مارقۇم قارىنداسى سالتانات نۇكەنوۆا جايلى كىتاپ جازىپ شىعارعان ايتبەك امانگەلدى كوپشىلىكتىڭ سىنىنا ۇشىرادى، دەپ حابارلايدى «ادىرنا» ءتىلشىسى.
بۇعان دەيىن ايتبەك امانگەلدى «ول سالتانات ەدى. ءبىر قىزدىڭ ءولىمى ۇلكەن ەلدىڭ زاڭناماسىن قالاي وزگەرتتى» اتتى تۋىندىسىنىڭ جارىققا شىققانىن مالىمدەگەن ەدى. ايتۋىنشا، العاشقى تارالىمى — 7 مىڭ دانا.
ء«بىزدىڭ باسىمىزدان وتكەن وقيعا ادامدارعا وتباسى قۇندىلىعىن جانە جۇيەگە قارسى شىعۋدان قورىقپاي، ادىلەتتىلىككە قول جەتكىزۋگە بولاتىنىن ەسكە سالادى دەپ ۇمىتتەنەمىن»،-دەدى ول.
الايدا بۇل جاڭالىق جەلى قولدانۋشىلارىنىڭ تالقىسىن تۋدىردى. كەيبىر پىكىر يەلەرى باستامانى قاتاڭ سىنعا الىپ، ونى جەكە تراگەديانى پيار مەن تابىس كوزىنە اينالدىردى دەپ ايىپتادى.
«جاقىن ادامىنان ايىرىلۋ — جەكە قايعى، ول ءوزىن-ءوزى جارنامالاۋعا اينالماۋى كەرەك»، «ەگەر شىنايى قايعىرسا، كىتاپ ساتۋمەن ەمەس، دۇعا جاساپ، قايىرىمدىلىقپەن اينالىسار ەدى»،-دەپ جازدى قولدانۋشىلار.
سونداي-اق كەيبىر جەلى قولدانۋشىسى بۇل وقيعا الداعى ۋاقىتتا فيلمگە نەمەسە باسقا دا مەدياجوبالارعا ارقاۋ بولۋى مۇمكىن دەگەن بولجام ايتتى.
پىكىرتالاستا ايتبەك امانگەلدىنى قولداعاندار دا بولدى. قولداۋشىلار كىتاپتى مارقۇمدى ەسكە الۋدىڭ ءبىر جولى ءارى قايعىنى ەڭسەرۋ فورماسى دەپ سانايدى.
«مۇمكىن بۇل جاي عانا ارناۋ كىتاپ شىعار؟ كىتاپ — ماڭگىلىك ەستەلىك»، «ول ەڭ جاقىن ادامىنان ايىرىلدى، قايعىسىن قالاي وتكەرەتىنىن ءوزى شەشۋگە قۇقىلى»، «ازداپ جاناشىرلىق تانىتايىق»،-دەپ جازدى ولار.
تالقىلاۋعا ءوزىن جازۋشىمىن دەپ تانىستىرعان قولدانۋشى دا قاتىسىپ، كىتاپ شىعارۋ، اسىرەسە ومىرباياندىق ەڭبەكتەر، ادەتتە تابىس اكەلمەيتىنىن اتاپ ءوتتى.
ء«بىز بۇل كىتاپپەن ءبىر جارىم جىل جۇمىس ىستەدىك جانە 8 ميلليون تەڭگەدەن استام قاراجات جۇمسادىق. ءبىر دانانىڭ وزىندىك قۇنى 255 مىڭ تەڭگەدەن استى. مۇنداي جوبالار كوبىنە ءوزىن-ءوزى اقتامايدى، سوندىقتان مۇنى بيزنەس دەۋ ورىنسىز»، — دەپ جازدى ول.
