قايتا جاڭارتىلاعان الماتى بوتانيكالىق باعىنا ءۇش ايدىڭ ىشىندە 210 مىڭنان استام ادام كەلىپ، مەملەكەتتىك بيۋدجەتكە شامامەن 40 ملن تەڭگە كىرىس اكەلدى، دەپ حابارلايدى قازاقپارات ءتىلشىسى.
210 مىڭ كەلۋشىنىڭ - 44 مىڭى مەكتەپ وقۋشىسى، 15 مىڭى ستۋدەنتتەر مەن زەينەتكەرلەر، قالعاندارى قالا تۇرعىندارى مەن قوناقتارى. جازدا بوتانيكالىق باققا كۇن سايىن ورتا ەسەپپەن 2,5 مىڭ ادام كەلەدى. «قازىر كۇزدە كەلۋشىلەردىڭ سانى ازايدى. دەسەك تە، بىزگە جۇمىس كۇندەرى 1000-1500 ادام، ال دەمالىس كۇندەرى 5000 ادامعا دەيىن كەلەدى»، - دەيدى بوتانيكا جانە فيتوينترودۋكتسيا ينستيتۋتىنىڭ باس ديرەكتورى گۇلنار سيتپاەۆا.
سونىمەن قاتار، گۇلنار سيتپاەۆا ءتاريفتى كوتەرۋ ماسەلەسى قاراستىرىلىپ جاتقانىن ايتتى. «قازىر كىرۋ بيلەتى 500 تەڭگەنى قۇرايدى. ونىڭ ىشىندە ءبىز 277, 80 تەڭگەنى مەملەكەت كىرىسىنە اۋدارامىز. بۇل 0,1 اەك قۇرايدى. ءبىز ءار بيلەتتەن 0,1 اەك مەملەكەت كىرىسىنە اۋدارۋعا مىندەتتىمىز. بۇگىنگى كۇنگە دەيىن مەملەكەتتىك بيۋدجەتكە 40 ملن ءتۇستى. ناتيجەسىندە بىزدە از عانا سوما قالادى. ءبىز تاريفتەردى كوتەرۋ ماسەلەسىن قاراستىرىپ جاتىرمىز. بۇل قالىپتى تاجىريبە. ياعني، ەرەسەك ادامنىڭ بيلەتى 900 تەڭگە، بالالار مەن زەينەتكەرلەر ءۇشىن 500 تەڭگە بولادى. ال، مۇمكىندىگى شەكتەۋلى ادامدار ءۇشىن تەگىن. قازىر بۇل ماسەلە تالقىلانىپ جاتىر. مەنىڭ ويىمشا، بۇل كەلەسى جىلى جۇزەگە اسىرىلادى»، - دەپ ءتۇسىندىردى ول.
ەسكە سالا كەتسەك، بوتانيكالىق باقتىڭ قالاي وزگەرگەنى تۋرالى بۇعان دەيىن جازعان بولاتىنبىز.
بيىل مەملەكەت باسشىسى قاسىم-جومارت توقاەۆ الماتىعا ساپارىندا بوتانيكالىق باقتى قايتا قۇرۋدىڭ ناتيجەلەرىمەن تانىسقان بولاتىن.
