گەرمانيانىڭ Charite اۋرۋحاناسىندا ەمدەلىپ جاتقان رەسەي وپپوزيتسيونەرى ا. ناۆالنىي كەشە Instagram پاراقشاسىندا ءوزىنىڭ ساۋىعىپ كەلە جاتقانىن جانە جۇرە الاتىنىن حابارلادى.
«ەندى مەن باسپالداقپەن اياعى دىرىلدەپ كوتەرىلەتىن جىگىتپىن، ەسەسىنە ول: «وي، بۇل باسپالداق قوي! ونىمەن جوعارى كوتەرىلۋ كەرەك. مۇمكىن ليفت ىزدەۋىمىز كەرەك شىعار»، - دەپ ويلايدى. ال مەن بۇعان دەيىن قۇر قاراپ تۇراتىنمىن» ، - دەپ جازدى ول Instagram-دا.
وپپوزيتسيونەردىڭ ايتۋىنشا، باستاپقى كۇندەرى ول ەشنارسەنى ەسىنە تۇسىرە الماي قينالعان: "كۇن سايىن تاڭەرتەڭ دارىگەر ماعان كەلىپ: "الەكسەي، مەن تاقتا اكەلدىم، قانەكي، وعان قانداي ءسوز جازۋ كەرەكتىگىن ويلاپ تابايىق. مەن ۇمىتسىزدەنە باستادىم، ويتكەنى مەن دارىگەردىڭ نە قالايتىنىن تۇسىنگەنمەن، سوزدەردى قايدان الۋ كەرەكتىگىن تۇسىنبەدىم", - دەپ قوستى ول.
ناۆالنىي ءالى دە ەم-دوم الىپ جاتقانىن ايتىپ، ءوزىنىڭ جاعدايىن بايانداپ بەردى: "الدا كوپتەگەن ماسەلەلەردى شەشۋ كەرەك. بىراق بەرلين ۋنيۆەرسيتەتىنىڭ شاريتە كلينيكاسىنىڭ كەرەمەت دارىگەرلەرى باستى ماسەلەنى شەشىپ بەردى. ولار مەنى "تەحنيكالىق تۇرعىدان ءتىرى ادامنان" قايتادان قازىرگى قوعامنىڭ ەڭ جوعارى نىسانى بولۋعا بارلىق مۇمكىندىگى بار ادامعا – ينستاگرامدى تەز شولىپ شىعا الاتىن جانە قاي جەرگە لايك قويۋعا بولاتىنىن بىلەتىن ادامعا اينالدىردى".
ەستەرىڭىزگە سالا كەتسەك، ا. ناۆالنىي 20 تامىز كۇنى تومسك قالاسىنان ماسكەۋگە ۇشار ساتىندە ءوزىن ناشار سەزىنە باستاعان. ۇشاق ومبى اۋەجايىنا شۇعىل جاعدايدا قونىپ، ناۆالنىي اۋرۋحانانىڭ رەانيماتسيا بولىمىنە جاتقىزىلعان. 22 تامىزدا گەرمانياداعى Charite كلينيكاسىنا جەتكىزىلگەن.
2 قىركۇيەك كۇنى گەرمانيا بيلىگى بۋندەسۆەر زەرتحاناسىنا سىلتەمە جاساي وتىرىپ، ناۆالنىيدىڭ ورگانيزمىنەن «نوۆيچوك» توبىنداعى ۋدىڭ تابىلعانىن مالىمدەگەن بولاتىن. بۇل ۋ العاش رەت 2018 جىلى ناۋرىز ايىندا ۇلىبريتانيادا بارلاۋ باسقارماسىنىڭ ەكس-قىزمەتكەرى سەرگەي سكريپال مەن ونىڭ قىزى يۋليا ۋلانعاننان كەيىن بەلگىلى بولعان-دى سكريپكالدارعا قاتىستى ۇلىبريتانيا بيلىگى رەسەيدى ايىپتاعان. بىراق ماسكەۋ بۇل ايىپتى مويىنداماعان.
Charite كلينيكاسى 7 قىركۇيەكتەن باستاپ ا. ناۆالنىي كومادان شىعىپ، جاعدايى جاقسارا باستاعانىن حابارلاعان.
فوتو اشىق دەرەككوزدەن الىندى
«ادىرنا» ۇلتتىق پورتالى
