شىدامنىڭ دا شەگى بار، جامالوۆ حالەل مىرزا!

2648
Adyrna.kz Telegram

اتىراۋ وبلىسى، جىلىوي اۋدانىنىڭ حالقىنان مازا كەتتى. كوكتەمنەن بەرى سوزىلعان كارانتين جۇرتتىڭ كۇنكورىسىن تۇرالاتىپ، ابدەن قيىنداتقان. وسىعان بايلانىستى اۋدان حالقى Facebook-تاعى «ايتارىم بار» توبىندا اكىم حالەل جامالوۆقا ۇندەۋ تاستاپ، ماسەلەنى شەشىپ بەرۋدى سۇرادى.

 كارانتينگە بايلانىستى «تەڭىز» مۇناي- گاز ءوندىرۋ كەن ورنىندا ءساۋىر ايىنان بەرى جۇمىس توقتادى. ءساۋىر، مامىر، ماۋسىم ايلارىندا كەيبىر مەكەمەلەر جۇمىسشىلارىنا جالاقى تولەگەن. ال سوڭعى ءۇش ايدان بەرى بۇل اۋداننىڭ جۇمىسشىلار نە ايلىق جوق، نە جۇمىس جوق داعدارىپ وتىرعان جايى بار. وسىعان بايلانىستى «ايتارىم بار» توبىندا ۇندەۋ تاستاعان سارمان مالىكتىڭ  جازۋىنشا، «تەڭىزدە» جۇمىس ىستەۋ - تۇبىندە ءومىر ءسۇرىپ جاتقان ەلدىمەكەن تۇرعىندارىنا بۇيىرا بەرمەيتىن كورىنەدى.

«حالىق قاشانعى جۇمىسسىز جۇرە بەرمەك. قاي توپتى وقىساڭ دا، جەرگىلىكتىلەردى المايدى «تەڭىزگە»، باسقا جاقتاردان كەلىپ جۇمىس ىستەپ  جاتقاندار دەپ كۇيىنىپ ايتىپ وتىرعاندار بار. راسىندا، نەگە جەرگىلىكتىلەر ءوز جەرىمىزدە ءوز «تەڭىزىمىزگە»  جۇمىسقا كىرە المايمىز، نەلىكتەن؟

باسقا جاقتاعىلار قالاي جۇمىسقا كىرىپ جاتىر، بۇل جەردە جەمقورلىق ورىن الىپ تۇرعان سىڭايلى ەمەس پە، دەگەن وي كەلەدى.

جۇمىسسىز جەرگىلىكتىلەردىڭ بەرەتىن اقشالارى جوق، سوندىقتان جۇمىسقا شاقىرماي ما؟ بۇل قالاي بولعانى، ماڭدايىمىز تىرەلىپ تۇرعان «تەڭىزگە» نەگە  جۇمىسقا بارا المايمىز؟

مەن اۋدان əكىمدىگىنىڭ قابىلداۋىنا كىرگەنىمدە دە، وسى مəسەلەنى قوزعاعان بولاتىنمىن.

«شەشىلەدى، جەرگىلىكتىلەردى ورنالاستىراتىن بولامىز» دەگەن قۇر ۋəدەلەرىڭىزدى حالىقتى الدارقاتقانداي نەگە ايتتىڭىزدار!

اۋدان باسشىسىنىڭ وسىنداي كەلەڭسىزدىكتى جويۋىنا نە كەدەرگى كەلتىرىپ تۇر؟

قاشانعى كۇتۋگە بولادى؟» - دەپ جازادى سارمان مالىك.

مۇناي-گاز وندىرەتىن «تەڭىز» كەن ورنىنا سول ايماقتا تۇراتىن ازاماتتاردى جۇمىسقا الماۋدىڭ استارىندا نە جاتىر؟ الىپ كەن ورنىنىڭ تۇبىندە تۇراتىن  حالىق جوق-جىتىكتەن زارداپ شەگىپ جاتقاندا، وسى اۋداننىڭ اكىمى نە سەبەپتەن بۇل ماسەلەنى شەشۋگە ات سالىسپايدى؟

«جۇمىس كەرەك، وتباسىمىزدىڭ كۇنكورىسى ناشارلادى» دەپ شىرىلداعان جىلىوي اۋدانى حالقىنىڭ جانايقايىن ەستىر قۇلاق تابىلىپ، كومەك قولى سوزىلا ما؟ اۋدان حالقىنىڭ اكىم جامالوۆ حالەل مىرزادان سۇرايتىنى -  «تەڭىزدەگى» جۇمىسىنا ازاماتتار قايتا ورالسا جانە «تەڭىزدەگى» جۇمىسقا ەڭ الدىمەن وسى جەردەگى ازاماتتار الىنسا دەگەن ءوتىنىش. جەرگىلىكتى بيلىك وكىلدەرى حالقىنىڭ سۇراۋى مەن ۇندەۋىن نازاردان تىس قالدىرمايدى دەپ سەنەمىز.

 

مۇحيت شوقان،

«ادىرنا» ۇلتتىق پورتالى.   

فوتو اشىق دەرەككوزدەن الىندى

پىكىرلەر