قازاق پوەزياسىنىڭ التىن تىزگىنىن ۇستاعان اقىن كىم؟

2921

- نۇرلان سارسەنباەۆ ءبىز ءسىزدى قىتاي قازاعىنان شىققان بىردەن-ءبىر مۇقاعالي تانۋشى دەپ قارايمىز. شاشاسىنا شاڭ جۇقپاعان شۋ اساۋ اقىن مۇقاعالي ءوزىنىڭ ۇلتتىق رۋحىنا باي اسىل جىرلار ارقىلى كۇللى قازاق اۋىلدارىنا ساپار تارتتى. مۇقاعاليداي مۇزبالاق اقىننىڭ الەم قازاقتارىنا تانىلۋىنا اسپان تاۋ ەتەگىن جايلاعان ەلدەن شىققان الدىڭعى بۋىن ءسوز زەرگەرلەرىمەن ونەر ساباقتاستىعى بار ما ەكەن دەپ قارايمىز، اڭگىمەنىڭ بەتاشارىن وسىدان باستاڭىز؟

– «اقىل اۋىسادى، ىرىس جۇعىسادى» دەيدى دانا حالقىمىز. اسپان تاۋ ەتەگىن جايلاعان جۇرتتا قازاق پوەزياسىنىڭ حح عاسىرداعى جارىق جۇلدىزى بولعان مۇقاعالي ماقاتاەۆتان ىلگەرگى ءوز داۋىرىندە اتاعى اسپانداعان كيەلى ونەر ءسوزدىڭ مايتالماندارىنان قاباي جىراۋ، قۇلمامبەت قۇلانايان، البان اسان بارمەنبەكۇلى، بولتىرىك اتىحانۇلى، كودەك مارالباەۆ، شالتاباي الپارۇلى، رىسكەلدى ساۋدانۇلى، شارعىن العازىۇلى، قويدىم دارۋبايقىزى،  تىلىنەن ءسوز اسىلى ۇيىعان شەشەندەردەن جانعابىل اتەكەۇلى، قاشاعان اۋەلۇلى، جامەڭكە مامبەتۇلى، سابانشى سايبەك، كۇيشىلەردەن قوجەكە نازارۇلى، ەگىنباي التىباەۆ، سىبانقۇل قالباسۇلى ت.ب. بەدەلدى ونەر تۇلعالارى وتكەن. مىنە، بۇل ونەر ارداگەرلەرى ءوزى جاساعان زامانىنىڭ تاريحي ايناسى ىسپەتتى. وسى ونەر جۇلدىزدار شوعىرىنىڭ ۇلت رۋحىنىڭ كۇن شۇعىلاسىنا شاعىلىپ، جىلت-جىلت ەتىپ شاشىراعان كۇشتى نۇر ساۋلەسى بار. مۇقاعالي انە سونداي وسى كيەلى توپىراقتىڭ نۇر ساۋلەسىنەن جارالعان اقىن. اسىرەسە، وسى ءسوز زەرگەرلەرىنىنىڭ ىشىندە جىر ءدۇلدۇلى كودەك مارالباەۆتىڭ شىعارمالارىندا ءبىر تايپا ەلدىڭ شەجىرەسى، تاريحى، سالت-سانا، ادەت-عۇرىپتارى، تىرشىلىك تىنىسى،  كۇن كورىسى قاتارلى جاقتارى تەرەڭ مەڭگەرىپ جازىلعان. «16 جىل تۋرالى» داستان كودەك شىعارماشىلىعىنىڭ ەڭ بيىك شىڭى، بۇل داستان التى الاشتىڭ ءبىرتۋار قوس ارىسى – مۇحتار اۋەزوۆپەن مۇقامەتجان تىنىشباەۆتىڭ  قۋاتتى قالامىنا ارقاۋ بولعان. مۇحتار اۋەزوۆ ايگىلى  «قيلى زامان» شىعارماسىن جازۋ ءۇشىن كودەك مارالباەۆپەن كەزدەسكەن. سودان مۇحتار كودەك جىرىن تىڭداعاننان كەيىن ونىڭ اقىندىعىنا «كەشەگى قازاق مادەنيەتىنىڭ قۇندى ءارى باي مۇراسىن تۇلا بويىنا سىيعىزا ءبىلدى» دەگەن جوعارى باعاسىن بەرگەن ەدى. حالقىمىزدان شىققان  ءىرى  اقىن ءىلياس جانسۇگىروۆتىدە البان اسان،  قۇلمامبەت قۇلانايان، بولتىرىك اتىحانۇلى، كودەك مارالباەۆ مۇرالارى قاتتى قىزىقتىرعان ەكەن. سوناۋ 1962 جىلدارى مۇقاعالي قىتايدان كەلگەن جازۋشى نۇرقاسىم قازىبەكۇلىنان ەڭ الدىمەن «سەن كودەك اقىندى بىلەسىڭ بە؟» – دەپ سۇراۋىندا تەرەڭ ءمان جاتىر.

مۇقاعالي ماقاتاەۆ اسپان تاۋ ەتەگىندە جاساعان اتى اڭىزعا اينالعان قانگەلدى، رايىمبەك باتىر سىندى قارا كوكتىڭ تۇقىمى، تەكتى اتادان تاراعان ۇرپاق.  اقىن ءوزى تۋرالى:

ۇلى ەدىم الجاننىڭ،

دوسىمىن مەن بار جاننىڭ.

جاياۋ مۇسا قازىر مەن،

ءانشى اقانداي سال جانمىن، – دەپ الەمگە جار سالىپ بارلىق ادام بالاسىن وزىنە دوس ساناعان ەكەن.

مۇقاعالي ماقاتاەۆ اسپان ەتەگىن جايلاعان ءان مەن جىردىڭ مەكەنىنەن سۋسىنداعان قازاق پوەزياسىنىڭ حح عاسىرداعى التىن تىزگىنىن ۇستاعان ۇلى اقىن.

حالقىمىزدا «تاعدىر قايتالانادى» دەيتىن تانىم بار. مۇقاعالي ماقاتاەۆ – قاسيەتتى اسپان تاۋ ەتەگىن  جايلاعان ەلدىڭ ونەر مەكتەبىنەن وقىپ، مىقتاپ تاربيە الىپ جەتىلگەن، جىر تەڭىزىن ساپىرىپ وتكەن، تاعدىر قايتالاي دۇنيەگە اكەلدەن دارىن يەسى. مۇقاعالي ماقاتاەۆتىڭ دارا تالانتىنان تۋعان ولمەس پوەزياسى حاننىڭدا، قارانىڭدا كوڭىلىن تولقىتىپ، كۇللى قازاق بالاسى جاساعان ۇلان-عايىر ولكەگە، شەكسىز دە، شەتسىز ساحاراعا، ايباتتى اسەم قالالارعا، تىرشىلىكتىڭ وتىن مازداتقان ميلليونداعان اق بوز ۇيلەردەگى قاراشالارعا دەيىن ساپار شەگىپ، قازاق بولىپ الەمگە ءتىل  قاتتى، قازاق بولىپ كۇللى دۇنيەنى شارلادى. بۇعان عالىم مىرزاتاي جولداسبەكوۆتىڭ: «مۇقاعالي ءبۇتىن ءبىر عاسىرداعى قازاق پوەزياسىن بيىكتەتىپ كەتتى»، – دەگەن ءسوزى كۋا. مۇقاعاليدىڭ اتاق-داڭققا جەتۋى، ۇلتتىق رۋحقا باي جىرلارىنىڭ تەرەڭگە تامىر تارتۋى، اسپان تاۋ ەلىندە جاساعان ونەر جۇلدىزىنان ونەگە العان، كيەلى ونەر ساباقتاستىعىنىڭ قۇدىرەتى بولسا كەرەك.

– نۇرلان  مىرزا ءسىزدى مۇقاعالي ماقاتاەۆتىڭ 80 جىلدىق مەرەيتويىنا قازاقستان جازۋشىلار وداعى باسقاراماسىنىڭ توراعاسى، قر مەملەكەتتىك سىيلىقتىڭ لاۋرەاتى نۇرلان ءورازاليننىڭ ارناۋلى شاقىرتۋىمەن كەلىپ  قاتىناسىپسىز، سول مەرەيتويداعى اسەرىڭىزبەن، كورگەن-بىلگەندەرىڭىزدى ايتا كەتسەڭىز؟

– بۇل رەتكى ساپار مەنىڭ ەسىمنەن كوتەرىلمەيتىن باقىتتى كۇندەردىڭ ءبىرى بولدى. 2011 جىلى شىلدە ايىندا قازاقستان مەملەكەتىنە تۇڭعىش كەلۋىم، ياعني تاريحي وتاندى، اتا-بابالارىمنىڭ تۋعان اتامەكەنى بولعان اسپان تاۋ ەتەگىن جايلاعان ەلدى ءبىرىنشى رەت كورۋىم. سول جىلى شىلدە ايىنىڭ 29 كۇنى قازاقستان جازۋشىلار وداعى باسقارماسىنىڭ ورنالاستىرۋى بويىنشا جەر-جەردەن كەلگەن مەرەيتوي قوناقتارى الماتى ۋاقىتى بويىنشا تاڭەرتەڭگى ساعات بەس جارىمدا الماتى قالاسىنداعى رەسپۋبليكا الاڭىنا جينالدىق. ساعات 6-دان وتكەندە قازاقستان جازۋشىلار باسقارماسىنىڭ قىزمەتكەرلەرىنىڭ جول سەرىك بولۋىمەن جولاۋشىلار اۆتوبۋسىنا وتىرىپ، قاراساز اۋىلىنا قاراي جول الدىق. جول باستاۋشىلار قازاق حالقىنىڭ اتاقتى باتىرى رايىمبەك تۇكەۇلى قانگەلدى نەمەرەسىنىڭ جوڭعارعا قارسى جورىق جولىنداعى ەلى ءۇشىن ەڭىرەگەن ەرلىكتەرىن قىسقاشا تانىستىرۋمەن بىرگە نارىنقول مەن كەگەن اۋداندارى بىرىگىپ، قازىر رايىمبەك اۋدانى دەپ اتالعاندىعى تۋرالى تۇسىنىك  جاسادى. جول-جونەكەي سوناۋ 1970 جىلداردىڭ ورتا شەنىندە، بالا كەزىمدە ەل ىشىندە شەشەن، شەجىرەشى اتالعان اتام سارسەنبايدىڭ سەنىڭ اكەڭ – توقتاسىن، ونىڭ اكەسى  – سارسەنباي، سارسەنبايدىڭ اكەسى – بايسال، ونىڭ اكەسى – ابدۇشكۇر، ودان ارى مالقارا، مالقارانىڭ اكەسى – ءاجى. ءاجى قازاققا ايگىلى باتىر رايىمبەكتىڭ بالاسى دەپ شۇبىرتا ايتقان اتاتەك شەجىرەنىڭ ءبىر ۇزىگى ەسىمە ءتۇسىپ تەبىرەنىپ كەلەمىن.

ءبىز دۇنيەدە سيرەك كەزدەسەتىن شارىن شاتقالىنان ەندەي كەسىپ ءوتىپ بۇرىنعى نارىنقول اۋدانىنىڭ باستالار تۇسىنداعى بيىك توبەنىڭ باسىنداعى اتاقتى رايىمبەك باتىردىڭ ۇلكەن ەسكەرتكىشىنىڭ قاسىنا بارىپ توقتادىق. ەسكەرتكىش باسىنا جينالعان نەشە جۇزدەگەن جۇرت باتىردىڭ كيەلى بۇلاعىنان سۋ ءىشىپ، بابانىڭ  ۇلكەن ەسكەرتكىشىنىڭ قاسىنا سۋرەتكە ءتۇسىپ ەستەلىك قالدىردىق. باتىر بابامىزدىڭ كيەلى بۇلاعىنىڭ ءزام-ءزام سۋىنان ءشولىمىز قانعانشا ءىشىپ بولىپ، مۇقاعالي ماقاتاەۆتىڭ اتا-مەكەنى قاسيەتتى قاراساز اتتى ەلدى-مەكەنگە قاراي جىلجىدىق.

جول بويىنداعى تاقتايشاعا ىلىنگەن اقىن مۇقاعاليدىڭ نەشە مىڭداعان ۇلكەيتىلگەن سۋرەتى كوزدىڭ جاۋىن الادى. مىنە، بۇل قارا ورمانداي تۋعان حالقىنىڭ ارداگەر اقىنعا جاسالعان شەكسىز سىي-قۇرمەتى بولسا كەرەك. ءبىز قاراسازعا بارعان سول كۇنى مۇقاعالي ولەڭدەرىنە جازىلعان اندەردەن «جىرلايدى جۇرەك» اتتى رەسپۋبليكالىق بايقاۋدا ولەڭ وقۋ ونەرىن كورسەتكەن بالالاردىڭ وقىعان جىرىن تاماشالادىق.

تۇستەن كەيىن اقىن تۋعان قاسيەتتى قاراساز اۋىلىنىڭ مادەنيەت ۇيىندە اقىننىڭ 80 جىلدىعىنا وراي عىلىمي-كونفەرەنتسيا باستالدى. بۇل كونفەرەنتسيانى قازاقستان جازۋشىلار وداعى باسقارماسىنىڭ توراعاسى نۇرلان ورازالين باسقاردى. ول كەزدەگى الماتى وبلىسى اكىمنىڭ ورىنباسارى سەرىك مۇقانوۆ، الماتى قالاسى اكىمىنىڭ ورىنباسارى سەرىك سەيدۋمانوۆ جەكە-جەكە ءسوز سويلەپ، مەرەيتوي قوناقتارىنا ارناپ جىلى لەبىز ءبىلدىردى. مۇنان سوڭ قازاقستاننىڭ بەلدى قالامگەرلەرى: باۋىرجان جاقىپ، ءابساتتار قاجى دەربىسالى، بەكسۇلتان نۇرجەكە، ساعاتبەت مەدەۋبەك، امانگەلدى كەڭشىلىكۇلى، باتىق ءماجيتۇلى، مۇحتار شاحانوۆ، نۇرلىتاي ۇركىنباي سىندى 28 ادامعا مۇقاڭ تۋرالى زەرتتەۋ ماقالالارىن وقيدى. مەن ءسوز سويلەۋدەن بۇرىن «اتا تەك جالعاعان – التىن شىنجىر» اتتى تاريح-شەجىرەگە قاتىستى كولەمدى كىتابىمدى مۇقاعالي مۇراجايىنا تارتۋ ەتتىم. سوڭىنان «مۇقاعالي مارتەبەسى» اتتى ماقالامدى وقىدىم.

مەرەيتويدىڭ جالعاسى شىلدە ايىنىڭ 30-كۇنى شالكودە جايلاۋىندا ءوتتى. شالكودەنىڭ  حان جايلاۋىندا ات بايگە، پالۋان جارىس سياقتى ءتۇرلى جارىستار  وتكىزىلىپ، الدىڭعى باس جۇلدەنى العاندار جەڭىل ماشينامەن ماراپاتتالىپ جاتتى، ۇلان-اسىر توي بولىپ، اق تۇيەنىڭ قارنى جارىلعان قاراساز بەن شالكودە جايلاۋىندا وتكىزىلگەن اقىننىڭ مەرەيتويى ەكى كۇندىك مىندەتىن وتە سالتاناتپەن اياقتاتتى. شىنىن ايتسام 70 مىڭ ادام قاتىناسقان مۇنداي مەرەيتويدى ءالى كورگەنىم جوق.

– نۇرەكە ءسىزدىڭ «مۇقاعالي كەرۋەنى» اتتى كىتابىڭىز 2016 جىلى بەيجىڭدەگى «ۇلتتار باسپاسىنان» باسىلىم كورىپتى، ىلە-شالا بۇل كىتاپ 2017 جىلى قازاقستاندادا جارىق كورىپتى. ەكى ەلدە تەڭ باسىلىم  كورگەن بۇل كىتاپتىڭ وقىرماندارعا بەرگەن اسەرى قالاي بولدى؟

مۇقاعالي ماقاتاەۆ شىعارمالارى قىتايداعى ءبىر جارىم ميلليون قازاق حالقىنا 1980 جىلداردىڭ سوڭىنان باستاپ كەڭىنەن تانىلا باستادى. سودان «قازدار قايتىپ بارادى»، «جىرلايدى جۇرەك»، «جۇرەك دەمىن العاندا»، «مۇقاعالي قازاقتىڭ-دومبىراسى»، «اققۋدىڭ قاناتىنا جازىلعان جىر»، «قوش، ماحاببات»، «اڭىزعا اينالعان ادام»، «پوەزيا، مەنىمەن ەگىزبەدىڭ؟»، «امانات» سياقتى ون نەشە كىتاپ جارىق كوردى. كەزىندە اقىن شىعارمالارى قازاق ادەبيەت وقۋلىقتارىنا كىرگىزىلىپ وقۋشىلارعا ءدارىس رەتىندە ءوتىلدى. جيناقتاپ ايتقاندا قىتاي قازاقتارى مۇقاعالي ولەڭدەرىن جىلى قابىلدادى. ءبىر كەزدە قىتاي قازاقتارىدا توي-دۋمان، باسقوسۋلاردا مۇقاعالي ولەڭىن وقىماي وتپەيتىن بولدى.

مەن ۇلى اقىن مۇقاعاليدىڭ 80 جىلدىق مەرەيتويىنا قاتىناسىپ  قىتايعا قايتقاننان كەيىن «قاراساز – قارا شالعىن ولەڭدە ءوستىم» اتتى ماقالا جازىپ «شىڭجاڭ گازەتى»، «ىلە گازەتى» سەكىلدى باسىلىمدا جاريالادىم. بۇل ماقالا وقىرماندار اراسىندا كۇشتى اڭىس قوزعادى. وسىدان باستاپ مۇقاعالي تانۋعا كىرىستىم. اسىرەسە، مەنىڭ «مۇقاعالي كەرۋەنى» اتتى كىتابىم 2016 جىلى ماۋسىمدا ۇلتتار باسپاسىنان جارىق كورىپ وقىرمانداردىڭ قىزۋ قارسى الۋىنا يە بولدى. بۇل كىتابىمنىڭ باسپادان شىعۋىنا قحر-نىڭ استاناسى بەيجىڭدەگى ۇلتتار باسپاسى قازاق رەداكتسياسىنىڭ مەڭگەرۋشىسى، بەلگىلى اقىن، مادەنيەت قايراتكەرى باقىتبەك توقتاسىنۇلى كومەك قولىن سوزدى. ول بۇدان سىرت مۇقاعاليعا قاتىستى ءبىر قانشا كىتاپتىڭ شىعۋىنا مۇرىندىق بولدى.

ال، قازاقستاندا «مۇقاعالي كەرۋەنى» اتتى كىتابىم 2017 جىلى «ان ارىس» باسپاسىنان باسىلىم كوردى. بۇل كىتاپ تۋرالى «قازاق ادەبيەتىنىڭ» 2017 جىلعى 10-16 اقپان كۇنى سانىندا «شىڭجاڭداعى بەلگىلى قازاق قالامگەرى نۇرلان سارسەنباەۆتىڭ «مۇقاعالي كەرۋەنى» دەپ اتالاتىن كىتابى مۇقاعاليدىڭ شىققان توپىراعى، اتا-تەگى تۋرالى ارىدان سىر شەرتەدى. مۇقاعاليمەن قاتار ءومىر سۇرگەن ەركىن ءىبىتانوۆ، فاريزا وڭعارسىنوۆا سىندى اقىندار اراسىنداعى ونەر ساباقتاستىعى جان-جاقتى ءسوز بولادى. سونىمەن بىرگە، قىتاي قازاقتارى اراسىنداعى مۇقاعالي تانۋ بارىسىن تىلگە تيەك ەتسە، اۆتور مۇقاعالي پوەزياسىنىڭ قىر-سىرىن اشىپ كورسەتۋگە دە وزىنشە قۇلشىنىس تانىتتى. اتالعان كىتاپتى مۇقاعاليتانۋعا قوسقان ۇلەس دەپ باعالاۋعا بولادى»، – دەپتى. بۇعاندا شۇكىرلىك ەتەمىن.

جيناقتاپ ايتقاندا، مۇقاعالي ماقاتاەۆ حح عاسىرداعى  قازاق پوەزياسىنىڭ تىلدىك قورىن بايىتتى، قازاقتىڭ قارا ولەڭىنە وزگەشە ءتۇس بەرىپ، كوركەم پوەزيانى ەڭ جوعارعى دەڭگەيگە  كوتەرىپ جاڭالىق ەنگىزىپ، ۇلكەن بەلەسكە كوتەرىپ، قازاق پوەزياسىنىڭ دات شالماس التىن دىڭگەگىنە اينالدى.

– اكەڭىز توقتاسىن سارسەنبايۇلى بايسالوۆ اقىن ءھام جىرشى، اعارتۋشى كىسى ەكەن. ەستۋىمىزشە ول كىسى 2011 جىلى قاراشادا قىتاي ەلىنە ساپارلاي بارعان جازۋشى راحىمجان وتارباەۆقا مۇقاعاليدىڭ 200-گە تاياۋ ولەڭىن جاتقا ايتىپ بەرىپ تاڭعالدىرعان ەكەن، وسى راس پا؟

– اكەم توقتاسىن بايسالوۆ 1928 جىلى  الماتى وبلىسى، رايىمبەك اۋدانى، لاباسى (ىلەباسى) جايلاۋىندا دۇنيەگە كەلگەن.

1932 جىلعى اقسۇيەك اشارشىلىقتا ەل ۇركىنشىلىككە ۇشىراپ اكەسى سارسەنباي 4 جاسقا جاڭا كەلگەن  بالاسىن قورجىنعا سالىپ الىپ شەكارا اسقان ەكەن. اكەسى سارسەنباي ءوز ءداۋىرىنىڭ حالقى قادىرلەگەن ازاماتى، كوزى اشىق، كوكىرەگى وياۋ، وتكىر ءتىلدى شەشەن، شەجىرەشى ادام بولعان. «اكە كورگەن وق جونار» دەگەندەي اكەم توقتاسىن بالا جاسىنان ولەڭ-جىرعا اۋەس بولىپ ءوستى. ايگىلى جىراۋداردان اسان بارمەنبەكۇلى، قۇلمامبەت قۇلانيان، كودەك مارالباەۆ، قويدىم دارۋبايقىزى، شارعىن العازىۇلى سياقتى ونەر ادامدارىنان ۇلگى ونەگە الدى. ات جالىن تارتىپ ازامات بولعاننان كەيىن ەل ىشىندە تاراعان قيسسا-داستاندارمەن «تاڭجارىق پەن قويدىمنىڭ ايتىسى»، «شارعىن مەن نۇريلانىڭ ايتىسى»، «البان تاريحى»، «16 جىل تۋرالى» ت.ب. ولەڭ-جىر، قيسسا-داستانداردى، ايتىستاردى بىرنەشە تاڭعا ايتا الاتىن، حالىق اراسىنان شىققان تانىمالى جىرشىلاردىڭ بىرىنە اينالدى.

ءبىزدىڭ ۇيدەن اكەمنىڭ ولەڭىن تىڭداۋعا كەلەتىن ءانشى، جىرشى، جاقسى-جايساڭداردىڭ اياعى ۇزىلمەيتىن. سولاردىڭ ءبىرى قازاقستاننان قىتايعا اكەمدى ارنايى ىزدەپ بارعان جازۋشى راحىمجان وتارباەۆ. اكەم بۇل رەت وتارباەۆپەن ءۇش كۇن سۇحباتتا بولىپ مۇقاعاليدىڭ 200-گە تاياۋ ولەڭىن جاتقا وقىپ بەرىپ تاڭعالدىردى. جازۋشى ەلىنە قايتار كەزدە اكەم وعان قازاقتىڭ اتا-ءداستۇرى بويىنشا ات مىنگىزىپ، شاپان جاتتى. اكەم توقتاسىن بايسالوۆ 2016 جىلى ءساۋىر ايىنىڭ 14-كۇنى 88 جاسىندا ءور تەكەستىڭ اقدالا اۋىلىندا قايتىس بولدى. راحىمجان وتارباەۆ قايتىس بولاردان ىلگەرى «قازاق ادەبيەتىنىڭ» 2017 جىلعى 14-20 ءساۋىر كۇنگى سانىندا اكەم تۋرالى «ولەڭنىڭ كەنىشى ەدى» دەگەن ماقالا جاريالادى. وكىنىشكە وراي ماقالا قىسقارتىلىپ باسىلدى.

قازىر قىتاي قازاقتارى اراسىندا نەشە جۇزدەگەن مۇقاعالي مۇراسىن ناسيحاتتاۋشىلار بار. قىتايداعى ايگىلى جازۋشى سۇلتان جانبولاتوۆ «الەمدەگى كۇللى قازاق تۇگەل، جان سانى ميللياردتان اسقان قىتاي سياقتى وزگە ەلدەرگە دە تانىمال، مەملەكەتتىك سىيلىقتىڭ يەگەرى مۇقاعالي سۇلەيمەنۇلى ماقاتاەۆ – قازاقتىڭ پوەزياسىنا كەسەك ۇلەس  قوسقان شەبەر ليريكى، مۇزبالاقتا اقيىق اقىنى، ۇزدىك اۋدارماشىسى.

مۇقاڭنىڭ شىعارمالارى قىتايداعى ولەڭ سۇيەر قاۋىمنىڭ اۋزىنان تۇسپەيدى، مۇڭداعى قازاق باق-تارىندا – گازەت-جۋرنالدارىندا، راديو-تەلەۆيدەنياسىندا، تور سايت، بلوگتارىندا ءتىپتى كوپ جاريالاندى.  كىتاپتارى قازاق، قىتاي ت.ب. تىلدەردە باسىلىپ شىعىپ كەڭ تارالۋدا. بۇل – ونىڭ اتى مەن تۋىندىلارىنىڭ قازاق جۇرەگىنەن تەرەڭدە مىقتى ورىن العاندىعىنىڭ، مۇقاڭنىڭ قازاقپەن بىرگە ماڭگى  جاساي بەرەتىندىگىنىڭ ايعاعى» دەگەن ەدى. جاقىندا «باقىت» راديوسىنىڭ جۇرگىزۋشىسى باقىتگۇل مۇقامەتقانقىزى مەنىڭ «مۇقاعالي كەرۋەنى» اتتى كىتابىمدى اۋە تولقىنى ارقىلى تاراتىپ قالىڭ تىڭدارمانداردىڭ قىزۋ القاۋىنا بولەندى. مىنە، وسىلايشا مۇقاعالي مۇراسى الەم قازاقتارىنا كەرۋەن تارىتتى. ۋاقىت وزعان سايىن مۇقاعالي مۇراسى تازا التىنداي جارقىراپ، قازاق پوەزياسىنىڭ سۇلۋ قاسيەتىن، پاراساتتى قۇدىرەتىن ءوز وقىرماندارىنا مويىنداتىپ كەتتى.

 

سۇحباتتاسقان باقىت جاعىپارۇلى

پىكىرلەر
رەداكتسيا تاڭداۋى