قاتە ەكەنىن كورسەتتى. قازىر جىبەرگەن قاتەلىكتەرگە دۇرىس كوڭىل ءبولىپ، ولاردى تۇزەتۋىمىز كەرەك. ارينە، مەديتسينا ءاردايىم باستى نازارىمىزدا بولادى، – دەدى قاسىم-جومارت توقاەۆ.
مەملەكەت باسشىسى كوروناۆيرۋستىڭ ىقتيمال جاڭا تولقىنىنا دايىن بولۋدىڭ ماڭىزدى ەكەنىن اتاپ ءوتتى. وسى رەتتە ازاماتتارىمىزدىڭ ءومىرى مەن دەنساۋلىعىن ساقتاۋ ءۇشىن بارلىق رەسۋرستى جۇمىلدىرۋ قاجەتتىگىن ايتتى.
– قازىر بۇكىل الەمدەگى جاعداي كۇردەلى. ەۋروپا مەن امەريكادا كوروناۆيرۋستىڭ ەكىنشى تولقىنى ءوتىپ جاتىر. وسىنداي جاعدايدا ءبىز قىراعىلىق تانىتىپ، دايىن بولۋىمىز قاجەت. پاندەميانىڭ ءبىرىنشى تولقىنىنان جاقسى ساباق الدىق. بۇل تاجىريبەنىڭ پايداسى بولادى. ارينە، قيىن بولدى، قاتەلىكتەر جىبەرىلدى، سونىڭ ىشىندە، دەنساۋلىق ساقتاۋ مينيسترلىگى تاراپىنان دا اعاتتىقتار كەتتى. بۇل قاتەلىكتەردى جۇمىس بارىسىندا جوندەۋگە تۋرا كەلدى. دەگەنمەن، كەز كەلگەن تاجىريبەنىڭ، ءتىپتى اۋىر بولسا دا، پايداسى بار. سوندىقتان ەكىنشى تولقىنعا دايىن بولايىق. سودان كەيىن بۇكىل دۇنيە جۇزىمەن، حالىقارالىق قوعامداستىقپەن بىرگە بارلىق قيىندىقتى لايىقتى تۇردە ەڭسەرۋگە ءتيىسپىز، – دەدى پرەزيدەنت.
كەزدەسۋ ساڭىندا مەملەكەت باسشىسى پاندەمياعا قارسى كۇرەستىڭ كۇردەلى جاعدايىندا اتقارعان قاجىرلى ەڭبەكتەرى ءۇشىن دارىگەرلەرگە ريزاشىلىق ءبىلدىردى.
