اشحابادتاعى مەكتەپتەر مەن مەكتەپكە دەيىنگى مەكەمەلەردە تەكسەرۋلەر جۇرۋدە. ءبىلىم سالاسىنىڭ شەنەۋنىكتەرى بۇل نە تەكسەرىس ەكەنىن ازىرگە اشىپ ايتپايدى دەپ حابارلايدى «ادىرنا» ۇلتتىق پورتالى ازاتلىك راديوسىنا سىلتەمە جاساپ.
تۇركىمەنستانداعى ءبىلىم وشاقتارىندا ءجۇرىپ جاتقان بۇل تەكسەرىس ورىس سىنىپتارىن جابۋ ماسەلەسىمەن بايلانىستى بولۋى مۇمكىن. «بارلىق مەكتەپ پەن بالاباقشالاردا تەكسەرۋ جۇمىستارى ءجۇرىپ جاتىر. جەمقورلىققا بايلانىستى دەيدى. شىندىعىندا ماسەلە ورىس سىنىپتارىنا بالا قابىلدانۋىمەن بايلانىستى»، دەيدى كوررەسپوندەنت. ازاتلىكتىڭ كەلەسى ءتىلشىسى ورىس تىلىندەگى ءبىلىم مەكەمەلەرىنىڭ باسشىلارىنىڭ جۇمىستان شىعارىلعانىن ايتادى.
سونداي اق، ورىس تىلىندەگى سىنىپتار وبلىستاعى مەكتەپتەردە دە جابىلۋدا. ال ورىس ءتىلى ساباقتارىنىڭ ساعاتتارى مەيلىنشە قىسقارتىلىپ جاتىر. ازاتلىكتىڭ سەنىمدى اقپارات كوزى تۇركىمەنستاندا 2030 جىلعا دەيىن ورىس تىلىندەگى سىنىپتاردى تۇگەلدەي جابۋ ۇكىمەتتىك دەڭگەيدە قارالىپ جاتقانىن جەتكىزىپتى.
ورىس ءتىلى سىنىپتارىن جابۋدان بولەك، قازىر بۇل ەلدە ورىسشا سويلەيتىندەرگە دە قىسىم ارتا باستاعان. انا تىلىندە سويلەمەگەندەر جازاسىز قالمايتىنى دا ەسكەرتىلگەن. تۇركىمەنستانداعى بۇل جاعداي ساياساتپەن بايلانىستى دەگەن اقپارات تا بار. تاياۋدا عانا تۇركىمەنستاننان كەتكەن تۇركىمەندەر وزدەرىنىڭ تولقۇجاتىن اۋەجايدا جاريا تۇردە جىرتىپ، لاقتىرىپ جىبەرگەن سوڭ شەكارا اسىپ كەتكەن بولاتىن. ورىس تىلىمەن كۇرەس تە وسى جاعدايمەن بايلانىستى بولۋى مۇمكىن دەگەن ءسوز بار.
فوتو «ازاتلىك» سايتىنان الىندى.
